بۇگىندە الىس-جاقىن شەتەلگە تانىلعان وتاندىق مۋزىكا مامانى, جۇرتتىڭ سۇيىكتى ءانشىسى دينارا كايرگوجا ونەر الەمىن اسا جوعارى باعالايدى. ويتكەنى ول ۇلى ونەر, مۋزىكا دەيتىن تىلسىم قۇدىرەت ارقىلى ءوزىن-ءوزى دامىتىپ كەلەدى.
شەكاراسى جوق مۋزىكا الەمىنە «Studio 54» LIFE BAND-ءى ارقىلى تانىلعان دينارا مۋزىكا, ونەردىڭ تازالىعى تۋرالى ايتقاندا تىڭداي بەرگىڭىز كەلەدى.
قازىرگى ۋاقىتتا ايتارى بولماسا دا, مۋزىكالىق كاسىبي الەۋەتى جەتپەسە دە ءانشى بولىپ جۇرگەندەر كوپ. بىراق مۋزىكالىق ءبىلىم بولماعاندىقتان ۇلكەن ساحنادان كورىنۋ ەكىنىڭ بىرىنە بۇيىرمايتىن باق.
ء«بىر جاعىنان شوۋ-بيزنەستىڭ قولجەتىمدىلىگى, اقپاراتتىق-تسيفرلىق تەحنولوگيالاردىڭ دامىپ كەلە جاتقانى ءاندى دە, ءانشىنى دە كوبەيتىپ جاتىر. ەندى ولاردى تىڭداۋ, تىڭداماۋ اركىمنىڭ ءوز تالعامىنا, دەڭگەيىنە بايلانىستى. بۇل تۇرعىدان انشىگە دە, تىڭدارمانعا دا ارتىق ەشنارسە ايتا المايمىن. بىراق بۇگىن حيت بولىپ جاتقان اندەر تۇبىندە كوپ ۇزاماي ۇمىتىلادى. مۋزىكانىڭ ۇلىلىعى وسىندا. مۋزىكا جەڭىل دۇنيەلەردى قابىلدامايدى. سوندىقتان قازىرگى بۋىنعا ىزدەنۋدەن قاشپاي, ءوزىن-ءوزى ۇنەمى دامىتىپ, ىزدەنۋگە كەڭەس بەرەر ەدىم, – دەيدى ءانشى دينارا كايرگوجا.
ارينە, دينارانىڭ ايتقانى ورىندى. ءوزى دە ۇنەمى ىزدەنىس ۇستىندە. ساحنادا ادالدىق ءپرينتسيپىن ۇستانادى. وتاندىق شوۋ-بيزنەستە جۇرگەندەردى ساحناعا جاناشىرلىقپەن قاراۋعا شاقىرادى. كورەرمەندى, تىڭدارماندى سىيلاۋ كەرەكتىگىن ۇعىندىرعىسى كەلەدى. ويتكەنى, ۆوكالمەن اينالىسۋ – بۇل ۇلكەن ەڭبەكقورلىقتى تالاپ ەتەتىن وتە كۇردەلى پروتسەسس.
مۋىزكانت,تاجىريبەلى مۋزىكا جانە پەداگوگيكا مامانى دينارا كايرگوجا بۇگىندە الپاۋىت امەريكا قۇراما شتاتتارىندا تۇرادى. سونداعى ونەرگە جاقىن قازاق جاستارىنا ۆوكالدان ءتالىم بەرىپ, ۇلت ونەرىن كەڭىنەن ناسيحاتتاپ ءجۇر. قازاق قاۋىمداستىعى ۇيىمداستىراتىن بارلىق ءىس-شارالارعا اتسالىسىپ, ەكى ەلدىڭ مادەني دوستىعىن, بىرلىگىن پاش ەتىپ ءجۇر. ونلاين ارقىلى قازاقستاندىق ونەرپازدارعا ۆوكالدان ساباق بەرىپ, بار تاجىريبەسىمەن بولىسۋدە.
تاعى ءبىر جەتىستىگى - جاقىندا عانا ۇلىبريتانيا استاناسى – لوندوندا وتكەن Golden TIME TALENT الەمدىك بايقاۋىنا قاتىسىپ, ءبىرىنشى ورىندى جەڭىپ الدى. Golden TIME TALENT دۇنيەجۇزىلىك بايقاۋ, ونەرلى ادامداردىڭ جاسىنا قاراماستان ءوز تالانتىن كورسەتۋگە جاڭا مۇمكىندىكتەر بەرەتىن ۇلكەن جوبا. دينارا كايرگوجا اتالمىش بايقاۋدا ءوزىنىڭ تۋىندىسىن ورىندادى.
«بۇل بايقاۋدا مەن ءوزىم ءانىن دە, ءسوزىن دە جازعان «وكپە» شىعارمامدى ورىندادىم. قازىلار القاسىنىڭ شەشىمىمەن ءبىرىنشى جۇلدە ماعان بۇيىردى. بۇل مەنىڭ شابىتىما ودان ءارى سەرپىن بەرىپ, بۇدان دا بيىك بەلەستەردى باعىندىرۋىما ىقپال ەتەتىنى ءسوزسىز» دەدى دينارا بيسەنوۆا.
ايتا كەتەيىك, دينارانىڭ جۇلدە العان شىعارماسى الداعى ۋاقىتتا وتاندىق تەلەارنادا كورسەتىلەتىن «شىراعىڭ سونبەسىن» تەلەحيكاياسىنىڭ ساۋندترەگىنە تاڭدالىپ الىندى.
