قوستانايدا سپورت مەكتەبىنىڭ جاتتىقتىرۋشىسى بيۋدجەت قاراجاتىن ۇرلاعان

بيىلعى جىلدىڭ 21 قازانىندا قوستاناي وبلىسىنىڭ پروكۋراتۋراسىمەن بيۋدجەت قاراجاتىن ۇرلاۋ تۋرالى قىلمىستىق ءىس بويىنشا ايىپتاۋ اكتىسى بەكىتىلگەن.

«تەرگەۋ بارىسىندا قوستاناي وبلىسى اكىمدىگى دەنە شىنىقتىرۋ جانە سپورت باسقارماسىنىڭ «جوعارى سپورت شەبەرلىگى مەكتەبى» كمم بالالار مەن جاسوسپىرىمدەر كوماندالارى اراسىندا شورت-ترەك بويىنشا جاتتىقتىرۋشىسى ءوزىنىڭ قىزمەتتىك جاعدايىن پايدالانا وتىرىپ, 2022 جىلدىڭ قازانىنان 2024 جىلدىڭ قاڭتارىنا دەيىن جارىستارعا ءىس جۇزىندە بارماعان ادامداردى زاڭسىز كورسەتۋ جولىمەن شىعىنداردىڭ ناقتى سوماسىن ۇلعايتىپ, جالعان اۆانستىق ەسەپتەر قۇراستىرعانى انىقتالدى», دەلىنگەن وبلىستىق پروكۋراتۋرانىڭ حابارلاماسىندا.

انىقتالعانداي, جاتتىقتىرۋشى تۇسكەن اقشانى وزىنە يگەرگەن. ناتيجەسىندە ۇرلانعان بيۋدجەت قاراجاتىنىڭ سوماسى 5,9 ملن تەڭگەنى قۇراعان.

كەيىننەن ۇرلانعان اقشا قاراجاتىن دەپوزيتتىك شوتقا اۋدارۋ ارقىلى زاڭدى اينالىمعا تارتىپ, ول جەردەن اي سايىنعى سىياقىنى 9,6% پايىزدىق مولشەرلەمەمەن العان. دەپوزيت بويىنشا پايىزدىق سىياقى تۇرىندەگى جاريا ەتىلگەن قىلمىستىق كىرىس سوماسى 613,1 مىڭ تەڭگەنى قۇراعان.

«ونىڭ ارەكەتتەرى قىلمىستىق كودەكستىڭ 189-بابىنىڭ 3-بولىگىنىڭ  1-تارماعى (سەنىپ تاپسىرىلعان بوتەن م ۇلىكتى قىزمەتتىك جاعدايىن پايدالانا وتىرىپ, ءىرى مولشەردە ۇرلاۋ) 218-بابىنىڭ 1-بولىگى (اقشانى زاڭداستىرۋ (جىلىستاتۋ), ياعني كونۆەرسيا تۇرىندە مامىلەلەر جاساۋ ارقىلى قىلمىستىق جولمەن الىنعان اقشالاي قاراجاتتى زاڭدى اينالىمعا تارتۋ) بويىنشا سارالانادى. سانكتسيا باپپەن التى جىلعا دەيىنگى مەرزىمگە بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ايىرا وتىرىپ, مۇلكى تاركىلەنىپ, جەتى جىلعا باس بوستاندىعىنان ايىرۋ تۇرىندەگى ەڭ جوعارى جازانى كوزدەيدى», دەلىنگەن حابارلامادا.

قىلمىستىق ءىس قوستاناي قالاسىنىڭ №2 سوتىنا جولداندى.