زەردەلى جەتكىنشەكتىڭ جوباسى كومىرگە, وتىنعا جانە ەلەكتر ەنەرگياسىنا تاۋەلدىلىكتى ازايتىپ, ەكولوگياعا زياندى اسەردى تومەندەتەدى. بۇل ءۇشىن ول الدىمەن كۇن كوللەكتورىنىڭ سىزباسىن ازىرلەپ, بولشەكتەردەن قوندىرعىنى قۇراستىرۋدان باستاعان.
«كوللەكتوردى قۇراستىرۋ كەزىندە اعاش كاركاس پەن پەنوپلەكس جىلۋ يزولياتسياسىن قولداندىم. وسىلايشا, جۇيەنىڭ قوس قاباتتى شىنى ارقىلى گەرمەتيكالىق تىعىزدىعىن قالىپتاستىردىم. جىلۋ اككۋمۋلياتورى رەتىندە ارنايى ىدىستى قولدانا وتىرىپ, تيىمدىلىگىن سىناقتان وتكىزدىم. 0,33 م² كولەمىندەگى كوللەكتور قۇرىلعىسى 30°C تەمپەراتۋراعا دەيىن قىزۋ بەرىپ, كۇنى بويى 2 142 000 دج ەنەرگيا جيناي الاتىنىن كورسەتتى. جوبانى ىسكە اسىرۋ ارقىلى تۋعان جەرىمنىڭ ەكولوگياسىن جاقسارتۋعا ۇلەسىمدى قوسقىم كەلەدى», دەيدى جاس ونەرتاپقىش.
وقۋشىنىڭ ايتۋىنشا, كۇن كوللەكتورى ارقىلى تۇرمىستىق عيماراتتاردى جىلىتۋ مەن اۋىل شارۋاشىلىعىنا قاجەت سۋدى قامتاماسىز ەتۋگە بولادى. اۋىل شارۋاشىلىعى ءۇشىن 30–90°C ارالىعىنداعى سۋ قاجەت ەكەنىن ەسكەرگەن ول بۇل جۇيەنىڭ ايماق جاعدايىن جاقسارتۋعا سەپتىگىن تيگىزەتىنىنە سەنىمدى.
قازىر اتالعان قۇرىلعى سىناقتان ءوتتى. ونىڭ ەسەپتەۋىنشە, 23 م² اۋماقتى قامتيتىن كۇن كوللەكتورى ارقىلى ورتاشا ءۇي ءىشىن جىلىتىپ, ىستىق سۋمەن قامتۋعا بولادى. ءبىر جاعىنان, مۇنداي قۇرىلعىنى ءۇيدىڭ توبەسىنە ورنالاستىرۋ وتە ءتيىمدى.
