چەمپيونات قاراعاندى قالاسىنىڭ پريشاحتينسك بولىگىندە ورنالاسقان №33 مەكتەپتە ءوتتى. قالاداعى 40 مەكتەپتەن قاتىسقان 74 كوماندا 8 سانات بويىنشا باق سىناستى. ولاردىڭ روبوتتارى «قىز قۋ», «اسىق اتۋ», «كوكپار», «جامبى اتۋ», «بايگە», «تەڭگە الۋ», «حانتالاپاي», «ارقان تارتۋ» ويىندارىندا باسەكەگە ءتۇستى. مۇنىمەن قوسا, ۇلتتىق سالت-ءداستۇردى دارىپتەيتىن شەبەرلىك سىنىپتارى ءوتتى. بالدىرعانداردىڭ رۋحتى فلەشموبى دا كوپشىلىكتىڭ كوڭىلىنەن شىقتى.
– ۇلى دالا قۇندىلىقتارى ءبىزدىڭ قوعامدى بىرىكتىرەدى. بۇل جارىس قازاق مادەنيەتى مەن ءداستۇرىن زاماناۋي تەحنولوگيالارىمەن ۇشتاستىرىپ وتىر. وقۋشىلاردىڭ تانىمىن كەڭەيتەدى. قاراعاندى قالاسىنىڭ مەكتەپتەرىندە تەحنيكاعا بەيىم وقۋشىلار ءۇشىن بارلىق جاعداي جاسالعان. ءبىلىم وردالارىندا روبوتتەحنيكا كابينەتتەرى بار. جابدىقتار جاڭارتىلىپ جاتىر. بولاشاق ينجەنەرلەرگە ارنالعان كوپتەگەن ۇيىرمە, Steam زەرتحانالارى قوسىمشا ءبىلىم دەڭگەيىندە جۇمىس ىستەيدى, – دەيدى قالالىق ءبىلىم ءبولىمىنىڭ باسشىسى ەسەنتاي ءاشىم.
9-دان 16 جاسقا دەيىنگى وقۋشىلار روبوتتاردى جيناۋ جانە باعدارلامالاۋ داعدىلارىن كورسەتتى.
– مەن روبوتتەحنيكامەن اينالىسقانىما 2 جىل بولدى. كوكپار تۋرالى مول مالىمەت جينادىم. بىراق مۇندا ءبىرىنشى بارلىق ەرەكشەلىكتى ءتۇسىنىپ الۋ كەرەك. الدىمەن روبوت شاباندوزدى جىلدام جيناپ, سودان كەيىن ونى سمارتفونداعى «Bluetooth» ارقىلى ساۋاتتى باسقارۋ قاجەت, – دەپ ءبولىستى №33 مەكتەپ-بوبەكجاي كەشەنىنىڭ 6-سىنىپ وقۋشىسى ياروسلاۆ زەمليانسكي.
جارىس ۇيىمداستىرۋشىلاردىڭ ءبىرى ماعجان جۇماباەۆ اتىنداعى گيمنازيانىڭ روبوتتەحنيكا ءپانىنىڭ وقىتۋشىسى ادىلبەك بەردىحودجاەۆ چەمپيوناتتىڭ الدىندا اۆتورلىق ەرەجەلەر الدىن الا جازىلىپ, ارنايى ويىن الاڭدارى جاساقتالعانىن ايتادى.
– «كوكپار» ساناتى ءۇشىن ەلەكتروندى تابلو جاسالدى. مۇندا ناعىز ويىن اتموسفەراسى سەزىلەدى. ياعني ونلاين رەجىمىندە بارلىق قاتىسۋشى مەن جانكۇيەر جارىسقا كۋا بولا الادى. «حانتالاپاي» جاڭا ساناتى: روبوت ءارتۇرلى جەرلەردە شاشىراڭقى اسىقتاردى جيناۋى كەرەك. تاپسىرما وڭاي ەمەس – وبەكتىنىڭ قاي جەردە ەكەنىن ەسەپتەۋگە ءتيىس. قاجەتتى سىزىقتى جوعالتپاۋ دا ماڭىزدى, – دەيدى ءا.بەردىحودجاەۆ. ۇيىمداستىرۋشى مۇنىمەن قوسا ۇلتتىق ناقىشتاعى روبوتتەحنيكا چەمپيوناتىنىڭ ەكىنشى مارتە وتكەنىن اتاپ ءوتتى.
الداعى ۋاقىتتا دا ءداستۇرلى تۇردە, رەسپۋبليكالىق, ءتىپتى حالىقارالىق دەڭگەيدە وتكىزگىسى كەلەتىنىن جەتكىزدى. بۇعان دا قوماقتى قولداۋ قاجەتتىگىن دە جاسىرمادى.
جارىس جەڭىمپازدارى كۋبوك, مەدالدارمەن ماراپاتتالدى. «اlihanrobotics» ونلاين ورتالىعىندا تەگىن وقۋ مۇمكىندىگىن دە سىيلىق ەتىپ تابىستادى. « ۇلى دالا ويىندارىنىڭ» ءابسوليۋتتى چەمپيونى اتاعىن ماعجان جۇماباەۆ اتىنداعى گيمنازيانىڭ كومانداسى جەڭىپ الدى.
قاراعاندى وبلىسى
