فوتو: DenMinPR
دەنساۋلىق ساقتاۋ مينيسترلىگىنىڭ ءباسپاسوز قىزمەتىنىڭ ءمالىم ەتۋىنشە جىل باسىنان بەرى بارلىعى 17 جاعداي تىركەلگەن.
ءسىبىر جاراسى – بۇل اۋىل شارۋاشىلىعى جانۋارلارىنا جانە جابايى اڭدارعا, سونداي-اق ادامدارعا اسەر ەتەتىن اسا قاۋىپتى ينفەكتسيالىق اۋرۋ. اۋرۋ كوبىنەسە اۋىر اعىممەن وتەدى جانە ولىمگە اكەلۋى مۇمكىن. ءسىبىر جاراسىنىڭ قوزدىرعىشى – توپىراقتا جىلدار بويى ساقتالاتىن ءسىبىر جاراسى ميكروبى. ينفەكتسيا اۋرۋ جانۋارلارمەن, ولاردىڭ ەتىمەن جانە مال ونىمدەرىمەن, سونداي-اق توپىراق ارقىلى بايلانىس بولعان كەزدە تۋىندايدى.
«اۋرۋدىڭ ينكۋباتسيالىق كەزەڭى بىرنەشە ساعاتتان 14 كۇنگە دەيىن, بىراق كوبىنەسە سيمپتومدار ينفەكتسيادان كەيىن 3-6 كۇننەن كەيىن پايدا بولادى. ولارعا جالپى السىزدىك, جوعارى تەمپەراتۋرا, ليمفا تۇيىندەرىنىڭ ءىسىنۋى جانە جۇرەك سوعۋىنىڭ جوعارىلاۋى جاتادى. ادام ءسىبىر جاراسى اۋرۋىنا شالدىققان جانۋارلاردان جۇقتىرۋى مۇمكىن. ولارعا ءىرى قارا, جىلقى, ەسەك, قوي, ەشكى, بۇعى, تۇيە جاتادى», دەپ ءتۇسىندىردى ۆەدومستۆو.
ينفەكتسيا جانۋارلارعا كۇتىم جاساۋ, سويۋ, ەت وڭدەۋ كەزىندە, سونداي-اق مال شارۋاشىلىعى ونىمدەرىمەن – تەرى, مەح بۇيىمدارى, ءجۇن, قىلشىقتارمەن جۇمىس ىستەگەن كەزدە جۇعۋى مۇمكىن. بۇنداي جاعدايدا سپورالار جىلدار بويى, سونىڭ ىشىندە توپىراقتا دا ساقتالادى. جەرمەن بايلانىس ارقىلى سپورالار تەرىدەگى ميكروجاراقاتتارعا تۇسەدى. بۇل ءسىبىر جاراسىنىڭ تەرى ءتۇرىنىڭ دامۋىنا اكەلەدى. بۇل – ناۋقاستاردىڭ اراسىندا ەڭ كوپ تارالعان ءتۇرى.
ءسىبىر جاراسىنىڭ الدىن الۋ ءۇشىن تومەندە كورسەتىلگەندى ەسكەرۋ قاجەت:
- جەكە گيگيەنا شارالارىن ساقتاۋ;
- جانۋارلاردى ۆاكتسيناتسيالاۋ;
- اۋرۋ (ولگەن) جانۋارلاردى ءوز بەتىنشە سويماۋ;
- بەلگىسىز جەرلەردە ساۋدا جاسايتىن ادامداردان ەت ساتىپ الماۋ;
- ساتۋشىدان «ۆەتەرينارلىق قورىتىندى» تالاپ ەتۋ.
ەت كومبيناتتارىنىڭ قىزمەتكەرلەرىنە, ۆەتەريناريالىق قىزمەتكەرلەرگە, ءسىبىر جاراسىنىڭ قوزدىرعىشىمەن جۇمىس ىستەيتىن زەرتحانالاردىڭ قىزمەتكەرلەرىنە ۆاكتسينامەن پروفيلاكتيكالىق ەگۋلەر الۋ قاجەت.
