كوللاجدى جاساعان – الماس ماناپ, «EQ»
وبلىستىق ءماسليحاتتىڭ دەپۋتاتى ماحانبەت امانگەلدىنىڭ ايتۋىنشا, پاۆلودارداعى №1 قالالىق اۋرۋحانانىڭ جىل باسىنداعى بەرەشەگى 1 ميلليارد 235 ميلليون تەڭگە بولسا, توعىز اي ىشىندە وعان تاعى 700 ميلليون تەڭگە شىعىن قوسىلعان.
– وبلىستاعى ەمدەۋ ۇيىمدارىنىڭ قارىزدارىنا قاتىستى ماسەلە بۇل عانا ەمەس. مىسالعا, بىلتىر ەكىباستۇز قالالىق اۋرۋحاناسىنىڭ كرەديتورلىق بەرەشەگى 700 ميلليون تەڭگەنى قۇرادى. قارىزدىڭ 50 پايىزى كوممۋنالدىق قىزمەتتەردەن شىققان. الەۋمەتتىك ساقتاندىرۋ قورى بۇل جاعدايعا ارالاسىپ, اۋرۋحانا قولدانىستاعى تاريفتەن ءۇش ەسە ارتىق تولەيتىنىن انىقتادى. قوردىڭ تالقىلاۋىنان كەيىن كوممۋنالدىق قىزمەت 2,5 ەسە تومەندەدى. وعان قوسىمشا اۋرۋحانانى قارجىلاندىرۋ 415 ميلليون تەڭگەگە ۇلعايتىلدى. ناتيجەسىندە, ۇيىمنىڭ قارىزى قىسقارۋى كەرەك ەدى. وكىنىشكە قاراي, اتالعان مەكەمەنىڭ سىرتقى بەرەشەگى 968 ميلليون تەڭگەگە دەيىن وسكەن, – دەيدى م.امانگەلدى.
دۇنيەجۇزىلىك دەنساۋلىق ساقتاۋ ۇيىمىنىڭ ستاندارتتارىنا سايكەس, ەمدەۋ مەكەمەلەرىندەگى ەڭبەكاقى مەن سالىقتاردىڭ تولەمى جالپى بيۋدجەتتىڭ 65 پايىزىنان اسپاۋى كەرەك. جوعارىدا اتالعان 3 ەمدەۋ ۇيىمىندا تەرىس ديناميكا قالىپتاسقانى بايقالادى. ونىڭ ۇستىنە سوڭعى ۋاقىتتا قالالىق اۋرۋحانالار مەديتسينالىق قۇرال-جابدىقتاردى كوپتەپ ساتىپ الىپ جاتىر, بۇل دا قارجىلىق جاعدايدارىن قيىنداتۋ ۇستىندە. وسى ورايدا ايماقتاعى ع.سۇلتانوۆ اتىنداعى وبلىستىق اۋرۋحانا مەن كارديولوگيالىق ورتالىقتا ەشقانداي بەرەشەكتىڭ جوقتىعىن وڭ مىسال رەتىندە كەلتىرۋگە بولادى. مۇندا ەڭبەكاقى قورى جالپى بيۋدجەتتىڭ 55 پايىزىن قۇراپ وتىر.
«مەديتسينالىق جانە فارماتسەۆتيكالىق باقىلاۋ كوميتەتى دەپارتامەنتىنىڭ مالىمەتىنشە, ەمدەلۋشىلەردەن تۇسەتىن شاعىمداردىڭ كوپشىلىگى جوعارىدا اتالعان ءۇش اۋرۋحاناعا قاتىستى. ادەتتەگىدەي, №1 قالالىق اۋرۋحانا تۇرعىندار نارازىلىعى جونىنەن كوش باستاپ تۇر. وبلىس باسشىلىعىنا №1 پاۆلودار قالالىق اۋرۋحانانىڭ باس دارىگەرىن, ەكىباستۇز قالاسىنىڭ باس دارىگەرىن لاۋازىمدارىنان بوساتۋدى, ال №3 پاۆلودار قالالىق اۋرۋحاناسىنىڭ باس دارىگەرىنە تارتىپتىك سيپاتتاعى شارالار قولدانۋدى ۇسىنامىز», دەيدى دەپۋتات.
ال وڭىرلىك دەنساۋلىق ساقتاۋ باسقارماسىنىڭ باسشىسى ءانۋار بۇيراشەۆتىڭ ايتۋىنشا, اتالعان مەديتسينالىق ۇيىمداردىڭ كرەديتورلىق بەرەشەگىنەن بولەك, دەبيتورلىق بەرەشەگى دە بار.
«توعىز ايدىڭ قورىتىندىسىمەن ءبىز بۇل ماسەلەنى تارتىپتىك كوميسسياعا شىعارامىز. باس دارىگەرلەرگە قاتىستى ءتيىستى شارالاردى قولدانامىز», دەدى باسقارما باسشىسى.
پاۆلودار وبلىسى
