اقتوبە قالاسىنىڭ مەكتەپتەرى مەن كوللەدجدەرىنەن كەلگەن مىڭ وقۋشىنىڭ الدىندا ءماجىلىس دەپۋتاتى قازىبەك الىشەۆ, تەلەجۇرگىزۋشى جانە «جايدارمان» جوباسىنىڭ جەتەكشىسى ەسەن ەلەۋكەن, قازاق ەستراداسىنىڭ ءارتىسى نۇربولات ابدۋللين, ايتىسكەر قاينار الاگوزوۆ, تانىمال اكتەر ارتۋر تولەپوۆ ءسوز سويلەدى. جۇرتقا بەلگىلى اقتوبەلىكتەر ءومىر تاجىريبەلەرى, جەتىستىككە جەتۋ جولدارىمەن ءبولىستى. وسى جيىنعا ءوڭىردىڭ 12 اۋدانىنان 2 مىڭ وقۋشى ونلاين تۇردە قوسىلدى.
ءوڭىر باسشىسى ا.شاحاروۆتىڭ ايتۋىنشا, وتانسۇيگىشتىك, ەلجاندىلىق, اتا-اناسىن, قورشاعان ورتاسىن قۇرمەتتەي ءبىلۋ سياقتى قاسيەتتەر بالا كەزدەن, جاراتىلىسىنداعى ادامگەرشىلىك, مەيىرىمدىلىك, بىرسوزدىلىك, تاباندىلىق مىنەزدەردى باسىمدىققا قويعان كەزدەن باستالادى. ءجاسوسپىرىم كەزدەن-اق ومىرلىك ۇستانىمدارىن العا قويىپ, تۇلعالىق قاسيەتتەرىن دامىتا وتىرىپ, ءوز قالاۋىمەن بولاشاق ماماندىعىن تاڭداي بىلگەن ءجون. وسى باعىتتا مەملەكەتىمىز جاستاردىڭ ءوز-ءوزىن دامىتۋىنا, جاڭا ءبىلىم مەن داعدىلاردى يگەرۋىنە كوپتەگەن مۇمكىندىك جاساپ كەلەدى.
«الايدا قازىرگى قوعامدا جاسوسپىرىمدەردىڭ الدىنان شىققان كەدەرگىلەر دە كوبەيدى. مەملەكەت باسشىسى قاسىم-جومارت توقاەۆ ۇلتتىق قۇرىلتايدا جالپىعا ورتاق قۇندىلىقتاردى دامىتۋ مەن قازىر ەلگە قاۋىپ ءتوندىرىپ تۇرعان 5 كەسەل جونىندە اشىق ايتتى. سونىڭ ىشىندە جاستار اراسىنداعى قۇقىق بۇزۋشىلىق, ناشاقورلىق, ۆانداليزم, قاتىگەزدىك پەن بۇزاقىلىقتىڭ وسكەنىن ايتتى. جاستار اراسىندا تارالعان وسى كەسەلدەردى جويۋعا قوعامنىڭ قولداۋى ابدەن قاجەت. ءبىز جاستاردى ومىرگە جاۋاپكەرشىلىكپەن قاراۋعا شاقىرامىز. ەڭ باستىسى, دۇرىس ازامات رەتىندە قالىپتاسۋعا كەدەرگى كەلتىرەتىن زياندى ادەتتەرگە جولاماۋ كەرەك. ول ءۇشىن اتا-اناڭىزبەن, ۇستازدارىڭىزبەن جاقسى قارىم-قاتىناستا بولىپ, دوستاردى دا دۇرىس تاڭداي ءبىلۋ كەرەك. ويتكەنى تەرىس جولعا تۇسكەن جاستىڭ كەرى قايتۋى وتە قيىن. ونىڭ ۇستىنە ەلىمىزدە ناشاقورلىق, لۋدومانيا, بۋللينگكە قارسى زاڭدار كۇشەيتىلدى. مۇنداي قىلمىستار ءۇشىن جازا قاتاڭ ەكەنىن ۇمىتپاڭىز. قوعامدىق جۇمىس پەن ۆولونتەرلىك باستامالارعا قاتىسۋ دا جاستاردىڭ تۇلعالىق دامۋىنا جول اشادى. قاشاندا ونەر, ءبىلىم, سپورت ءسىزدىڭ اينىماس سەرىگىڭىز بولسىن. كىتاپپەن دوس بولىڭىز», دەدى وبلىس اكىمى فورۋم قاتىسۋشىلارىنا ارناۋ
سوزىندە.
ءىس-شاراعا قاتىسۋشىلار جاسوسپىرىمدەردى تاربيەلەۋ تاقىرىبىندا پىكىر تالاستىرىپ, بالانىڭ تۇلعالىق قالىپتاسۋى كەزەڭىندەگى وتباسى ينستيتۋتى مەن مەكتەپتىڭ ءرولىن تالقىلادى. قيسىق جولعا كەتىپ بارا جاتقان ءجاسوسپىرىمدى قايتارۋداعى پسيحولوگيالىق تاسىلدەر, ناشاقورلىق, سۋيتسيد, بۋللينگپەن كۇرەسۋدەگى الەمدەگى وزىق تاجىريبەلەرگە توقتالدى. تاعى ءبىر ەسكەرەتىن جايت, اتا-انالار كوبىنە بالاسىنىڭ تەرىس جولعا ۇيرەتەتىن ءتۇرلى اككاۋنتقا ەركىن كىرىپ كەتۋىن بايقاي بەرمەيدى. ويتكەنى بالا مىنەزىندەگى وزگەرىستەرگە نازار اۋدارمايدى, پەرزەنتىنىڭ نەمەن اينالىسىپ, كىممەن دوس بولىپ جۇرگەنىمەن شارۋاسى جوق. جيىنعا قاتىسۋشىلار ءجاسوسپىرىمنىڭ ەڭ جاقىنى قاي كەزدە دە اتا-اناسى ەكەنىن ەسكەرتىپ, وزدەرىن مازالاعان سۇراقپەن ولارعا, نە سىنىپ جەتەكشىسى مەن مەكتەپ پسيحولوگىنە جۇگىنۋگە كەڭەس بەردى. وسى ماقساتتا جاسوسپىرىمدەر اراسىندا قولايلى ءارى قاۋىپسىز ورتا قۇرۋ ءۇشىن جاستار باستامالارىن دامىتۋ جانە اتا-انالاردى تاربيە ۇدەرىسىنە تارتۋ, تەگىن ۇيىرمەلەر مەن اۋلا كلۋبتارىنىڭ جۇمىسىن دۇرىس ۇيلەستىرۋ ماڭىزدى.
جيىن سوڭىندا وڭىردەگى بارلىق مەكتەپ پەن كوللەدجدە تاربيە جۇمىسىن جولعا قويۋدىڭ ورتاق الگوريتمىن قۇرۋ جونىندە شەشىم قابىلداندى.
اقتوبە وبلىسى
