سۋرەتتى تۇسىرگەن – اۆتور
وسكەمەن – تارعىن – سامار باعىتىندا ءبىر ەمەس, ەكى تاۋلىك جول بولمادى. قالىڭ تۇسكەن ىلعالدى قاردى ارشىپ الۋ اۋىر تەحنيكاعا دا وڭاي سوقپادى. بىلتىر التى مەترگە جۋىق قار تۇسكەن مارقاكول وڭىرىندە دە جاۋعان قاردىڭ سالدارىنان اۋدان ورتالىعىنان توسقايىڭعا دەيىنگى جول جابىلدى. ونىڭ ارعى جاعىنداعى بالىقتىبۇلاق, شاناعاتى اۋىلدارى جىلداعىداي بايلانىسسىز قالعان. تاۋلى ايماقتا عانا ەمەس, سەكيسوۆكا مەن ريددەر اراسىنداعى تۋرا جولدا دا قوزعالىس توقتاتىلعان. جالپى, ءوڭىردىڭ قاي باعىتىندا بولماسىن, تىركەمەسى بار جۇك كولىكتەرىنىڭ قوزعالىسىنا شەكتەۋ قويىلعان. اسىرەسە, وسكەمەن – التاي باعىتىنداعى كۇرە جولدا تىركەمەسى بار, جارتىلاي تىركەمەلى كولىكتەر قىستاي قاتىناي المايدى.
بۇل جولعى قارلى بوران وبلىستىق توتەنشە جاعدايلار قىزمەتكەرلەرى تۇرعىندارعا تاۋلىك بويى ەسكەرتۋ جىبەرىپ وتىردى. جول پاترۋل پوليتسيا قىزمەتكەرلەرى قالانىڭ ءتورت بۇرىشىندا ءتارتىپتىڭ ساقتالۋىن قاتاڭ قاداعالادى. شەكتەۋگە قۇلاق اسپاي, جولعا شىققان ازاماتتار جاۋاپكەرشىلىككە تارتىلاتىنىن ەسكە سالدى.
– اقتۇتەك بوراندى كۇندەرى كۇرە جولداردا پوليتسەيلەر قاۋىپسىزدىكتى قامتاماسىز ەتۋدە بارىن سالىپ, جۇمىس ىستەدى. اسىرەسە, جولداردىڭ قاۋىپتى ۋچاسكەلەرىندە پاترۋلدەۋدى ۇيىمداستىردى. قيىن جاعدايعا تاپ بولعان جولاۋشىلارعا كومەك قولدارىن سوزدى. جول اشىلعان ساتتە ۇزىن-سونار كولوننالارعا پوليتسيا ءپاترۋلى جول باستادى, – دەيدى شقو پد ءباسپاسوز حاتشىسى, پوليتسيا مايورى گۇلنۇر ءتۇسىپوۆا.
پوليتسيانىڭ جەدەلدىگى مەن كاسىبي ارەكەت ەتۋىنىڭ ارقاسىندا كوپتەگەن جولاۋشىلار وقىس جاعدايلاردان امان قالعانى انىق. ايتپەسە, جول جيەگىنە كولىگىن قالدىرىپ, اداسىپ كەتكەن ازاماتتار دا بولدى. 1954 جىلى تۋعان وسكەمەن قالاسىنىڭ تۇرعىنى قالادان ۇزاي بەرە جول بويىنداعى توبەنى اينالا وسكەن بۇتا, قاراعان جاقتى بەتكە العان. ماقساتى يتمۇرىن تەرىپ الماق بولىپتى. بوراندى كۇنى جولدان شىعىپ كەتكەن ول اداسىپ, قايتار ءىزىن تاپپاعان. قاۋىپتىڭ ءتونىپ تۇرعانىن سەزدى مە, دەرەۋ 112 نومىرىنە حابارلاسىپ, كومەك شاقىرىپتى. جەدەل قيمىلداعان قۇتقارۋشىلار اداسقان ازاماتتى تاۋىپ, كولىگىنە دەيىن امان-ەسەن جەتكىزگەن.
وسى رەتتە توتەنشە جاعدايلار دەپارتامەنتى ماماندارى جولعا شىقپاس بۇرىن كۇن رايىن بولجاپ, جول جاعدايىنا كوز جەتكىزىپ الۋدى ەسكەرتەدى. قالتا تەلەفونعا كەلگەن حابارلامالارعا بەي-جاي قاراۋعا بولمايدى. الىس جولعا شىققان جاعدايدا ارقان, جانارماي قورى, كۇرەك, قول شام, العاشقى مەديتسينالىق كومەك كورسەتۋ قوبديشاسى, جىلى كيىم, ازىق-ت ۇلىك الۋدى ۇمىتپاعان ءجون. سونداي-اق جىلدامدىق رەجىمىن اسا قاتاڭ ساقتاۋ قاجەت. توتەنشە جاعدايعا تاپ بولسا, 112 نومىرىنە قوڭىراۋ شالۋعا كەڭەس بەرەدى.
شىعىس قازاقستان وبلىسى
