فوتو: ۇكىمەت
ساپار اياسىندا قازاقستان پرەزيدەنتى قاسىم-جومارت توقاەۆ پەن قحر توراعاسى سي تسزينپين اراسىنداعى ەكىجاقتى تاۋار اينالىمى كولەمىن وتكەن جىلعى $41 ملرد دەڭگەيىندەگى تاريحي رەكوردتان ەكى ەسەگە ارتتىرۋ جونىندەگى ۋاعدالاستىقتاردى جۇزەگە اسىرۋ كوزدەلىپ وتىر.
دوڭگەلەك ۇستەلگە مەتاللۋرگيا, ەنەرگەتيكا, ماشينا جاساۋ جانە اۆتوموبيل ونەركاسىبى, كومىر حيمياسى, اگروونەركاسىپ كەشەنى, فارماتسەۆتيكا جانە باسقا دا سالالار بويىنشا كوشباسشى كومپانيانىڭ وكىلدەرى قاتىستى.
قازاقستان-قىتايدىڭ بىرلەسكەن ءىرى جوبالارى قاتارىندا Camc Engineering كومپانياسىمەن بىرلەسىپ كالتسيلەندىرىلگەن سودا ءوندىرۋ زاۋىتىن, Tianjin Cement Industry Design and Research Institute-پەن «ساستوبە» حيميالىق كەشەنىن, Yunnan Industrial Explosive Group-پەن جارىلعىش زاتتار وندىرەتىن زاۋىت سالۋ جوباسى بار.
«قازاقستان ۇكىمەتى ارىپتەستىكتى كەڭەيتۋگە جانە مەملەكەتتەرىمىز اراسىندا بەرىك كوپىر قۇرۋعا دايىن. ءبىز ينۆەستورلارعا قولداۋ كورسەتىپ, بيزنەسكە قولايلى جاعداي جاسايمىز جانە ءار جوبانىڭ تابىستى بولۋىنا ىقپال ەتەمىز. ءبىزدىڭ بىرلەسكەن كۇش-جىگەرىمىزدىڭ ارقاسىندا جاڭا ينۆەستيتسيالىق باستامالار ەكونوميكانىڭ ناقتى سەكتورىن دامىتۋعا, ونى ارتاراپتاندىرۋعا جانە ازاماتتارىمىزدىڭ ءومىر ءسۇرۋ ساپاسىن جاقسارتۋعا قۋاتتى سەرپىن بەرەتىنىنە سەنىمدىمىن», دەدى ولجاس بەكتەنوۆ.
ديالوگ بارىسىندا قىتايدىڭ جەتەكشى كومپانيا وكىلدەرى قازاقستانعا ستراتەگيالىق جوبالاردى ىسكە اسىرۋداعى سەنىمدى سەرىكتەس رەتىندە قىزىعۋشىلىق تانىتتى.
كەزدەسۋ ناتيجەسىندە جالپى سوماسى $2,5 ملرد بولاتىن 8 كوممەرتسيالىق كەلىسىمگە قول قويىلدى.
ۇكىمەت ءباسپاسوز قىزمەتىنىڭ مالىمەتىنشە, بۇگىن مىناداي كەلىسىمدەرگە قول جەتكىزىلگەن:
- «سامۇرىق-قازىنا ينۆەست» جشس, «QAZAQGAZ AIMAQ» اق جانە «Goldcard Smart Group Co., Ltd» اراسىنداعى $8 ملن سوماسىنا زياتكەرلىك جۇيەلەردى ەنگىزۋ سالاسىنداعى ىنتىماقتاستىق تۋرالى كەلىسىم. جوبا الماتى قالاسىنداعى «الاتاۋ» يتپ اەا اۋماعىندا كومپونەنتتەردىڭ لوكاليزاتسياسىن ەسكەرە وتىرىپ, GoldCard كومپانياسى جەتكىزەتىن قۇرامداس بولشەكتەردەن گاز ەسەپتەگىشتەرىن شاعىن توراپتى قۇراستىرۋدى كوزدەيدى;
- «Qarmet» اق مەن Zhengzhou Coal Mining Machinery Grouop اراسىنداعى كومىر ونەركاسىبىنە ارنالعان جابدىقتار ءوندىرۋ سالاسىنداعى «Qarmet» اق كومىر دەپارتامەنتىنىڭ شاحتالارى ءۇشىن $70 ملن سوماسىنا مەحانيكالاندىرىلعان كەشەندەر ساتىپ الۋ تۋرالى كەلىسىم;
- قر ۇلتتىق ەكونوميكا مينيسترلىگى, قىتايدىڭ Silk Road Fund Co.Ltd. جانە Kazakhstan Investment Development Fund (KIDF) Management Company Ltd. مەملەكەتتىك ينۆەستيتسيالىق قورى اراسىندا قۇنى $552 ملن ينۆەستيتسيالىق ىنتىماقتاستىق نەگىزدەرىن بەلگىلەۋ جونىندەگى ءوزارا تۇسىنىستىك تۋرالى مەموراندۋم;
- «Qarmet» اق مەن Xinxing Ductile Iron Pipes Co.,LTD اراسىنداعى $161 ملن سوماسىنا قازاقستان رەسپۋبليكاسىندا قۋاتى جىلىنا 200 مىڭ توننا سفەرالىق گرافيتى بار بەرىكتىگى جوعارى شويىننان جاسالعان قۇبىرلار شىعاراتىن زاۋىت سالۋ تۋرالى كەلىسىم. ءونىم قازاقستاندا تۇرعىن ءۇي-كوممۋنالدىق جۇيەسىنىڭ نىساندارىن سالۋ, جاڭعىرتۋ, رەكونسترۋكتسيالاۋ, كەڭەيتۋ جانە جاڭارتۋ جونىندەگى جوبالارعا ارنالعان;
- «Qarmet» اق مەن China Metallurgical Group Corporation اراسىنداعى $1 ملرد سوماسىنا تاۋ-كەن جانە مەتاللۋرگيا سالالارىندا ۇزاق مەرزىمدى جانە كەشەندى ىنتىماقتاستىق ورناتۋ تۋرالى كەلىسىم;
- «Qarmet» اق مەن ACRE Coking & Refractory Engineering Consulting Corporation اراسىنداعى $649 ملن سوماسىنا كوكس-حيميا ءوندىرىسىن جاڭعىرتۋ جانە كومىر حيمياسىن دامىتۋ جونىندەگى ستراتەگيالىق جوبانى ىسكە اسىرۋ تۋرالى كەلىسىم;
- «Qarmet» اق مەن Nanjing Fiberglass Research & Design اراسىنداعى $30 ملن سوماسىنا تەمىرتاۋ قالاسىندا قۋاتى جىلىنا 100 مىڭ توننا دايىن ءونىم بولاتىن دومنا قوجدارىنان مينەرالدى جىلىتقىشتار وندىرەتىن فابريكا سالۋ جانە 200 جاڭا جۇمىس ورنىن اشۋ تۋرالى كەلىسىم;
- «Saran Machinery» جشس مەن Sinotruk International اراسىنداعى $70 ملن سوماسىنا KD ديستريبۋتسيا جانە قۇراستىرۋ سالاسىنداعى, تەحنولوگيانى ليتسەنزيالاۋ جانە تاۋار بەلگىلەرىن پايدالانۋ بويىنشا ىنتىماقتاستىق تۋرالى كەلىسىمدەر پاكەتى. ولاردىڭ ىشىندە ساران قالاسىندا جۇك جانە ارنايى تەحنيكا ءوندىرۋ جونىندەگى جوبانى ىسكە اسىرۋ تۋرالى مەموراندۋم بار, ونىڭ شەڭبەرىندە پەرسپەكتيۆادا 1 مىڭعا جۋىق جاڭا جۇمىس ورنىن اشۋ جوسپارلانىپ وتىر.
ولجاس بەكتەنوۆ شانحاي قالاسىندا چجانتسزيان عىلىمي قالاسىنىڭ «روبوتتار القابىنا» بارىپ, دەنساۋلىق ساقتاۋ, ونەركاسىپ جانە قىزمەت كورسەتۋ سالالارىنداعى قىتاي روبوتوتەحنيكا يندۋسترياسىنىڭ سوڭعى جەتىستىكتەرىمەن تانىستى.
