سۋرەتتى تۇسىرگەن – الەكساندر مارچەنكو
جارىستىڭ سالتاناتتى اشىلۋ راسىمىنە جەرگىلىكتى بيلىك, زيالى قاۋىم وكىلدەرى ارنايى كەلىپ, قايراتكەردىڭ ەسىمىن زور قۇرمەتپەن ەسكە الدى. بالاپان زيپاتوللا ۇلى سانالى عۇمىرىن قۇقىق قورعاۋ سالاسىنا ارنادى. قاراپايىم تەرگەۋشىدەن تەمىرتاۋ قالاسى پروكۋرورىنىڭ ورىنباسارى قىزمەتىنە دەيىن كوتەرىلدى. ءار جىلدارى وبلىستىق پروكۋراتۋرادا, ادىلەت دەپارتامەنتى باستىعىنىڭ ورىنباسارى, كەيىنىرەك وبلىستا سوتتار اكىمشىسى بولىپ قىزمەت ىستەدى. وبلىس اكىمىنىڭ كەڭەسشىسى لاۋازىمىنا تاعايىندالدى.
– ءتۋرنيردىڭ لايىقتى دەڭگەيدە وتۋىنە لەپتى ۇلەس قوسقان وبلىستىق دەنە شىنىقتىرۋ جانە سپورت باسقارماسى مەن جاستار فۋتبول مەكتەبىنىڭ باسشىلىعىنا, قايراتكەر ازامات, رۋحانيات جاناشىرى ەرعازى قاداش ۇلىنا العىس ايتامىز. جىلدا ب.ابەنوۆتىڭ كوزكورگەن زامانداستارى دا دەمەۋشىلىك كورسەتىپ جاتادى. جۇلدە قورى قوماقتى. وڭىردە شاعىن فۋتبولدى دامىتۋ قاشاندا ماڭىزدى. بيىل ىرىكتەۋدەن وتكەن ۇزدىك كوماندالار كەلدى. مەكتەپ جاسىنداعى جاسوسپىرىمدەرگە بۇل – تىڭ مۇمكىندىك, – دەدى ەلىمىزدىڭ ەڭبەك سىڭىرگەن جاتتىقتىرۋشىسى رامازان ءساتتىباي.
ەكى كۇنگە سوزىلعان جارىستا قاراعاندىنىڭ «قىران» كومانداسى تۋرنير جەڭىمپازى اتاندى. ەكىنشى ورىندى اباي اۋدانىنان كەلگەن فۋتبولشىلار يەلەندى. ءۇشىنشى ورىن قاراعاندىلىق «سكاۋت» كومانداسىنا بۇيىردى.
– جارىستىڭ دەڭگەيى جىل وتكەن سايىن جوعارىلاپ, قاتىسۋشىلار قاتارى كوبەيىپ كەلەدى. بۇل جولى اقمولا, قاراعاندى, ۇلىتاۋ وبلىستارىنىڭ فۋتبولشىلارى قاتىستى. جەڭىمپازدار مەن جۇلدەگەرلەر دەنە شىنىقتىرۋ جانە سپورت باسقارماسىنىڭ كۋبوكتارى, مەدالدارى, گراموتالارىمەن ماراپاتتالدى. بۇعان قوسا بالاپان ابەنوۆتىڭ تۋعان-تۋىستارىنىڭ, دوس-جاراندارىنىڭ دەمەۋشىلىگىمەن اقشالاي سەرتيفيكاتتار تابىستالدى. كەلەسى جىلى بۇل ءتۋرنيردى رەسپۋبليكالىق دەڭگەيدە وتكىزەمىز دەپ وتىرمىز, – دەدى جارىستىڭ باس تورەشىسى بالعاباي نۇرلانوۆ.
تۋرنير ب.ابەنوۆتى ەسكە الۋ عانا ەمەس, ەڭ الدىمەن, جاس سپورتشىلاردى قولداۋدىڭ وزگەشە ۇلگىسى. ءداستۇرلى دوپ دوداسى بالالاردىڭ فۋتبولعا دەگەن قىزىعۋشىلىعىن ارتتىرىپ, جاس جەتكىنشەكتەرگە ىنتا-جىگەر سىيلايدى.
قاراعاندى وبلىسى
