قويىلىم قازىرگى قوعامداعى وزەكتى ماسەلەلەردىڭ ءبىرى – قۇمار ويىنعا تاۋەلدىلىك (لۋدومانيا) تاقىرىبىن ارقاۋ ەتەدى. شىعارما ومىردەن الىنعان وقيعا نەگىزىندە جازىلعان. پەساداعى باستى كەيىپكەر ميراس – ويىنعا تاۋەلدىلىكتىڭ سالدارىنان تاعدىرى تۇيىققا تىرەلگەن جاننىڭ جيىنتىق بەينەسى.
پسيحولوگ: ينتەرنەتكە تاۋەلدىلىك پەن لۋدومانيانىڭ ۇقساستىعى كوپ
وقيعا بارىسىندا كورەرمەن قۇمار ويىننىڭ ادام ومىرىنە, وتباسى مەن جاقىندارىنا تيگىزەتىن اۋىر زارداپتارىنا كۋا بولادى. جەڭىل جولمەن اقشا تابۋدى كوزدەگەن ميراس وتىرىك پەن الداۋدىڭ شىرماۋىنا ءتۇسىپ, اينالاسىنداعى ادامداردىڭ سەنىمىن پايدالانادى. بىرىنەن سوڭ ءبىرى جاسالعان قاتەلىكتەر مەن زاڭسىز ارەكەتتەر اقىرىندا ونى رۋحاني ءارى الەۋمەتتىك تىعىرىققا اكەلەدى. قويىلىم ادام بويىنداعى السىزدىك, جاۋاپكەرشىلىك, سەنىم مەن ساتقىندىق سەكىلدى ۇعىمداردى تەرەڭ قوزعاي وتىرىپ, لۋدومانيانىڭ جەكە ادامعا عانا ەمەس, تۇتاس وتباسى مەن قوعامعا اسەر ەتەتىن دەرت ەكەنىن كورسەتەدى.
قويىلىمدا تەاتردىڭ جاس اكتەرلەرى ءبىرتۇتاس ءارى ۇيلەسىمدى اكتەرلىك انسامبل قالىپتاستىرا العان. باستى كەيىپكەردى سومداعان ءمادي ماڭعىستاۋوۆ قۇمار ويىنعا تاۋەلدى ادامنىڭ ىشكى كۇيزەلىسى مەن جان ارپالىسىن كورسەتتى. تولعاناي بەينەسىندەگى اقبوبەك نازەنعاليەۆا وتباسىنىڭ بەرەكەسىن ساقتاپ قالۋعا تىرىسقان ايەلدىڭ جان دۇنيەسىن اسەرلى اشسا, جاننۇر رولىندەگى ءبيبىنۇر كامەشوۆا مەن دينا وبرازىنداعى گۇلزات رىسقالي وقيعا جەلىسىنىڭ دامۋىنا سەرپىن بەرىپ, كەيىپكەرلەر مىنەزىن شىنايى بەينەلەي ءبىلدى. رينات رولىندەگى ازامات ورىنباەۆ تا دوسىنا دەگەن سەنىم مەن كوڭىل كۇي وزگەرىستەرىن تابيعي جەتكىزدى. ال ميراستىڭ اناسى بەينەسىن سومداعان مادەنيەت قايراتكەرى ساۋلە بايمەنوۆا انالىق مەيىرىم مەن الاڭداۋشىلىقتى تەرەڭ سەزىممەن ورنەكتەپ, قويىلىمنىڭ ەموتسيالىق سالماعىن ارتتىرا ءتۇستى. جالپى, اكتەرلىك قۇرامنىڭ شىنايى ويىنى مەن ءوزارا ساحنالىق ۇيلەسىمى قويىلىمنىڭ كوركەمدىك قۋاتىن كۇشەيتىپ, كورەرمەندى وقيعاعا ەرىكسىز سەندىرە الدى.
رەجيسسەر جانات تەلتاەۆ ساحنالىق شەشىمدەر ارقىلى شىعارمانىڭ الەۋمەتتىك ماڭىزىن ايقىنداپ, كورەرمەندى بۇگىنگى قوعامداعى وزەكتى ماسەلەلەر تۋرالى ويلانۋعا جەتەلەيدى. قويىلىم بارىسىندا LED ەكران مۇمكىندىكتەرى كەڭىنەن پايدالانىلعان. اسىرەسە بەينەپروەكتسيالار مەن ەكراندىق شەشىمدەر وقيعانىڭ ەموتسيونالدىق اسەرىن كۇشەيتىپ, ساحنالىق ارەكەتپەن ۇيلەسىم تاپقان.
قازاقستانداعى لۋدومانيا مەن ويىن بيزنەسى: وتاندىق عالىمداردىڭ عىلىمي ەڭبەكتەرى تانىستىرىلدى
قويىلىمنىڭ ەرەكشەلىكتەرىنىڭ ءبىرى – زاماناۋي تەحنولوگيالاردىڭ قولدانىلۋى بولدى. LED ەكراندا كورسەتىلگەن بىرقاتار بەينەماتەريالدار جاساندى ينتەللەكتىنىڭ كومەگىمەن ازىرلەنگەن. تەاتر ساحناسىندا جاساندى ينتەللەكت تەحنولوگيالارىن پايدالانۋ قويىلىمنىڭ كوركەمدىك شەشىمدەرىن تولىقتىرىپ, كەيىپكەردىڭ پسيحولوگيالىق كۇيىن, وقيعا ديناميكاسىن جانە درامالىق اتموسفەرانى تەرەڭىرەك اشۋعا مۇمكىندىك بەرگەن. بۇل ءوز كەزەگىندە كورەرمەننىڭ شىعارمانى قابىلداۋىنا جاڭا اسەر سىيلاپ, قويىلىمنىڭ زاماناۋي سيپاتىن ايقىنداي ءتۇستى.
اسىرەسە قويىلىمنىڭ فينالدىق كورىنىسى كورەرمەنگە ەرەكشە اسەر قالدىردى. كەيىپكەر تاعدىرى ارقىلى ءاربىر ارەكەتتىڭ سالدارى بولاتىنى كورسەتىلىپ, كورەرمەندى تەرەڭ ويعا جەتەلەيدى.
قويىلىم «زاڭ مەن ءتارتىپ» باعدارلاماسى اياسىندا اتىراۋ وبلىسى اكىمدىگىنىڭ قولداۋىمەن جانە وبلىستىق پروكۋراتۋرانىڭ ۇسىنىسىمەن ساحنالانىپ وتىر.
پرەمەرا سوڭىندا كورەرمەندەرگە ەرەكشە اسەر قالدىرعان ءسات بولدى. ساحناعا قويىلىمداعى باستى كەيىپكەردىڭ ءپروتوتيپى بولعان اتىراۋلىق تيمۋر رامازانوۆ كوتەرىلدى. بۇگىندە ول لۋدومانيادان زارداپ شەككەن ازاماتتارعا پسيحولوگيالىق كومەك كورسەتەتىن «جاڭا ءومىر» ورتالىعىن باسقارادى. تيمۋر رامازانوۆ ءوز سوزىندە قيىن كەزەڭدەردە جانىنان تابىلىپ, قولداۋ كورسەتكەن اناسى مەن تۋعان اپكەسىنە العىس ايتتى.
وسىلايشا, «ماحاببات رۋلەتكاسى» الەۋمەتتىك دراماسى كورەرمەنگە اسەرلى ساحنالىق تۋىندى ۇسىنىپ قانا قويماي, قوعامداعى وزەكتى ماسەلەنى كوتەرىپ, قۇمار ويىنعا تاۋەلدىلىكتىڭ ادام تاعدىرىنا تيگىزەتىن زارداپتارىن كورسەتتى. سونىمەن قاتار سپەكتاكلدە زاماناۋي تەحنولوگيالار مەن جاساندى ينتەللەكت مۇمكىندىكتەرىن ۇتىمدى پايدالانۋ تەاتر ونەرىنىڭ جاڭا ىزدەنىستەرگە بەت بۇرعانىن اڭعارتادى.
تەاتردىڭ كوركەمدىك جەتەكشىسى تەمىربەك مۇحتاروۆ:
«ماحاببات رۋلەتكاسى» – تەك ساحنالىق تۋىندى ەمەس, بۇگىنگى قوعامنىڭ كوكەيكەستى ماسەلەسىن قوزعايتىن ماڭىزدى الەۋمەتتىك سپەكتاكل. قۇمار ويىنعا تاۋەلدىلىك تاقىرىبى ارقىلى ءبىز كورەرمەنگە ادام تاعدىرىنىڭ كۇردەلى تۇستارىن, تاڭداۋدىڭ سالدارىن جانە جاۋاپكەرشىلىكتىڭ سالماعىن كورسەتۋگە تىرىستىق.
جاس اكتەرلەرىمىز بۇل قويىلىمدا ۇلكەن جاۋاپكەرشىلىكپەن جۇمىس ىستەپ, كۇردەلى پسيحولوگيالىق رولدەردى شىنايى الىپ شىقتى. سونىمەن قاتار شىعارمانىڭ كوركەمدىك شەشىمدەرى مەن زاماناۋي ساحنالىق تاسىلدەر سپەكتاكلدىڭ اسەرىن كۇشەيتە ءتۇستى.
بۇل قويىلىم – تەاتر ۇجىمىنىڭ ىزدەنىسىنىڭ, رەجيسسەرلىك كوزقاراستىڭ جانە شىعارماشىلىق بىرلىكتىڭ ناتيجەسى. ەڭ باستىسى, ول كورەرمەن جۇرەگىنە جول تابا الدى دەپ سەنەمىز», دەدى تەاتردىڭ كوركەمدىك جەتەكشىسى تەمىربەك مۇحتاروۆ.
ارتۋر ياحۋدا,
تەاتردىڭ ادەبيەت ءبولىمىنىڭ مەڭگەرۋشىسى
