فوتو: qazaqconcert.kz
فەستيۆالدىڭ ماقساتى – مادەنيەتارالىق جانە كونفەسسياارالىق ىنتىماقتاستىقتى نىعايتۋ, ءتۇرلى ەلدەردەن كەلگەن قاتىسۋشىلار اراسىندا تاجىريبە الماسۋ مەن ىنتىماقتاستىق ءۇشىن قولايلى ورتا قالىپتاستىرۋ. ءىس-شارانى قازاقستان رەسپۋبليكاسىنىڭ مادەنيەت جانە اقپارات مينيسترلىگى قولداۋىمەن روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمى ۇيىمداستىرادى.
فەستيۆال قاتىسۋشىلارىنىڭ قاتارىندا ازەربايجان رەسپۋبليكاسىنىڭ ەڭبەك سىڭىرگەن ءارتىسى يلحام نازاروۆ, قىرعىز رەسپۋبليكاسىنىڭ ەڭبەك سىڭىرگەن ءارتىسى ايزيرەك مومۋنوۆا, اليشەر ناۆوي اتىنداعى مەملەكەتتىك اكادەميالىق ۇلكەن وپەرا جانە بالەت تەاترىنىڭ ءسوليسى نوسير يۋسۋپوۆ, ازەربايجان مەملەكەتتىك اكادەميالىق وپەرا جانە بالەت تەاترىنىڭ ءسوليسى اتاش گاراەۆ, سونداي-اق ت. شەۆچەنكو اتىنداعى ۋكراينا ۇلتتىق وپەرا جانە بالەت تەاترىنىڭ ءسوليسى كسەنيا باحريتدينوۆا-كراۆچۋك جانە اباي اتىنداعى قازاق ۇلتتىق اكادەميالىق وپەرا جانە بالەت تەاترىنىڭ جەتەكشى ءسوليسى تايىر ءتاجى بار. كورەرمەن تەك جەكە ورىنداۋلار عانا ەمەس, قازاقكونتسەرتتىڭ «Astana Musical» مەملەكەتتىك تەاترى, «G-band», «استانا سازى» قازاق مەملەكەتتىك فولكلورلىق ءانسامبلى جانە قازاق مەملەكەتتىك سيمفونيالىق وركەسترىمەن بىرگە ۇتىمدى كوللابوراتسيالاردى تاماشالاي الادى.
كونتسەرتتە مادەنيەت سالاسىنىڭ ۇزدىگى, اباي اتىنداعى قازاق ۇلتتىق وپەرا جانە بالەت تەاترىنىڭ ديريجەرى مۇحتار قالداياقوۆ ديريجەرلىك ەتەدى.
ءان كەشى 15 قاراشا, ساعات 19:00-دە روزا باعلانوۆا اتىنداعى «قازاقكونتسەرتتە» وتەدى.
