سۋرەتتى تۇسىرگەن – ۆالەري بۋگاەۆ
پاۆلودار وبلىسىنداعى اۋىل اكىمدەرىن سايلاۋ ءۇردىسى كەلەر جىلى دا جالعاسادى. وڭىردەگى اۋىلدىق وكرۋگتەردىڭ ۇدەمەلى دامۋى بايقالادى. 355 اۋىلدىق ەلدى مەكەن 126 دەربەس اۋىلدىق بيۋدجەتكە بىرىكتىرىلگەن. ورتاشا العاندا, اۋىلدىق بيۋدجەتتىڭ قارجىلىق قامتاماسىز ەتىلۋى 9 پايىزدى قۇرايدى جانە 90 پايىزعا دەيىن جوعارى تۇرعان بيۋدجەتتەردەن سۋبۆەنتسيامەن, ترانسفەرتتەرمەن وتەلەدى. بيىل وبلىستىق بيۋدجەتتەن 250-گە جۋىق جوبانى ىسكە اسىرۋعا 6 ملرد تەڭگەدەن اسا قاراجات بولىنگەن. ونىڭ يگىلىگىن وبلىستاعى بارلىق اۋىلدىڭ ۇشتەن ءبىرى كوردى.
– بيىل ءوڭىردىڭ 50-دەن اسا اۋىلىنا بارىپ, مەملەكەتتىك باعدارلامالار مەن ۇلتتىق جوبالاردى ىسكە اسىرۋ بويىنشا وكرۋگ اكىمدەرىمەن كەزدەستىم. «قۋاتتى وڭىرلەر – قۋاتتى ەل» – بۇل جاي عانا ۇران ەمەس, ادىلەتتى قازاقستاندى قۇرۋداعى ايقىنداۋشى فورمۋلا. اۋىل اكىمىنىڭ قىزمەتى جۇمىس كۇنىمەن شەكتەلمەيدى, ال حالىقپەن جۇمىس ىستەۋ تەك قابىلداۋ ساعاتتارىنان تۇرمايدى. ءبارىمىزدىڭ الدىمىزدا تۇرعان ورتاق ماقسات – حالىقتىڭ ءومىر ءسۇرۋ ساپاسىن ارتتىرۋ, ءوڭىردى دامىتۋ. بۇل – كۇردەلى ءارى كوپسالالى جۇمىس, – دەيدى ءوڭىر باسشىسى اسايىن بايحانوۆ.
اۋىلداردى دامىتۋ مەن جاڭعىرتۋعا «اۋىل – ەل بەسىگى» مەملەكەتتىك باعدارلاماسى سەپ بولىپ وتىر. بيىل 15 اۋىل قامتىلدى. بۇل – سۋ قۇبىرلارىن, سپورت نىساندارىن, مادەنيەت ۇيلەرىن جوندەۋ, سالۋ, اۋىلداردى اباتتاندىرۋ, اۋىلداردىڭ كىرمە جولدارىنا اسفالت توسەۋ. ال «اۋىل اماناتى» جوباسى بيىل جاڭا كاسىپورىندار اشۋعا, قايتا وڭدەۋ مۇمكىندىكتەرىن كەڭەيتۋگە, مال باسىن كوبەيتۋگە, سونداي-اق 100-دەن اسا جاڭا جۇمىس ورنىن اشۋعا مۇمكىندىك بەردى. كەيىنگى 15 جىلدا العاش رەت بيزنەس پەن مەملەكەتتىڭ ءوزارا ارەكەتتەستىگى اياسىندا حالىقتىڭ الەۋمەتتىك وسال توپتارىنان كەزەكتە تۇرعاندار ءۇشىن 800-دەن اسا پاتەر, ونىڭ ىشىندە وبلىستىڭ 10 اۋدانىندا 313 پاتەر ساتىپ الىندى.
«Amanat» پارتياسى ورتالىق اپپاراتىنىڭ باسشىسى ءمادي وسپانوۆ بۇگىنگى تاڭدا اكىمدەر ەل ءۇمىتى ەكەنىن اتاپ ءوتتى.
– اكىمشىلىك رەفورما ءوز ناتيجەسىن بەرىپ جاتىر. جەرگىلىكتى جەردەگى ماسەلەلەردى شەشۋ ءۇشىن وكىلەتتىكتەر ورتالىق دەڭگەيدەن تومەنگە بەرىلەدى. اۋىل اكىمدەرىن سايلاۋ ساياسي جاڭعىرۋدىڭ جاڭا كەزەڭى, سونداي-اق جۇرگىزىلىپ جاتقان رەفورمالاردىڭ بىرىزدىلىگى مەن تيىمدىلىگىن كورسەتەدى. بۇل دەگەنىمىز, سىزدەردە جەرگىلىكتى تۇرعىنداردان قولداۋ بار ەكەنىن بىلدىرەدى, اۋىلدى باسقارۋدا وزدەرىڭىزدىڭ جەكە مودەلىڭىزدى قۇراسىزدار. كەلەسى جىلى اكىمدەردىڭ سايلاۋى بارلىق قالا مەن اۋداندا وتەدى. سونىمەن قاتار بيۋدجەتتىك ورتالىقسىزداندىرۋ جۇرگىزىلىپ جاتىر. جەرگىلىكتى ءوزىن ءوزى باسقارۋدىڭ قارجىلىق دەربەستىگىن ارتتىرۋ قاجەت. اتاپ ايتقاندا, ۇكىمەتكە جاڭا بيۋدجەت جانە سالىق كودەكستەرىن ازىرلەۋ شەڭبەرىندە اۋىل اكىمدەرىنىڭ بيۋدجەتتى قالىپتاستىرۋ جانە قاراجاتتى جۇمساۋ تەتىگىن قايتا قاراۋ تاپسىرىلدى, – دەدى م.وسپانوۆ.
اتاپ وتەلىك, بيىل ەرتىس-بايان وڭىرىندە 30 اۋىلدىق اكىمى سايلانىپ قويىلدى. ال كەلەر جىلى 33 اۋىلدىڭ اكىمى سايلانادى دەپ كۇتىلىپ وتىر.
پاۆلودار وبلىسى
