فوتو: مينيسترلىكتىڭ ءباسپاسوز قىزمەتى
بۇگىندە باسسەيندىك ينسپەكتسيالارعا 18 جەڭىل اۆتوكولىك, كوپ فۋنكتسيالى قۇرىلعىلار, سۋدىڭ جىلدامدىعىن جانە شىعىنىن ولشەۋگە ارنالعان داتچيكتەر بەرىلدى, ال عيماراتتارىنا جوندەۋ جۇمىستارى جۇرگىزىلىپ جاتىر.
«سۋ رەسۋرستارىن رەتتەۋ, قورعاۋ جانە پايدالانۋ كوميتەتى سۋدىڭ «كولەڭكەلى» نارىعىنا قارسى كۇرەستى كۇشەيتۋ ءۇشىن قۇرىلعان. ۆەدومستۆو سۋدى زاڭسىز پايدالانۋمەن جانە ونى ەسەپكە الۋ دەرەكتەرىنىڭ بۇرمالانۋىمەن, سونداي-اق, ەلدىڭ سۋ وبەكتىلەرىندەگى قۇقىققا قارسى شارۋاشىلىق قىزمەتپەن كۇرەسەدى. قازىرگى ۋاقىتتا باسسەيندىك ينسپەكتسيالار مەن مەملەكەتتىك سۋ ينسپەكتورلارىنىڭ فۋنكتسيالارىن كەڭەيتۋ, جەدەل ارەكەت ەتۋدىڭ جاڭا قۇرالدارىن ەنگىزۋ بويىنشا جۇمىس اتقارىلىپ جاتىر», دەدى سالا ءمينيسترى نۇرجان نۇرجىگىتوۆ.
ۆەدومستۆونىڭ ءباسپاسوز قىزمەتىنىڭ ءمالىم ەتۋىنشە قازىرگى ۋاقىتتا باسسەيندىك ينسپەكتسيالاردىڭ جالپى شتاتى 241 ادام. مينيسترلىك قۇرىلعاننان بەرى شتات سانى 1,5 ەسە ۇلعايعان. بۇل – ءار وبلىس ورتالىعىندا باسسەيندىك ينسپەكتسيا بولىمدەرىن اشۋعا مۇمكىندىك بەردى.
ايتا كەتسەك, ەلىمىزدە 8 باسسەيندىك ينسپەكتسيا بار. ول ارال-سىرداريا, بالقاش-الاكول, ەرتىس, ەسىل, جايىق-كاسپي, نۇرا-سارىسۋ, توبىل-تورعاي, شۋ-تالاس باسسەيندىك ينسپەكتسيالارى.
