«Rixos Khadisha» قوناقۇيىنىڭ تۋرنير زالىندا دۇنيە ءجۇزىنىڭ ەڭ ۇزدىك 10 شاحماتشى قىزى: گروسسمەيستەرلەر تان چجۋني (قىتاي, 2 551), الەكساندرا گورياچكينا (FIDE, 2 533), حامپي كونەرۋ ء(ۇندىستان, 2 530), كاتەرينا لاگنو (FIDE, 2 527), ەليزابەت پەتتس (گەرمانيا, 2 458) پەن حالىقارالىق شەبەرلەر ءبيبىسارا اساۋباەۆا (قازاقستان, 2 487), ستاۆرۋلا تسولاكيدۋ (گرەكيا, 2 439), ديۆيا دەشمۋح ء(ۇندىستان, 2 501), نۋرگيۋل ساليموۆا (بولگاريا, 2405), باتحۋياگين مونگونتۋلار (موڭعوليا, 2 344) اينالما جۇيەسى بويىنشا ءبىر-بىرىمەن جارىسقان بولاتىن.
سايىستىڭ جابىلۋ سالتاناتىنا شىمكەنت قالاسى اكىمىنىڭ ءبىرىنشى ورىنباسارى قۋانىش اسىلوۆ, «KazChess» ءبىرىنشى ۆيتسە-پرەزيدەنتى دارمەن سادۋاقاسوۆ, فيدە مەن فەدەراتسيانىڭ باس سەرىكتەسى – «Freedom Holding Corp.» كومپانياسىنىڭ وكىلدەرى قاتىسىپ, جۇلدەگەرلەر مەن گران-پريگە قاتىسۋشىلاردىڭ الداعى ىستەرىنە ساتتىلىك تىلەدى.
«بۇگىن ءبىز حالىقارالىق ايەلدەر شاحمات ءتۋرنيرىنىڭ ءساتتى اياقتالۋىنا كۋا بولدىق. بۇل جارىس تەك سپورتتىق باسەكە ەمەس, ايەلدەر شاحماتىن دامىتۋدىڭ, جاڭا تالانتتاردى اشۋ مەن ءوزارا دوستىق قارىم-قاتىناس ورناتۋدىڭ الاڭىنا اينالدى. بارشاڭىزعا, اسىرەسە جەڭىمپازدارعا, ادال كۇرەسىپ, تاماشا ناتيجە كورسەتكەندەرىڭىز ءۇشىن زور العىسىمدى ايتامىن. ءاربىر قاتىسۋشىنىڭ ەڭبەگى مەن تاباندىلىعى بىزگە ناعىز ۇلگى-ونەگە بولدى. وسىنداي تۋرنيرلەر شاحمات الەمىندە مىقتىلار مەن جاڭا تالانتتاردى تۋدىراتىنى ءسوزسىز», دەپ اتاپ ءوتتى ق.اسىلوۆ.
ايەلدەر اراسىنداعى فيدە گران-ءپريى سايىسىنىڭ اقشالاي جۇلدە قورى دا قوماقتى. التى كەزەڭنىڭ ارقايسىسىنىڭ جۇلدە قورى 80 000 ەۋروعا تەڭ. ونىڭ ىشىندە ءبىرىنشى ورىن العان شاحماتشىعا 18 000 ەۋرو تابىس ەتىلەدى. ال ەكىنشى ورىننىڭ جۇلدەسى 13 000 ەۋرونى قۇرايدى. بۇل سىندا ءۇشىنشى ورىن العان ءبيبىسارا اساۋباەۆا 9 500 ەۋرو اقشالاي جۇلدەمەن ماراپاتتالدى. بۇكىل تۋرنير سەرياسىنىڭ جالپى جۇلدە قورى – رەكوردتىق 600 000 دوللاردى قۇراسا, ونىڭ 120 000 دوللارى جالپىەسەپتە ۇزدىك بولعان ون ويىنشىعا ۇلەستىرىلەدى. كلاسسيكالىق شاحماتتا گران-پري ءتۋرنيرى اقشالاي جۇلدەسىمەن عانا ەمەس, رەيتينگتى جوعارىلاتۋعا مۇمكىندىك بەرەتىن ەرەكشەلىگىمەن دە اسا ماڭىزدى. بۇعان قوسا, ۇمىتكەرلەر گران-پري سەريالارىندا جەڭىسكە جەتكەن جاعدايدا الەمدىك شاحمات ءتاجىن يەلەنۋگە مۇمكىندىك سىيلايتىن «FIDE Women’s Candidates 2026» تۋرنيرىنە جولداما الادى.
