بيىلعى جىلى پرەمەر-ليگانىڭ ويىن كەستەسىندە بىرقاتار وزگەرىس بولدى. ەڭ باستىسى, كوماندالار جاڭا ماۋسىمدى 1 ناۋرىزدا ادەتتەگىدەي 14 ەمەس, 13 كلۋبپەن باستادى. سەبەبى «ماقتاارال» ۇجىمى ليتسەنزيالاۋ تالاپتارىنا سايكەس كەلمەگەنىنە بايلانىستى قاتىسۋدان شەتتەتىلدى. ال وسى كلۋبتى الماستىرۋى كەرەك بولعان «اقسۋ» كومانداسى قارجىلىق قيىندىققا بايلانىستى تۋرنيردەن باس تارتتى.
جاڭا ماۋسىم الدىنداعى جاڭالىقتاردىڭ ءبىرى ەلىمىزدىڭ چەمپيوناتىندا لەگيونەرلەرگە قويىلاتىن شەكتەۋدى الىپ تاستاۋ بولدى. بۇرىن الاڭعا شىققاندا لەگيونەر سانى مىندەتتى تۇردە جەتەۋ بولسا, ەندى ولاردىڭ سانىنا شەكتەۋ جوق ەكەنى حابارلاندى. بىراق ءوتىنىش بەرگەن كەزدە جيىرما بەس فۋتبولشىنىڭ كەمىندە 13-ءى قازاقستان فۋتبولىنىڭ وكىلى بولۋى كەرەك دەگەن تالاپ قويىلدى.
بيىلعى قپل ماۋسىمىندا سەمەيلىك «ەلىماي» مەن استانالىق «جەڭىس» فۋتبول كلۋبتارى دەبيۋت جاسادى. «ەلىماي» ماۋسىمدى 6-ورىنمەن, ال «جەڭىس» 10-ورىنمەن اياقتادى.
ەلىمىزدەگى باستى فۋتبول دوداسىندا توسىن جاعداي دا بولدى. ماسەلەن, «شاحتەر» تاريحتا العاش رەت پرەمەر-ليگادان شىعىپ قالدى. قاراعاندىلىق كوماندا ەلىمىزدىڭ ەكى دۇركىن چەمپيونى, ەل كۋبوگىنىڭ يەگەرى, سونداي-اق ەۋروكۋبوكتەردىڭ توپتىق كەزەڭىنە وتكەن ءبىرىنشى وتاندىق كلۋب سانالادى.
قپل سوڭعى تۋرىندا چەمپيوندىققا تالاس الماتىلىق «قايرات» پەن ەلوردالىق «استانا» اراسىندا ءوربىدى. باسەكە سوڭعى تۋرعا دەيىن ساقتالدى. شەشۋشى ويىندا «قايرات» سىرت الاڭدا «اتىراۋدى» 1:0 ەسەبىمەن جەڭىپ, چەمپيوندىقتى يەلەندى. قوناقتار قۇرامىنداعى ماڭىزدى گولدى, 11 مەترلىك ايىپ دوبىن 59-مينۋتتا گرۋزيالىق لەگيونەر گريگوري زاريا سوقتى. پەنالتي برازيليالىق جواو پاۋلونى شالىپ قۇلاتقانى ءۇشىن بەلگىلەنگەن بولاتىن. وسىلايشا, الماتىلىق كوماندا 2024 جىلعى ەل چەمپيونى اتاندى.
كۇمىس مەدالدى قاتارىنان ەكىنشى جىل ەلوردالىق «استانا» جەڭىپ الدى. گريگوري باباياننىڭ كومانداسى سوڭعى 26-تۋردا «جەتىسۋدى» 5:0 ەسەبىمەن ويسىراتا ۇتتى.
قولا مەدالدى «اقتوبە» فۋتبولشىلارى يەلەندى. ولار ماۋسىمنىڭ سوڭعى ماتچىندا تۇركىستان وبلىسىنىڭ «تۇران» كومانداسىن 2:0 ەسەبىمەن جەڭدى.
بىلتىرعى ەل چەمپيونى «ورداباسى» بۇل ماۋسىمدا چەمپيوندىق اتاعىنان ايىرىلىپ, تۋرنيرلىك كەستەدە 4-ورىندا قالدى. سوڭعى ويىندا ولار «ەلىمايدان» 2:1 ەسەبىمەن باسىم ءتۇستى.
«قايرات» كومانداسى چەمپيوندىق اتاقتىڭ ارقاسىندا كەلەسى جىلى ەلىمىزدىڭ سۋپەركۋبوگى, ۋەفا چەمپيوندار ليگاسىنىڭ ىرىكتەۋ كەزەڭىندە باق سىناۋعا مۇمكىندىك الدى. ءتۋرنيردىڭ قورىتىندىسى بويىنشا «استانا», «اقتوبە», «ورداباسى» كوماندالارى دا ەۋروكۋبوككە قاتىسا الادى.
