بۇگىندە وتاندىق زىعىر مايى جاپونداردىڭ سەنىمىنە يە بولىپ, ولاردىڭ كۇندەلىكتى راتسيونىنىڭ اجىراماس بولىگىنە اينالعان. جاپونيانىڭ زىعىر مايىنا جىل سايىنعى قاجەتتىلىگى – شامامەن 10 مىڭ توننا, بۇل بۇعان دەيىن جىبەرىلگەن كولەمنەن الدەقايدا اسىپ تۇسەدى. سۇرانىستى قاناعاتتاندىرۋ ءۇشىن «دجاتەكو» جاقىن ارادا وتاندىق زىعىر مايىنىڭ يمپورتىن جىلىنا 3 مىڭ تونناعا دەيىن ارتتىرۋدى, سونداي-اق سافلور, ماقتا مايلارىن جەتكىزۋدى كەڭەيتۋدى جوسپارلاپ وتىر.
كەزدەسۋدىڭ باستى تاقىرىپتاردىڭ ءبىرى لوگيستيكا ماسەلەسى بولدى. ايجان بيجانوۆا ەلىمىزدىڭ ازيا ەلدەرىمەن تۇراقتى تاۋار اينالىمىن نىعايتۋدى كوزدەيتىنىن ايتتى. ول كولىك مارشرۋتتارىن وڭتايلاندىرۋ جانە جاپوندىق سەرىكتەستەر ءۇشىن كۇتۋ ۋاقىتىن قىسقارتۋ ماقساتىندا كولىك مينيسترلىگىمەن جانە «قتج» ۇلتتىق كومپانياسىمەن جۇمىس كەڭەستەرىن وتكىزۋدى ۇسىندى.
ايتا كەتۋ كەرەك, 2024 جىلدىڭ العاشقى 9 ايىنىڭ قورىتىندىسى بويىنشا ەلىمىز وسىمدىك مايلارىن ەكسپورتتاۋدا ەلەۋلى ءوسىم كورسەتتى. قاڭتار-تامىز ايلارى ارالىعىندا جاپونياعا 93 توننا ماي ەكسپورتتالىپ, 122,4 مىڭ دوللار كىرىس ءتۇستى, بۇل وتكەن جىلدىڭ وسى كەزەڭىمەن سالىستىرعاندا 4,5 ەسە كوپ. ەكسپورتتىڭ نەگىزگى بولىگىن زىعىر جانە كۇنباعىس مايلارى قۇراپ, ەلىمىزگە الەمدىك نارىقتا تۇراقتى ورىن الۋعا جول اشتى. جالپى, وسى سەكتورداعى ەلىمىزدىڭ تاۋار اينالىمىنىڭ جالپى كولەمى 321,9 ملن دوللاردى قۇراپ, ونىڭ ىشىندە 297,5 ملن دوللار ەكسپورتقا تيەسىلى بولدى.
جاپون نارىعىندا سافلور جانە ماقتا مايلارىنا سۇرانىس تۋىپ وتىر. ولاردىڭ جىلدىق قاجەتتىلىگى سايكەسىنشە 4 مىڭ جانە 5 مىڭ توننانى قۇرايدى. «دجاتەكو» كومپانياسى سافلور مايىنىڭ جەتكىزىلىم كولەمىن 1 مىڭ تونناعا, ماقتا مايىن 2,5 مىڭ تونناعا دەيىن ارتتىرۋ نيەتى بار ەكەنىن مالىمدەدى. بۇل وتاندىق وندىرۋشىلەر ءۇشىن جاڭا مۇمكىندىك بەرىپ, ەكى ەل اراسىنداعى ىنتىماقتاستىقتى نىعايتا تۇسەدى.
ايجان بيجانوۆا جاپوندىق سەرىكتەستەرگە وتاندىق ونىمدەرگە دەگەن قىزىعۋشىلىعى ءۇشىن العىس ءبىلدىرىپ, جاپونيامەن ساۋدا-ەكونوميكالىق ءوزارا ءىس-قيمىلدى ودان ءارى تەرەڭدەتۋدىڭ ماڭىزدىلىعىن اتاپ ءوتتى.
