سۋرەت: arabic.alibaba.com
وسىدان ەكى-ءۇش اي بۇرىن جازدىڭ قوڭىر سالقىن تۇنىندە اۋلاداعى ءدال وسى ورىندىقتا تازا اۋامەن تىنىستاپ وتىرعان ەدىم. كەنەت, پودەزدىڭ ەسىگى شالقاسىنان اشىلىپ, تەمىر جاقتاۋعا شارق ەتىپ تيگەن. الاڭسىز جۇرگەن ويىن بالالارى دا جالت قاراسقان. قالتا تەلەفونىن قۇلاققا جابىستىرعان كۇيى وسى قىز عوي, الدەكىممەن داۋىستاي سويلەسىپ شىققان. ەستىگەن قۇلاقتا جازىق بار ما؟ ءۇيدىڭ بۇيىرىندەگى قاراڭعىلاۋ تۇسقا بارىپ: «توي جاساماساڭ, مەنىڭ ءنومىرىمدى وشىرە سال» دەدى. كىممەن سويلەسىپ تۇرعانىن قايدام, تۇرمىس قۇرۋعا نيەتتى قىز ەكەنىن ءتۇسىندىم.
«...كرەديت الاسىڭ با, قارىز الاسىڭ با, شارۋام جوق. ەل قاتارلى اق كويلەك كيىپ, باقىتتى بولۋعا قۇقىم بار شىعار. ءبىر توي جاساي الماساڭ, نەسىنە ساقينا سالىپ ءجۇرسىڭ؟» دەگەن ءزىلدى داۋىسىنان-اق, تۇتقانىڭ ارعى جاعىنداعى جىگىتكە, جىگىتتىڭ اتا-اناسىنا جانىم اشىعان. قازاقتىڭ ىردۋ-دىردۋ تويى باستالماس بۇرىنعى قۇدالىقتا كيگىزەتىن كويلەك-كونشەگىنەن-اق كيكىلجىڭ شىعىپ, قانشاما جاستىڭ ءموپ-ءمولدىر ماحابباتىنا سىزات تۇسەر ەدى؟ بۇل دا سونىڭ كەبى. كۇنى كەشە عانا ءبىر-ءبىرىن ايىم-كۇنىم دەپ جۇرگەن جاستار توي قامىنا كەلگەندە ءيتىس-تارتىس كۇيگە تۇسە باستادى. ەرتەڭدەرى قالاي بولارى, ءبىر قۇدايعا ايان.
«ەي, سەن تىڭداپ تۇرسىڭ با مەنى؟ ءسوز سالماس بۇرىن ويلانۋىڭ كەرەك ەدى. توي بولماسا, مەنى ۇمىت. ۇقتىڭ با؟» دەدى دە, تەلەفونىن جامىلىپ شىققان قارا كۇرتىنىڭ قالتاسىنا سۇڭگىتە سالدى. سۇڭگىتە سالىپ, سولقىلداپ جىلادى.
كورشىنىڭ كەنجە قىزىنىڭ سول كەشتەگى ءسوزى ءتىپتى ايدالاداعى مەنىڭ قۇلاعىمدا قالىپتى. اقىرى دىتتەگەنىنە جەتكەن ەكەن. بۇگىن قالانىڭ ءبىر مەيرامحاناسىندا ۇلان-اسىر توي. بەس ساعاتتىق تويعا بولا بەلشەدەن كرەديتكە كىرگەن اتا-انا. شىققان شىعىننان بۇرىن اتا-انانىڭ ءۇمىتى اقتالسا ەكەن دەپ, ورنىمنان تۇرا بەرگەنىمدە, ەسىكتىڭ الدىنا «ليمۋزين» كەلىپ توقتاپ جاتقان...
