سۋرەتتى تۇسىرگەن – جانگەلدى ابدىعالىم
قارقارالى اۋدانىنداعى دالا ءورتىن ءسوندىرۋ كەزىندە ساران قالاسىنداعى №24 ءورت ءسوندىرۋ ءبولىمىنىڭ اعا ءورت ءسوندىرۋشى-قۇتقارۋشىسى حايرات قازا بولعان ەدى. 1991 جىلى تۋعان سەرجانت ازاماتتىق قورعاۋ ورگانىندا 2014 جىلدان باستاپ جۇمىس ىستەپ كەلگەن.
«حايرات حاليدىڭ ءورتتى ءسوندىرۋ كەزىندە كورسەتكەن ەرلىگى – ناعىز باتىلدىق پەن جانقيارلىقتىڭ ۇلگىسى. ول ءوز ءومىرىن ادامدارعا قىزمەت ەتۋگە جانە تۋعان جەرىن قورعاۋعا ارنادى. حاليدىڭ جاقىندارىنىڭ قايعىلارىنا ورتاقپىز. البەتتە, ءبىزدىڭ ءسوزىمىز بەن قولداۋىمىز وتباسىنا ارداقتى ۇلدى, اياۋلى اكەنى قايتارا المايدى. ءتىلسىز جاۋمەن كۇرەس كەزىندە تاباندى قىزمەت قىلىپ, قىرشىن كەتكەن باتىردىڭ ەسىمى ەشقاشان ۇمىتىلمايدى», دەدى ەرماعانبەت قابدۋلا ۇلى.
مەملەكەتتىك ناگرادانى تابىس ەتۋ راسىمىنە قۇتقارۋشىنىڭ ارىپتەستەرى قاتىستى.
– ەل پرەزيدەنتىنە ءبىزدىڭ باتىر ارىپتەسىمىزدى ماراپاتتاعانى ءۇشىن العىس ايتامىز. حالي حايرات ءوزىنىڭ ونجىلدىق قىزمەتى بارىسىندا قاشاندا ماماندىققا ادالدىعىن كورسەتتى. ونىڭ جۇرەكتىلىگىنىڭ ارقاسىندا بىرنەشە جان قاتەردەن اراشالانىپ قالدى, – دەدى وبلىستىق توتەنشە جاعدايلار دەپارتامەنتىنىڭ باستىعى مارعۇلان امانباەۆ.
ساران قالاسىنداعى ءورت ءسوندىرۋ ءبولىمىنىڭ باستىعى مارعۇلان ىسقاقوۆ حايرات قازا تاپقان قايعىلى وقيعانىڭ قالاي وربىگەنى تۋرالى باياندادى. حايرات پەن تاعى ءۇش قۇتقارۋشى سول كۇنى دالا اۋماعىن كۇزەتۋگە شىعادى. دالادا ءورت وشاعىن كەزىكتىرگەن ولار ونى دەرەۋ سوندىرۋگە كىرىسەدى. بولجام بويىنشا, سول ساتتە جەلدىڭ باعىتى وزگەرگەن.
– جىگىتتەر وقيعا ورنىنا جەتىپ, بىزگە نە بولىپ جاتقانىن حابارلاپ وتىردى. حايراتتىڭ سوڭعى ايتقان ءسوزى: ء«بارى دۇرىس, ۋايىمداماڭىزدار» ەدى... بىراق توسىن تابيعاتتىڭ كەسىرىنەن ەسىل ەر قىزمەتتىك مىندەتىن اتقارۋ بارىسىندا قاپيادا مەرت بولدى, – دەدى م.ىسقاقوۆ.
مارقۇمنىڭ جاقىندارى «قايعىلى ساتتە قاسىمىزدان تابىلىپ, ەسىمىن قۇرمەتتەپ, «ەرلىگى ءۇشىن» مەدالىن تارتۋ ەتىپ جاتقاندارىڭىزعا ەرەكشە العىسىمىزدى بىلدىرەمىز», دەدى.
«وتباسىندا ءتورت بالانىڭ ەكىنشىسى ەدى. بالا كۇنىنەن قۇتقارۋشى بولۋدى ماقسات تۇتتى, ادامدارعا كومەكتەسىپ, قوعامعا پايداسىن تيگىزگەندى جاقسى كورەتىن. ءورت ءسوندىرۋ بولىمىندە 10 جىلعا جۋىق جۇمىس ىستەدى. ونىڭ ەرلىگى – ومىردەگى قالعان ءىزى», دەيدى مارقۇمنىڭ اپكەسى بيبىگۇل حاميتقىزى.
قاراعاندى وبلىسى
