اباي وبلىسىنىڭ اكىمى نۇرلان ۇرانحاەۆ «قازاقستان بارىسى» ءتۋرنيرىنىڭ بيىلعى جەڭىمپازى ەراسىل قاجىباەۆ پەن ءتۋرنيردىڭ قولا جۇلدەگەرى سايات شامشيەۆتى ارنايى قابىلدادى. كەزدەسۋدە ءوڭىر باسشىسى ايماق ابىرويىن اسىرعان بالۋاندارعا العىس ءبىلدىرىپ, ولاردىڭ جەڭىسى تەك سپورتتىق جەتىستىك قانا ەمەس, جاستاردى وتانشىلدىققا, سالاماتتى ومىرگە باۋليتىن لايىقتى ۇلگى ەكەنىن ەرەكشە اتاپ ءوتتى. ۇلتتىق سپورتتى دامىتۋعا, ناسيحاتتاۋعا قوسقان ۇلەسى ءۇشىن دەمەۋشىلەر اتىنان قوس سپورتشىعا تەمىر تۇلپار تابىستالدى. سونداي-اق بيىلعى «قازاقستان بارىسى» ەراسىل قاجىباەۆ ءۇش بولمەلى پاتەردىڭ سەرتيفيكاتىنا يە بولدى.
جانكۇيەرلەرگە سامبو, دزيۋدو كۇرەسى ارقىلى جاقسى تانىمال ە.قاجىباەۆ حالىقارالىق ارەنالاردا دا ايتارلىقتاي جەتىستىكتەرگە جەتكەن. ول – دزيۋدودان كادەتتەر مەن جاستار اراسىنداعى ەل چەمپيوناتىنىڭ جۇلدەگەرى, دجاكارتاداعى ازيا ويىندارىنىڭ كوماندالىق جارىسىنىڭ كۇمكىس مەدال يەگەرى, سامبودان ازيا چەمپيونى, الەم چەمپيوناتىنىڭ قولا جۇلدەگەرى.
«مەن بۇل تۋرنيرگە التىنشى رەت قاتىسىپ وتىرمىن. جەڭىسىمدى تۋعان جەرىمە, جەرلەستەرىمە ارنايمىن. الداعى الامان جارىستارعا دا تىڭعىلىقتى دايىندالىپ, ەل سەنىمىن اقتاۋعا تىرىسامىن», دەدى ە.قاجىباەۆ.
ءتۋرنيردىڭ قولا جۇلدەگەرى, «بولاتشى» لاقاپ اتىمەن ونەر كورسەتكەن سايات شامشيەۆ تە بەلگىلى بالۋان, حالىقارالىق دارەجەدەگى سپورت شەبەرى, دزيۋدودان ەلىمىزدىڭ چەمپيونى, سامبودان الەم چەمپيوناتىنىڭ قولا جۇلدەگەرى.
سەمەي
