مۇنداي سۇيەمەلدەۋگە يە بولعان ينۆەستوردىڭ ءبىرى – ەكىباستۇز وڭىرىندە جاڭا فەرروقورىتپا زاۋىتىن سالىپ جاتقان «EkibastuzFerroAlloys» جشس. ينۆەستورلار جوباعا 92 ملرد تەڭگە ينۆەستيتسيا قۇيعان.
«پاۆلودار وڭىرىندەگى جاڭا فەرروقورىتپا زاۋىتىنىڭ قۇرىلىسى تامامدالۋعا جاقىن. قازىرگى ۋاقىتتا ىسكە قوسۋعا دايىندىق جۇمىستارى باستالىپ كەتتى. جىلىنا 240 مىڭ توننا فەرروقورىتپا بەرەتىن ءوندىرىس ورنىنىڭ ءونىمى 100 پايىز ەكسپورتقا باعىتتالعان. ءونىمدى 52 مەملەكەتكە, سونىڭ ىشىندە ەۋروپا, امەريكا, وڭتۇستىك ازيا ەلدەرىنە جىبەرۋ كوزدەلىپ وتىر», دەيدى «EkibastuzFerroAlloys» جشس باس ديرەكتورى ماديار دانياروۆ.
ونىڭ ايتۋىنشا, كەيىنگى ۋاقىتتا پروكۋراتۋرانىڭ ينۆەستيتسيالىق كەيستەر ماسەلەسىن شەشۋمەن بەلسەنە اينالىسىپ جاتقانى ينۆەستورلاردى ايرىقشا قۋانتىپ وتىر. ينۆەستيتسيالىق جوبالاردا قانداي دا ءبىر ماسەلە كەزىكسە, بارلىق مۇددەلى تاراپتى, مەملەكەتتىك ورگانداردى اشىق الاڭعا شاقىرىپ, وزەكتى ماسەلەلەردىڭ تۇپكىلىكتى شەشىلۋىنە ىقپال ەتەدى.
ء«بىزدىڭ جوبامىز اسا اۋقىمدى بولعاندىقتان, زاۋىت قۇرىلىسى بارىسىندا كوپتەگەن ماسەلەگە كەزىكتىك. مىسالى, بولاشاق ءوندىرىس ورنىنا تەمىرجول قۇرىلىسىن جۇرگىزۋ كەرەك بولدى. بىراق ول باستاپقىدا وتە باياۋ ءجۇردى. پروكۋرورلار ارالاسقان سوڭ, ماسەلە جىلدام شەشىلىپ كەتە باردى. ەندى بىردە قۇرىلعىلاردى جەتكىزىپ, ورناتىپ بەرەتىن شەتەلدىك مامانداردىڭ ەلىمىزگە ۋاقىتىندا كەلىپ-كەتۋىنە قاتىستى پروبلەمالار تۋىندادى. شەتتەن كەلەتىن مامانداردىڭ ەلدە بولۋىنا قاتىستى بەلگىلى ءبىر مەرزىم مەن رەسىمدەر بار. بىزگە اكەلىنەتىن قۇرال-جابدىق كوپ بولعاندىقتان, ولاردى قۇراتىن شەتەلدىك ماماندار سانى دا اۋقىمدى. ولار بويىنشا ءتيىستى ورگاندارعا جىبەرگەن ءوتىنىش, حاتتارىمىز جاتىپ قالماي ما, جابدىقتارىمىز تۇرىپ قالماي ما دەگەن قاۋىپپەن پروكۋراتۋراعا حابارلاستىق. قۇزىرلى ورگان ماماندارى جەدەل تۇردە ءتيىستى مەكەمە مەن ۇيىمدار وكىلدەرىنىڭ باسىن قوسىپ, ورتاق مامىلە جاسالدى. ءسويتىپ, شاقىرتقان ماماندارىمىز ۋاقىتىندا كەلدى», دەيدى م.دانياروۆ.
كاسىپورىن باسشىسى ينۆەستيتسيا سالاسىندا ءبىراز جىل ارەكەت ەتىپ كەلە جاتقانىن, بۇل تاراپتا شەتەلدىك ينۆەستورلارعا دا قولۇشىن سوزعانىن اتاپ ءوتتى. ەندى بۇل ىسكە پروكۋراتۋرانىڭ ارالاسۋى ينۆەستيتسيالىق جوبالاردىڭ جىلدام جۇرۋىنە ىقپال ەتىپ وتىرعانىن جەتكىزدى. ايتىپ وتەيىك, «EkibastuzFerroAlloys» جشس-عا قاراستى زاۋىت بيىل جىل سوڭىنا دەيىن پايدالانۋعا بەرىلىپ, وندا 800-گە جۋىق تۇراقتى جۇمىس ورنى قۇرىلادى دەگەن جوسپار بار.
وبلىستىق پروكۋراتۋرا وكىلدەرىنىڭ سوزىنە قۇلاق تۇرسەك, بيزنەسكە كەلتىرىلەتىن كەدەرگىلەر ءارتۇرلى. كوبى زاڭناماعا قاتىستى. جاساندى كەدەرگىلەر ويلاپ تابۋ, بيۋروكراتتىق ءىس-ارەكەت نەمەسە جاۋاپتى ورگانداردىڭ ارەكەتسىزدىگى (ق ۇلىقسىزدىعى) ينۆەستورلاردى قۇزىرلى ورگاندارعا شاعىمدانۋعا ءماجبۇر ەتەدى.
«پاۆلودار وبلىسى پروكۋراتۋرا ورگاندارىنىڭ قاداعالاۋ قىزمەتى بارىسىندا جىل باسىنان ينۆەستورلاردىڭ 22 پروبلەمالىق كەيسىنە رۇقسات بەرىلدى. ولار بويىنشا جالپى ينۆەستيتسيا سوماسى 1 ترلن تەڭگەدەن استى. وتىنىشتەردىڭ باسىم بولىگى جەر, ساۋلەت-قالا قۇرىلىسى زاڭناماسىن بۇزۋ جانە تەحنيكالىق شارتتاردى الۋ ماسەلەلەرىمەن كەلىپ ءتۇستى. نەگىزىنەن پروكۋراتۋرا ورگاندارىنا پاۆلودار, ەكىباستۇز جانە اقسۋ قالالارىنان ينۆەستورلار جۇگىندى», دەپ حابارلادى وڭىرلىك پروكۋراتۋرا.
پاۆلودار وبلىسى,
ەكىباستۇز قالاسى
