جاڭا بۋىن ماماندارىن دايارلاۋعا ارنالعان زەرتحانا بانك جانە قارجى سالاسىندا تەوريالىق ءبىلىم مەن تاجىريبە الۋعا مۇمكىندىك بەرەتىن كاسىبي الاڭعا اينالماق.
ءال-فارابي اتىنداعى قازاق ۇلتتىق ۋنيۆەرسيتەتىنىڭ ءبىرىنشى پرورەكتورى ەركىن دۇيسەنوۆ ارىپتەستىك نەگىزدە اشىلعان زەرتحانا تۋرالى ايتا كەلىپ: «بۇل – ءوز كەزەگىندە ستۋدەنت جاستاردىڭ ۋنيۆەرسيتەتتە الىپ جاتقان تەوريالىق ءبىلىمىن پراكتيكامەن ۇشتاستىرۋعا بەرىلگەن بىرەگەي مۇمكىندىك. زەرتحانادا ستۋدەنتتەر قارجى سالاسىندا ءبىلىم مەن ءارتۇرلى داعدىنى مەڭگەرىپ, بولاشاقتا تابىستى جۇمىس ىستەيدى دەپ سەنىمدەمىن. سوندىقتان «حالىق بانكىمەن» ارىپتەستىگىمىز ءارى قاراي نىعايا بەرەدى», دەدى پرورەكتور.
ءوز كەزەگىندە «قازاقستان حالىق بانكى» اق باسقارما توراعاسىنىڭ ورىنباسارى داۋرەن سارتاەۆ: «قازاقستاننىڭ جەتەكشى جوعارى وقۋ ورىندارىنىڭ ءبىرى – ءال-فارابي اتىنداعى قازۇۋ-دا ستۋدەنتتەرگە ارنالعان زەرتحانامىزدىڭ اشىلۋى – ءبىز ءۇشىن ۇلكەن مارتەبە. بۇگىندە اقپاراتتىق تەحنولوگيالار فاكۋلتەتىنىڭ تۇلەكتەرى ءارتۇرلى سالادا قىزمەت ەتىپ, ءوز بىلىكتىلىكتەرىن كورسەتىپ وتىر. وعان دالەل – ءبىزدىڭ «حالىق بانكتىڭ HR» ديرەكتورى ينديرا اشيروۆا وسى فاكۋلتەتتىڭ تۇلەگى, ءوز سالاسىنىڭ كاسىبي مامانى. سوندىقتان دا فاكۋلتەت ماتەماتيكا, قارجى, IT سالاسىنىڭ مىقتى ىرگەتاسى قالانعان ۇلكەن مەكتەپ بولىپ قالا بەرەدى», دەدى ول.
بۇگىندە «قازاقستان حالىق بانكى» اق ءال-فارابي اتىنداعى قازۇۋ-دىڭ نەگىزگى سەرىكتەسى عانا ەمەس, سونىمەن قاتار باكالاۆريات, ماگيستراتۋرا جانە دوكتورانتۋرا دەڭگەيلەرىندە «دەرەكتەر تۋرالى عىلىم/Data Science» ءبىلىم بەرۋ باعدارلاماسىنىڭ بىرلەسكەن قۇراستىرۋشىسى جانە جۇمىس بەرۋشى سانالادى. بۇل ءادىس وقۋ باعدارلاماسى مەن كاسىبي ستاندارتتاردىڭ ۇيلەسىمدىلىگىن قامتاماسىز ەتىپ, تۇلەكتەرگە مانساپتىق قادامدارعا جول اشىپ, دەرەكتەر بازاسىمەن جۇمىس ىستەۋگە مۇمكىندىك بەرەدى.
«Halyk Academy» باعدارلاماسى اياسىندا ستۋدەنتتەرگە بانك ساراپشىلارىنىڭ دارىستەرى, اشىق ەسىك كۇندەرى, سونداي-اق يندۋستريانىڭ زاماناۋي تالاپتارىن ەسكەرە وتىرىپ, ازىرلەنگەن بانك ماماندىقتارى بويىنشا كۋرستار وتەتىن بولادى. سونىمەن قاتار اكادەميا اياسىندا عىلىمي زەرتتەۋلەر مەن تەحنولوگيالىق ازىرلەمەلەردى (R&D) دامىتۋ جوسپارلانىپ وتىر. بۇل ستۋدەنتتەر مەن وقىتۋشىلارعا قارجى سالاسىنداعى يننوۆاتسيالاردىڭ دامۋىنا ىقپال ەتەتىن وزەكتى جوبالارمەن جۇمىس ىستەۋگە مۇمكىندىك بەرەدى.
الماتى
