سۋرەت: ru.freepik.com
باسقارما توراعاسىنا مەگاپوليستە ىسكە اسىرىلىپ جاتقان ينۆەستيتسيالىق جوبالار جايىندا باياندالدى. ر.باتالوۆ ءاربىر ينۆەستور, كاسىپكەرمەن تىعىز بايلانىستا جۇمىس ىستەپ, بارىنشا قولداۋ كورسەتۋ ماڭىزدى ەكەنىن اتاپ ءوتتى.
«الداعى ۋاقىتتا جەرگىلىكتى اكىمدىكتەرمەن بىرگە ۇيلەستىرۋ جۇمىسىن پىسىقتاۋ قاجەت. ءتۇرلى مەملەكەتتىك باعدارلامالار بار, قارجىلاي قولداۋلار دا جەتكىلىكتى. مۇنىڭ ءبارىن جاڭادان كاسىپ باستاعان نەمەسە شاعىن كاسىپكەرلەر تولىق بىلە بەرمەۋى مۇمكىن. سوندىقتان بيزنەسكە قارجىلاي, كونسۋلتاتيۆتىك, قۇقىقتىق قولداۋ كورسەتىلۋى قاجەت. سوندا ەكونوميكاداعى «كولەڭكەلى» بيزنەس ازايىپ, بيۋدجەتتىڭ سالىق ءتۇسىمى ارتادى. قانداي پروبلەما تۋىنداماسىن «اتامەكەن» پالاتاسى كومەك بەرۋگە ءازىر ەكەنىن بيزنەس وكىلدەرىنە ۇعىندىرۋىمىز قاجەت», دەدى ول.
«اتامەكەن» ۇكپ باسقارما توراعاسى وڭىرلىك پالاتا ۇجىمىمەن دە جۇزدەستى. كاسىپكەرلەر ۇيىمىنىڭ ديرەكتورى سابيرا ادامبەكوۆا ر.باتالوۆقا اتقارىلىپ جاتقان جۇمىستار تۋرالى ايتتى. ءسوز اراسىندا قايرات مولداسەيىتوۆ باستاعان وڭىرلىك كەڭەس وتە بەلسەندى جۇمىس اتقارىپ جاتقانىن اتاپ ءوتتى.
«كاسىپكەرلەر پالاتاسى ءبىرشاما ماڭىزدى ماسەلەنى شەشتى. سونىڭ قاتارىندا بولشەك سالىق مولشەرلەمەسىن ەكى ەسە, ياعني 4%-دان 2%-عا تومەندەتتىك, ودان بولەك, شىمكەنتتەگى مال شارۋاشىلىعىمەن اينالىساتىن كاسىپكەرلەرگە سۋبسيديا ءبولۋ, «جايلى مەكتەپ» جوباسى اياسىندا وففتەيك كەلىسىمشارتتاردى ءتۇزۋ بويىنشا ماسەلەلەردى رەتتەدىك. جەرگىلىكتى اتقارۋشى ورگاندار, پروكۋراتۋرا, سىبايلاس جەمقورلىققا قارسى ءىس-قيمىل, ەكونوميكالىق تەرگەپ-تەكسەرۋ دەپارتامەنتتەرىمەن تىعىز بايلانىستا جۇمىس جۇرگىزىلىپ, ءوزارا ارىپتەستىك مەموراندۋمدار تۇزىلگەن», دەدى س.ادامبەكوۆا.
پالاتا باسشىسى «اتامەكەن» ۇكپ تاراپىنان سوڭعى ۋاقىتتا جۇزەگە اسىرىلعان ءىرى جوبالاردىڭ ءبىرى – ينۆەستيتسيالىق كارتانىڭ جاسالعانىن مالىمدەدى. اتالعان كارتاعا 59 جوبا ەنگىزىلگەن. ولاردىڭ جالپى قۇنى 465 ملرد تەڭگەدەن اسادى. بيزنەس جوبالاردى سۇيەمەلدەۋ «Invest Shymkent» پەن «قازاقينۆەست» ۇيىمى تاراپىنان ء«بىر تەرەزە» قاعيداتى نەگىزىندە اتقارىلىپ جاتىر.
بيىل 9 ايدا وڭىرلىك كاسىپكەرلەر پالاتاسىنا بيزنەستىڭ زاڭدى مۇددەسى مەن قۇقىعىن قورعاۋ جونىندە 85 ارىز-شاعىم كەلىپ تۇسكەن. ناتيجەسىندە, 120 ملن تەڭگە كولەمىندەگى سومادا كاسىپكەرلەر قۇقىعى قورعالدى. پالاتا «ازاماتتارعا ارنالعان ۇكىمەت» كورپوراتسياسىمەن بىرگە 2023 جىلى كاسىپكەرلەرگە ارنالعان كوپفۋنكتسيونالدى قىزمەت كورسەتۋ ورتالىعىن اشقان. وسى جىلدىڭ 9 ايىندا اتالعان ورتالىق 8 200-گە جۋىق قىزمەت ءتۇرىن كورسەتتى. ونىڭ ىشىندە بيزنەس-جوسپار قۇرۋ, جوبالاردى سۇيەمەلدەۋ سەكىلدى كومەكتەر بار. وسى جۇمىستاردىڭ ارقاسىندا كاسىپكەرلىك سۋبەكتىلەرى گرانت, نەسيە تۇرىندە 377 ملن تەڭگەگە قول جەتكىزدى.
ساپار بارىسىندا «اتامەكەن» ۇكپ باسقارما توراعاسى شىمكەنتتەگى ءىرى ءوندىرىس ورىندارىنىڭ ءبىرى – «QazAlPack» زاۋىتىنا بارىپ, ءوندىرىس ورنىنىڭ جۇمىسىمەن تانىستى. اتالعان كاسىپورىن سۋسىندارعا ارنالعان اليۋميني بانكالار مەن قاقپاقتار شىعارادى.
شىمكەنت
