قونىس تويى
مەملەكەتتىك باعدارلاما اياسىندا مەگاپوليستەگى 304 وتباسىنا جاڭا پاتەر كىلتى تاپسىرىلدى. شاھار باسشىسى تۇرعىنداردى مەرەكەلەرىمەن قۇتتىقتاپ, تولاعاي تابىس تىلەدى.
پايدالانۋعا بەرىلگەن ۇيلەر قالانىڭ بوزارىق شاعىن اۋدانىندا ورنالاسقان. ءۇي كەزەگىندە تۇرعان ازاماتتار باسپانانى «وتباسى بانك» اق ارقىلى مەملەكەتتىك باعدارلامانىڭ «2-10-20», «5-10-20» باعىتتارى اياسىندا نەسيە تۇرىندە راسىمدەپ الدى. جاڭا ۇيگە قونىستانعاندار ىشىندە مۇگەدەكتىگى بار بالالاردى تاربيەلەپ وتىرعان, تولىق ەمەس, كوپبالالى وتباسىلار, مۇمكىندىگى شەكتەۋلى ازاماتتار, جەتىمدەر مەن اتا-انا قامقورلىعىنسىز قالعان بالالار, بيۋدجەتتىك ۇيىم قىزمەتكەرلەرى بار.
وسى باسپانالاردى الۋعا 304 پاتەردەن تۇراتىن 8 كوپقاباتتى تۇرعىن ۇيگە كونكۋرس جۇرگىزىلدى. قازىر ءۇيلى بولعان ازاماتتارمەن ساتىپ الۋ-ساتۋ كەلىسىمشارتى جاسالىپ جاتىر. بۇدان بولەك, مەملەكەتتىك باعدارلاما اياسىندا «وتباسى بانك» اق ارقىلى 400 پاتەرلىك 10 كوپقاباتتى تۇرعىن ۇيگە كونكۋرس جۇرگىزىلۋ ۇستىندە.
پرەزيدەنت تاپسىرماسىمەن جۇزەگە اسىرىلىپ جاتقان مەملەكەتتىك باعدارلامالار تۇرعىنداردىڭ جايلى ءومىر سۇرۋىنە كومەگىن تيگىزەدى. كرەديتتىك تۇرعىن ۇيلەردىڭ قولجەتىمدىلىگىن ارتتىرۋ, تابىسى از ازاماتتاردى ىنتالاندىرۋ ماقساتىندا جەرگىلىكتى بيۋدجەت ەسەبىنەن 311 وتباسىنا تۇرعىن ءۇي سەرتيفيكاتى بەرىلدى. بۇل ماڭىزدى قۇجات قايتارىمسىز نەگىزدەگى الەۋمەتتىك كومەك ەسەبىندە جۇرەدى. وسى سەرتيفيكاتتى العان ازاماتتار كەيىن نەسيەلىك باسپاناعا قول جەتكىزە الادى. بيىل مەگاپوليستە جىل سوڭىنا دەيىن تاعى دا 4 مىڭنان استام پاتەر تاپسىرىلادى.
جاڭعىرتۋ باعدارلاماسىنىڭ تيىمدىلىگى
مەملەكەت باسشىسى قاسىم-جومارت توقاەۆ ەل ازاماتتارىن ساپالى باسپانامەن قامتاماسىز ەتۋ, تۇرعىن ءۇي-كوممۋنالدىق شارۋاشىلىعىن كەشەندى جاڭعىرتۋ جونىندە ناقتىلى ماقسات-مىندەتتەر بەلگىلەدى. 2029 جىلعا قاراي ەل كولەمىندە اپاتتى جاعدايداعى 1500 تۇرعىن ءۇي يەسىن جاڭا پاتەرلەرگە قونىستاندىرۋ جونىندە تاپسىرما بەردى.
وسىعان بايلانىستى شىمكەنتتە تۇرعىن ۇيلەردى جاڭعىرتۋ باعدارلاماسى قارقىندى تۇردە جۇزەگە اسىرىلا باستادى. قازىر مەگاپوليستە 2 مىڭنان استام كوپقاباتتى تۇرعىن ءۇي بار, ونىڭ 70 پايىزدان استامى جارتى عاسىر بۇرىن سالىنعان, كوپشىلىگى اپاتتى جاعدايدا. 134 تۇرعىن ءۇي ابدەن ەسكىرگەن. دەگەنمەن ۇيلەردى ءسۇرىپ تاستاماس بۇرىن تۇرعىنداردان تولىق كەلىسىم الۋ قاجەت ەكەن.
مىنە, وسى باعدارلاما شەڭبەرىندە قالا اكىمى «Shymkent City» شاعىن اۋدانىنداعى تۇرعىندارعا پاتەر كىلتىن تابىستادى. اينالما وتكەلىندەگى تۇرعىن ۇيلەردىڭ ءبىرى سۇرىلۋگە جاتاتىن نىساندار تىزىمىنە ەنگەن. عيمارات 60 جىلدان استام ۋاقىت بۇرىن سالىنعان. قاۋىپسىزدىك پەن ەنەرگيانى ءتيىمدى جۇمساۋ تالاپتارىنا مۇلدە سايكەس كەلمەيدى. مۇنداي ۇيلەر تۇرعىندارعا عانا عانا ەمەس, اينالاداعى ينفراقۇرىلىمعا دا قاۋىپتى. سوندىقتان ولاردى بۇزىپ, ورنىنا جاڭاسىن سالعان ءجون.
باعدارلاما شارتىنا سايكەس اپاتتى ۇيلەردىڭ يەلەرى جاڭا عيماراتتان كولەمى مەن بولمەلەرى بىردەي پاتەر الادى. جاڭا باسپانا بۇرىنعىمەن سالىستىرعاندا 20 شارشى مەترگە كەڭ. سونداي-اق قونىستانۋشىلار ەسەپتەگىشتەرگە قوسىمشا اقى تولەمەيدى. تۇرعىن ءۇي زاماناۋي تالاپقا ساي سالىنعان. قورىتا ايتقاندا, مەملەكەتتىك تۇرعىن ءۇيدى جاڭعىرتۋ باعدارلاماسى ازاماتتاردى ساپالى ۇيمەن قامتاماسىز ەتۋگە, قالانىڭ ساۋلەتتىك كەلبەتىن جاقسارتۋعا, ەكولوگيالىق جاعدايدى تۇزەۋگە, سونداي-اق ينجەنەرلىك ينفراقۇرىلىمدى جاڭعىرتۋعا مۇمكىندىك بەرەدى.
بالالار جاڭا مەكتەپكە بارادى
قالا اكىمى شاھارداعى العاشقى ەكى جايلى مەكتەپتىڭ اشىلۋىنا قاتىستى. نۇرشۋاق شاعىن اۋدانىنداعى جاڭا ءبىلىم بەرۋ عيماراتى 2000 ورىنعا شاقتالعان, ال قاراباستاۋ تۇرعىن الابىنداعى مەكتەپ 1200 ورىنعا ەسەپتەلگەن. بۇل مەكتەپتەردە وقۋشىلار وقۋ جىلىنىڭ ءىى توقسانىنان باستاپ وقيدى.
مەكتەپ تاپشىلىعى جىلدار بويى شاھاردا وزەكتى ماسەلە بولىپ كەلدى. وسى پروبلەمانى شەشۋگە «جايلى مەكتەپ» ۇلتتىق جوباسى سەپتىگىن تيگىزىپ وتىر. قازىر ەلىمىزدە اپاتتى, ءۇش اۋىسىمدى مەكتەپتەر ماسەلەسى بىرتىندەپ شەشىمىن تاۋىپ كەلەدى.
«جايلى مەكتەپتە» باستاۋىش پەن جوعارى سىنىپ وقۋشىلارىنىڭ ساپالى ءبىلىم الىپ, جان-جاقتى دامۋىنا بارلىق جاعداي قاراستىرىلعان. ءبىلىم ۇيالارى زاماناۋي پاندىك كابينەتتەرمەن, STEM-زەرتحانالارمەن, روبوتتەحنيكا سىنىپتارىمەن جابدىقتالعان. مۇگەدەكتىگى بار بالالارعا كەدەرگىسىز ورتا قالىپتاستىرىلعان. قاۋىپسىزدىك شارالارىنا دا ەرەكشە نازار اۋدارىلىپ, ساندىق بەينەكامەرالار مەن تۋرنيكەتتەر ورناتىلعان. حورەوگرافيالىقپەن قوسقاندا ءتورت سپورت زالى, دەمالىس ايماقتارى مەن ۆوركاۋت, نەتۆوركينگ الاڭدارى بار. ۇلتتىق جوبا اياسىندا شىمكەنتتە بۇعان قوسىمشا تاعى 18 «جايلى مەكتەپ» اشىلادى دەپ جوسپارلانعان.
كوك تۋدىڭ جەلبىرەگەنى...
مەگاپوليستە ەڭ بيىك تۋتۇعىرى قالانىپ, مەملەكەتتىك تۋ كوتەرىلدى. تۋتۇعىردىڭ بيىكتىگى – 100 مەتر. اتالعان نىساننىڭ سالتاناتتى اشىلۋ راسىمىنە قالا اكىمى, ءماسليحات دەپۋتاتتارى, قۇقىق قورعاۋ ورگاندارىنىڭ باسشىلارى, اتاقتى سپورتشىلار مەن جاستار قاتىستى. تۇرعىنداردى ايتۋلى ءىس-شارامەن قۇتتىقتاعان شاھار باسشىسى «Tulip Hall» كونتسەرتتىك سارايىنىڭ ماڭىنداعى بۇل بيىك تۋتۇعىر قالانىڭ ماقتانىشى عانا ەمەس, مادەني-ساۋلەتتىك نىسان رەتىندە قوناقتار مەن تۋريستەردى وزىنە تارتاتىن ورىن بولارىنا سەنىم ءبىلدىردى. ۇزىندىعى 30, ەنى 15 مەترلىك كوك بايراقتى مەگاپوليستىڭ ءار نۇكتەسىنەن كورۋگە بولادى. سالتاناتتى ءىس-شاراعا جينالعان كوپشىلىك قاۋىم تۋىمىز كوككە كوتەرىلگەندە بويلارىن ماقتانىش سەزىمى كەرنەپ, پاتريوتتىق رۋحتى وياتقان كەرەمەت اسەردە قالعاندارىن ايتادى.
شىمكەنت
