فوتو: اشىق دەرەككوز
وقۋ-اعارتۋ مينيسترلىگىنىڭ مالىمەتىنشە, جوندەۋ جۇمىسى بارىسىندا شاتىرلار اۋىستىرىلىپ, عيماراتتار مەن تەرەزەلەردىڭ قاسبەتتەرى جاڭارتىلعان. سونداي-اق ىشكى ينجەنەرلىك كوممۋنيكاتسيالار سۋ قۇبىرى, كارىز, جىلىتۋ جۇيەلەرى جانە ەلەكتر جەلىلەرى جوندەلىپ, سەيسميكالىق بەلسەندىلىگى جوعارى وڭىرلەردەگى مەكتەپتەردى سەيسميكالىق كۇشەيتۋگە ەرەكشە نازار اۋدارىلعان.
ەسكە سالا كەتەيىك, بۇعان دەيىن مينيسترلىك بىرنەشە رەت جوندەلىپ جاتقان مەكتەپتەرگە وقۋ-تاربيە پروتسەسىنىڭ بۇزىلۋىنا جول بەرمەۋ جانە ونى قاۋىپسىز ۇيىمداستىرۋ بويىنشا مونيتورينگ جۇرگىزگەن بولاتىن.
«بۇگىنگى تاڭدا كۇردەلى جوندەۋمەن قاتار, شاعىن قالالار, اۋدان ورتالىقتارى مەن اۋىلداردا جەتى باعىت بويىنشا زاماناۋي ستاندارتتارعا ساي 1000 مەكتەپتى جاڭعىرتۋ جۇمىستارى جۇرگىزىلىپ جاتىر. جاڭعىرتۋ بالالارعا وقۋ مەن تاربيەلەۋ ءۇشىن قولايلى جاعداي جاساۋ, ماتەريالدىق-تەحنيكالىق جاراقتاندىرۋدى نىعايتۋ جانە وقۋ پروتسەسىنىڭ ساپاسىن ارتتىرۋ ارقىلى قالالىق جانە اۋىلدىق مەكتەپتەر اراسىنداعى ءبىلىم بەرۋ ساپاسىنداعى الشاقتىقتى ازايتۋعا باعىتتالعان. بۇل جۇمىستىڭ اياسىندا كۇردەلى جوندەۋ, پاندىك كابينەتتەرمەن جابدىقتاۋ, مەكتەپ جيھازدارىن جاڭارتۋ, كىتاپحانالاردى, اسحانالاردى جانە قاۋىپسىزدىك شارتتارىن جاقسارتۋ جۇزەگە اسىرىلۋدا. بۇگىنگى تاڭدا 780 اۋىلدىق مەكتەپتەگى جاڭعىرتۋ جۇمىستارى اياقتالدى», دەلىنگەن حابارلامادا.
سونىمەن قاتار, بيىل 1383 زاماناۋي پاندىك كابينەت ساتىپ الىنىپ, ونىڭ 843-ءى ورناتىلعان.
