ون ءتورت جىلدان بەرى جۇمىس ىستەپ كەلە جاتقان اكەلەر وداعىنىڭ نەگىزىن قوعام قايراتكەرى قۋانىش جۇماتاەۆ قۇرعان ەدى. بۇل كۇندە دۇنيەدەن ءوتىپ كەتكەن ازامات اكەلەر قاۋىمىن مەكتەپكە جاقىنداتىپ, ءار وتباسىندا ەلىن سۇيەتىن, ۇلتىنا جانى اشيتىن ەڭبەكقور ازاماتتىڭ تاربيەلەنىپ شىعۋىندا ەرلەردىڭ ورنى ەرەكشە ەكەنىن ىسىمەن كورسەتتى. كەيىن جۇمىس اۋقىمى ۇلعايىپ, مەكتەپ جانىنداعى كەڭەس كوپتەگەن وبلىستا فيليالى بار وداققا اينالدى.
جيىندا مادەنيەت جانە اقپارات مينيسترلىگى جاستار جانە وتباسى ىستەرى كوميتەتى توراعاسىنىڭ ورىنباسارى ءبىرجان ءالىمجانوۆ بيىلعى فورۋمنىڭ «تاربيە – تالبەسىكتەن» دەپ اتالۋىنىڭ سەبەبىنە توقتالدى.
«وتباسىنداعى تاربيە مەملەكەتتىڭ ءال-اۋقاتى مەن تۇراقتىلىعىنا تىكەلەي اسەر ەتەدى. مەملەكەت باسشىسى قاسىم-جومارت توقاەۆ بيىلعى جولداۋىندا «مەكتەپكە دەيىنگى تاربيە بەرۋ جانە وقىتۋ ىسىنە مەملەكەتپەن قاتار اتا-انالار دا جاۋاپتى» دەپ اتاپ ءوتتى. وتباسى – وسكەلەڭ ۇرپاق قۇندىلىقتارىنىڭ قالىپتاسۋىنىڭ نەگىزگى كوزى. مينيسترلىك جۇرگىزگەن الەۋمەتتىك زەرتتەۋلەر قورىتىندىسى حالىقتىڭ 82 پايىزدان استامى ەرلى-زايىپتىلار بالا تاربيەسىمەن بىردەي اينالىسۋى كەرەك دەگەن تۇجىرىم جاساعانىن كورسەتىپ وتىر», دەدى ب.ءالىمجانوۆ.
فورۋم قاتىسۋشىلارىنا باسپاگەر باقىتجان بۇقاربايدىڭ بالا تاربيەسى تۋرالى بۇگىنگى اكەلەردىڭ اڭگىمەلەرى مەن ويلارى توپتاستىرىلعان «زامانمەن ساناسقان 30 اكەنىڭ حيكاياسى» اتتى كىتابى تاراتىلدى.
«ەر ادامنىڭ بەينەسىن قالىپتاستىرۋداعى اكەنىڭ ءرولى: جاۋاپكەرشىلىك, باتىلدىق, قۇرمەت» تاقىرىبىنا مودەراتورلىق ەتكەن وتباسىلىق پسيحولوگ ەرجان مىرزاباەۆ قازىرگى قوعامداعى كوپ كەلەڭسىزدىك بالا تاربيەسىندەگى اكەلەر ىقپالىنىڭ السىرەپ كەتۋىنەن ەكەندىگىن ايتتى. ءبىر ۇيەلمەننىڭ جاۋاپكەرشىلىگىن ارقالاي المايتىن اكە ءوسىپ كەلە جاتقان ۇلىنا قانداي ۇلگى كورسەتەدى؟
وسى تاقىرىپ اياسىندا قازاقستاننىڭ ەڭبەك سىڭىرگەن قايراتكەرى, پ.چايكوۆسكي اتىنداعى الماتى مۋزىكالىق كوللەدجىنىڭ ديرەكتورى ءبىرجان حاسانعاليەۆ اكەگە قۇرمەت تۋراسىندا وي ءوربىتتى. اكەسى, داڭقتى كومپوزيتور, ايگىلى ءانشى ەسكەندىر حاسانعاليەۆتىڭ جانىنان تاستاماي ەرتىپ جۇرەتىنى كوپ قاتارلاستارى سەكىلدى ۇلتتىق قۇندىلىقتاردان قاعىس قالۋدان, «اسفالت بالاسى» اتانۋدان ساقتاپتى.
«اكەم بالا تاربيەسىنە بارىن سالعان ازامات بولدى. سول تۇستا قازاقشاسى كەمشىن الماتى كوشەسىندە قاتار سەرۋەندەپ ءجۇرىپ مەنىمەن تەك قازاقشا سويلەسەتىن. قازىر ءبىز ۇيگە قوناق كەلە قالسا, بالالاردى سىرتقا قۋىپ جاتامىز عوي. ال مەن اكەمنىڭ جانىندا ءجۇرىپ, قازاق ونەرى مەن مادەنيەتىنىڭ قابىرعالى قايراتكەرلەرىنىڭ ءبىرازىنىڭ اڭگىمەسىن تىڭدادىم. سونىڭ ءبارى ازامات رەتىندە قالىپتاسۋىما نەگىز قالادى», دەدى ول.
قازاقستان حالقى اسسامبلەياسى جانىنداعى رەسپۋبليكالىق انالار كەڭەسى جەتەكشىسىنىڭ ورىنباسارى كامال الپەيىسوۆا ۇل تاربيەسىنە كوبىرەك كوڭىل ءبولۋ كەرەكتىگىن ايتتى.
سەسسياداعى «وتباسى جانە قاۋىپسىزدىك», «سانالى اتا-انا», «ەرلەر ءۇشىن سپورت پەن دەنساۋلىقتىڭ ماڭىزى» اتتى تالقىلاۋلار اياسىندا قاتىسۋشىلار تۇرمىستىق زورلىق-زومبىلىق, ءسۋيتسيدتىڭ الدىن الۋ ماسەلەسى, سانالى تۇردە وتباسىن قۇرۋ, بالا تاربيەلەۋدەگى اكەنىڭ ءرولى مەن جاۋاپكەرشىلىگى, بالانىڭ بويىنداعى قابىلەتتەردى ارتتىرۋ توڭىرەگىندە پىكىر الماستى.
«تاربيە – تالبەسىكتەن» اتتى IX رەسپۋبليكالىق اكەلەر فورۋمى بارىسىندا ايتىلعان ۇسىنىس-پىكىرلەردىڭ دەنى بالا تاربيەسىنە بارشانىڭ جۇمىلۋى كەرەكتىگى تۋراسىندا بولدى. سوندا عانا بۇگىنگى قوعام تالابىنا ساي وسكەلەڭ ۇرپاق قالىپتاستىرا الامىز.
قىزىلوردا
