2010 جىلى قۇرىلعان «HILL» Corporation جشس – شىمكەنت قالاسىنىڭ ەڭ ءىرى سالىق تولەۋشىلەرىنىڭ ءبىرى. «HILL» قوزعالتقىش مايلارىن ەسكى جانە جاڭا كولىكتەرگە, الەمدىك اۆتووندىرۋشىلەردىڭ بارلىق مودەلدەگى جەڭىل كولىكتەرىنە قولدانۋعا بولادى. ترانسميسسيا مايلارى اۆتوماتتى جانە مەحانيكالىق بەرىلىس قورابى مەن باسقا دا ترانسميسسيا تۇرلەرىنە جارايدى. «HILL» Corporation جشس-نىڭ موتور مايلارى جۇك تاسيتىن اۆتوموبيلدەرگە, اۆتوبۋستارعا, اۋىل شارۋاشىلىعى كولىكتەرى مەن ارنايى تەحنيكالارعا, تەمىرجول, سۋدا جۇرەتىن كولىكتەرگە, اۋە كەمەلەرىنە ارنالعان. زاۋىت وندىرەتىن ونەركاسىپتىك مايلار گيدراۆليكالىق, رەدۋكتورلىق, تۋربينالىق, كومپرەسسورلىق قوندىرعىلار ءۇشىن كەرەك.
ءونىمنىڭ 75 پايىزى ءوز ەلىمىزدە تۇتىنىلسا, قالعان 25 پايىزى تمد مەملەكەتتەرىنىڭ نارىعىنا ەكسپورتتالادى. كاسىپورىن جىلىنا 70 مىڭ توننا قوزعالتقىش مايىن, 28 مىڭ توننا وڭدەلگەن ماي, 1 500 توننا جاقپاماي وندىرۋگە قاۋقارلى. كومپانيا مايلاردى ASTM («American Society for Testing and Materials») ستاندارتىنا سايكەس «Infineum», «Lubrizol», «Chevron Oronite», «Afton» سەكىلدى الەمدىك وندىرۋشىلەردىڭ بازالىق مايلارى مەن قوسپالارىن امەريكالىق «FMC Technologies» قوندىرعىسىندا بلەندينگ, ياعني ءبىر-بىرىنە ارالاستىرۋ ارقىلى شىعارادى. زاۋىتتا «Fastroil», «HILL», «HILL Grease» دەگەن ساۋدا بەلگىلەرىمەن قۇرامى, قۇرىلىمى بولەك 400-گە جۋىق ماي وندىرىلەدى. «Fastroil FF» دەپ اتالاتىن سوڭعى ۇلگىدەگى ماي ءوندىرىسى قولعا الىنعان. «HILL Corporation» مايلاۋ ماتەريالدارى «General Electric», «MAN», «Cummins», «CAT», «MWM», «Jenbacher», «ZF», «MAG», «Deutz», «MTU», «Avtovaz», «Kamaz», «VOLVO», «Mack», «Renault», «Mercedes-Benz» سەكىلدى الەمدىك وندىرۋشىلەر تاراپىنان ارنايى رۇقسات قاعازبەن, سونداي-اق سەرتيفيكاتپەن راستالعان. ءوندىرىس ورنى «Fluid Solutions» نەمىس تەحنولوگياسىمەن قولدانىلعان ەسكى مايلاۋ ماتەريالدارىن وڭدەپ, ودان ءى توپتاعى بازالىق مايلار جاساپ شىعارادى.
كومپانيا ەلىمىزدىڭ ەكولوگيالىق تالاپتارىنا جاۋاپ بەرەتىن زاماناۋي زاۋىت قۇرا ءبىلدى. سونىمەن بىرگە قورشاعان ورتاعا زياندى قالدىقتاردى ازايتۋ ماقساتىنداعى «جاسىل» ەكونوميكا ساياساتىن جۇرگىزۋگە دە اتسالىسىپ جاتىر. «HILL Corporation» جشس ديرەكتورى ازامات جولشىبەكوۆتىڭ ايتۋىنشا, «جاسىل ەۋرازيا» بايقاۋىندا قالدىقتاردى ءتيىمدى جويۋ اتالىمى بويىنشا 2-ورىندى جەڭىپ الدى. سونداي-اق «ERG Supply Award 2023», «ERG Sustainability Award» كونكۋرستارىندا «ەڭ مىقتى ءوندىرۋشى» ماراپاتىنا يە بولدى. ودان بولەك, وسى جىلدىڭ تامىز ايىندا كومپانياعا «Green company» اتاعى بەرىلىپ, «جاسىل سەرتيفيكات» ماراپاتىنىڭ يەسى اتاندى.
شىمكەنت قالاسىنىڭ كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ مالىمەتىنە سايكەس, بيىلعى 9 ايدا وڭدەۋ ونەركاسىبىندە 712 ملرد تەڭگەنىڭ ءونىمى شىعارىلعان. 43,3 مىڭ توننا مۇناي-گاز-حيميا ءونىمى وندىرىلگەن. 2019 جىلمەن سالىستىرعاندا نەگىزگى كاپيتالعا سالىنعان ينۆەستيتسيا 3,2 ەسە ارتقان. بيىل جوسپارعا سايكەس مەگاپوليستە دارىلىك زاتتار مەن مەديتسينالىق بۇيىمدار شىعاراتىن جاڭا كاسىپورىن پايدا بولادى. ەكونوميكاداعى ورتا كاسىپكەرلىك ۇلەسى 6 ايدا 9,3 پايىزعا جەتتى. 1 000 كاسىپكەرلىك نىسان مەملەكەتتەن قولداۋ تاپقان. تسيفرلىق تەحنولوگيالاردى پايدالاناتىن وڭدەۋشى كاسىپورىندار ۇلەسى بيىلعى جوسپاردا 13,3 پايىز بولىپ بەلگىلەنگەن. مەگاپوليستە 19 ءىرى, 42 ورتا, 876 شاعىن ءوندىرىس ورنى بار. توعىز ايدا 810,6 ملرد تەڭگەنىڭ ءونىمى ءوندىرىلدى. بىلتىرعى كەزبەن سالىستىرعاندا كورسەتكىش 2 پايىزعا ارتقان. وڭدەۋ ونەركاسىبىندە مەتالل بۇيىمى, حيميا, فارماتسەۆتيكا, رەزينا, پلاستماسسا, تاماق, سۋسىندار, ماشينا جاساۋ مەن مۇناي وڭدەۋ ونىمدەرىنىڭ كولەمى جىلدان-جىلعا ءوسىپ كەلەدى.
شاھاردا مىڭ گەكتاردان استام اۋماقتى قۇراتىن 7 ونەركاسىپتىك ايماق بار. وندا 601,7 ملرد تەڭگەگە 426 جوبا ىسكە اسىرىلىپ جاتىر. بۇگىنگە دەيىن 225 ملرد تەڭگەگە 293 جوبا ناقتى جۇزەگە اسىرىلدى. ناتيجەسىندە, 8,5 مىڭ ادام جۇمىسپەن قامتىلدى.
