باعا مەن ساپا ۇيلەسكەن
كاسىپورىن «Artel» برەندىمەن تەلەديدار, ەلەكترلى سۋ جىلىتقىش, شاڭسورعىش, ءاسۇي توقپەشى, اۋاسورعىش, كىر جۋاتىن ماشينا, جەلدەتكىش سەكىلدى تۇرمىستىق تەحنيكا تۇرلەرىن شىعارىپ جاتىر. بۇگىننىڭ وزىندە 113 مىڭ تەحنيكا ساۋدالانىپ ۇلگەرگەن. كاسىپورىن ونىمدەردى ساۋدا جەلىلەرى مەن ينتەرنەت ارقىلى وتكىزىپ وتىر. اتاپ ايتساق, تۇرمىسقا قاجەتتى تەحنيكا تۇرلەرى «Sulpak», «Technodom.kz», «Evrika», «Mechta.kz», «Alser», «Darmart Astana» سەكىلدى ءىرى ساۋدا نۇكتەلەرىندە ساتىلىپ جاتىر.
– كومپانيا – ەلىمىزدەگى تۇرمىستىق تەحنيكا شىعاراتىن جالعىز ءوندىرىس ورنى. الدىمىزدا ۇلكەن مەجە بار. قۇرىلىستى اياقتاعانىمىزعا كوپ بولا قويعان جوق. ەسكىرگەن عيماراتتى قايتا قالپىنا كەلتىرۋگە زاۋىتتى زاماناۋي قاجەتتى جابدىقتارمەن قامتاماسىز ەتۋگە كوپ كۇش جۇمسادىق. ساۋداعا ەندى عانا كىرىستىك. العاشقى كورسەتكىشىمىز جامان ەمەس. باستىسى, نارىقتى باعامەن جاۋلاعالى تۇرمىز. ءبىزدىڭ ءونىم قۇنى سىرتتان اكەلەتىن تۇرمىستىق بۇيىمدارمەن سالىستىرعاندا الدەقايدا تومەن. ساپاسىنا دا باسا ءمان بەرەمىز. ءىرى ساۋدا نۇكتەلەرىنەن بولەك, ينتەرنەت ارقىلى دا ساۋدانى كۇشەيتىپ جاتىرمىز. اسىرەسە «Kaspi.kz» قوسىمشاسى سەكىلدى ونلاين ساۋدا پلاتفورمالارىن ءتيىمدى پايدالانامىز. ساتۋ ءبولىمى مەنەدجەرلەرىنىڭ بىلىكتىلىگى ارقاسىندا ونىمدەردى تمد ەلدەرىنە دە ەكسپورتتايمىز. بۇل – كومپانيانىڭ العا قويعان باستى ماقساتتارىنىڭ ءبىرى. ەگەر شەتەل نارىعىنا شىقساق, وندا كاسىپورنىمىز مول تابىسقا كەنەلىپ, مىڭداعان جۇمىس ورنىن اشۋعا مۇمكىندىك بولادى. وسىلايشا, ءوڭىر ەكونوميكاسىن وركەندەتىپ عانا قويماي, ەل قازىناسىن ەسەلەيمىز, – دەيدى «Silk Road Electronics» جشس ديرەكتورى الەكساندر كريتسكي.
ىرگەسى ەندى بەكىگەن كاسىپورىن الپاۋىتقا اينالعان جاعدايدا جىلىنا 1 ملن 100 مىڭ تۇرمىستىق تەحنيكانى نارىققا شىعارادى. سايكەسىنشە, ەڭبەك كۇشىنىڭ قاجەتتىلىگى ارتىپ, 1 500 جاڭا جۇمىس ورنى اشىلادى. بۇعان كومپانيا باسشىلىعى تاباندىلىقپەن, ەڭبەكپەن قول جەتكىزەمىز دەپ وتىر.
جۇمىسشى بىلىكتىلىگى – اۋەلگى مىندەت
كاسىپورىنداعى جۇمىسقا جۇمىسشىلار الدىمەن ساران, شاحتينسك, قاراعاندى قالاسىنان قابىلدانىپتى. قازىردىڭ وزىندە 250-دەن اسا ادام تۇراقتى جۇمىس ىستەيدى. قىزمەتكەرلەردى وقىتىپ, بىلىكتىلىگىن جەتىلدىرۋگە كومپانيانىڭ وزبەكستانداعى سەرىكتەسى قولداۋ كورسەتىپتى. العاشقى 15 ادام تاشكەنتتە تاعىلىمدامادان وتكەن. بۇل ءۇردىس ۇزىلمەي, ءالى دە جالعاسىپ كەلەدى. وزبەكستاننان بىلىكتى ماماندار سارانعا ارنايى كەلىپ تە وقىتىپ جاتىر.
العاشقىلاردىڭ ءبىرى بولىپ تاشكەنتتەگى تاعىلىمدامادان ءوتىپ, جۇمىسقا ورنالاسقان ميراس سايىن – قازىر كاسىپورىننىڭ بىلدەي ءبىر جاۋاپتى مامانى.
– ساران قالاسىندا بوس جۇمىس جارمەڭكەسى وتكەن بولاتىن. ول كەزدە كاسىپورىن ءالى اشىلا قويماعان. سول جەردەن ۇسىنىس ءتۇستى. كەلىستىم دە تاشكەنتتەگى تۇرمىستىق تەحنيكا شىعاراتىن جەتى بىردەي زاۋىتتان تاجىريبە تولىقتىرىپ كەلدىم. از ۋاقىت ىشىندە ءاسۇي پەشىن قۇراستىراتىن تسەحتى باسقارۋدى سەنىپ تاپسىردى. ءبىزدىڭ تسەحتا 25 جۇمىسكەر بار. ءاسۇي پەشىنىڭ «Artel», «Shivaki», «Arg», «Apetito» برەندىمەن 62 ءتۇرىن قۇراستىرامىز. كۇنىنە 350–400 پەش ازىرلەيمىز. ولاردى تولىق قۇراستىرىپ, تەحنيكالىق تەكسەرىستەن ءجىتى وتكىزىپ, ەش كەدەرگىسىز جۇمىس ىستەيتىنىنە كوز جەتكىزىپ, قاپتاپ, قۇجاتىن سايكەستەندىرىپ, قويماعا جونەلتەمىز, – دەيدى م.سايىن.
ساراندىق ماريا رۋل باس اسپازدىڭ كومەكشىسى بولىپ جۇمىسقا تۇرادى. ول تسەحتىڭ قايناعان جۇمىسىنا كىرىسىپ كەتەتىنىن سول ساتتە بىلمەگەن ەدى. ىسكەرلىگىمەن كوزگە تۇسكەن ماريانى كادر بولىمىندەگى ماماندار كەڭسە جۇمىسىنا تارتادى. كەيىن تسەح جۇمىسىنا قىزىعىپ, سوندا اۋىسادى.
– قازىر شاڭسورعىش تسەحىندا جۇمىس اتقارامىن. ءبىزدىڭ ۋچاسكەدە 20–25 مامان جۇمىس ىستەيدى. كۇنىنە 300-ءدىڭ ۇستىندە شاڭسورعىش شىعارامىز. «Artel», «Vesta», «Shivaki» برەندىمەن تەحنيكانىڭ ءتورت ءتۇرىن قۇراستىرامىز. مەنىڭ مىندەتىم – دايىن شاڭسورعىشتى ابدەن تەكسەرىپ, قۇجاتىن راسىمدەپ, بازاعا ەنگىزۋ. دەگەنمەن قۇراستىرۋ جۇمىسىن دا جەتىك بىلەمىن, – دەيدى ماريا الەكسەەۆنا.
بوس جۇمىس ورنى بار
كاسىپورىن جۇمىسشىلارعا بارلىق جاعدايدى جاساپ وتىر. جوعارى جالاقى, ءۇي مەن جۇمىس اراسىندا اۆتوبۋسپەن تاسىمالداۋ, تەگىن تۇسكى اس, تولىق الەۋمەتتىك پاكەت ۇسىنادى. تاجىريبە تولىقتىرىپ, ءبىلىم ارتتىرامىن دەگەندەردى ارنايى وقىتادى. وندا دا كۇنبە-كۇن جالاقىسى ءجۇرىپ جاتادى. زاۋىتتا ءالى دە بوس جۇمىس ورىندارى بار.
«Silk Road Electronics» جشس رەسمي سايتىندا جۇك تاسۋشى, لوگيستيكا مامانى, ەلەكترمونتەر, جۇك كولىگىن جۇرگىزۋشى, جۇك تيەگىش كولىكتىڭ جۇرگىزۋشىسى, امبەباپ جۇمىسشى, تازالىق مامانى, سلەسار, گاز قازاندىعىنىڭ وپەراتورى, سانتەحنيك, مەنەدجەر, مەترولوگ, تەحنيكالىق باقىلاۋشى, مەددارىگەر سەكىلدى بوس ورىنعا حابارلاندىرۋ تۇر. جۇمىس جونىمەن كومپانيانىڭ رەسمي سايتىندا كورسەتىلگەن مەكەنجايعا بارۋعا, سوندا كورسەتىلگەن تەلەفون نومىرىنە حابارلاسۋعا بولادى. سونداي-اق الەۋمەتتىك جەلىدەگى پاراقشالارى ارقىلى بايلانىس ورناتۋ مۇمكىندىگى دە بار.
كاسىپورىن كەلەشەگى
كومپانيا جاقىن كۇندەرى كوبىك پلاستيك وندىرەتىن زاۋىت اشۋدى, شتامپتاۋ ۋچاسكەسىنىڭ الەۋەتىن تولىق پايدالانۋدى جوسپارلايدى. بۇل ارقىلى ءوندىرىستى كەڭەيتىپ, تەحنيكا قۇراستىرۋ تيىمدىلىگىن ارتتىرادى.
– ءبىزدىڭ كومپانيا الەمدىك نارىققا ەنەرگياعا ءتيىمدى, پايدالانۋعا وتە ىڭعايلى تۇرمىستىق تەحنيكانى شىعارىپ جاتىر. قىزمەتكەرلەرىمىز ءوندىرىس كەزىندە تەحنيكالىق يننوۆاتسيالاردىڭ يگىلىگىن كادەگە جاراتۋعا ۇمتىلادى. ءونىم كوپشىلىك تالعامىنان شىعىپ, كوزگە تارتىمدى كورىنۋ ءۇشىن ديزاينىنا دا ەرەكشە ءمان بەرەمىز. الەمدىك برەند قالىپتاستىرۋ ماقساتىندا تاجىريبەمىزدى ءاردايىم تولىقتىرىپ, ىزدەنىستەن قول ۇزبەيمىز. ءبىزدىڭ كومپانيانى كوپ جۇمىس كۇتىپ تۇر. وتاندىق برەندتى كۇنى ەرتەڭ الەم مويىنداپ جاتسا, وندا قاراعاندىنىڭ دا, ساراننىڭ دا ءوندىرىسى ۇلعايادى, – دەيدى سەرىكتەستىكتىڭ قوعام جانە مەملەكەتتىك مەكەمەلەرمەن بايلانىس باسقارماسىنىڭ جەتەكشىسى ديليارا تالعاتقىزى.
قاراعاندى وبلىسى,
ساران قالاسى
