فوتو: ونەركاسىپ جانە قۇرىلىس مينيسترلىگى ءباسپاسوز قىزمەتى
Demo day شاراسىنا «Chamber of mines» قازاقستاندىق تاۋ-كەن پالاتاسىنىڭ, «اتامەكەن» قر ۇلتتىق كاسىپكەرلەر پالاتاسىنىڭ, تاۋ-كەن ءوندىرۋ جانە تاۋ-كەن مەتاللۋرگيا كاسىپورىندارىنىڭ رەسپۋبليكالىق قاۋىمداستىعىنىڭ, «قازاقمىس كورپوراتسياسى» جشس جانە باسقا دا جەر قويناۋىن پايدالانۋشىلاردىڭ وكىلدەرى قاتىستى.
Demo Day قاتىسۋشىلارىنا ىڭعايلى تسيفرلىق سەرۆيستەردى الۋعا جانە گەولوگيالىق-گەوفيزيكالىق زەردەلەۋدىڭ ينتەراكتيۆتى كارتاسىمەن ءوزارا ءىس-قيمىل جاساۋعا مۇمكىندىك بەرەتىن جەر قويناۋىن پايدالانۋدىڭ بىرىڭعاي پلاتفورماسىنىڭ جاڭارتىلعان فۋنكتسيونالى كورسەتىلدى.
جەر قويناۋىن پايدالانۋدىڭ بىرىڭعاي پلاتفورماسىنىڭ فۋنكتسيونالىن وزگەرتۋ جانە تسيفرلىق سەرۆيستەرىن ازىرلەۋ قر قارجى مينيسترلىگىنىڭ «اقپاراتتىق-ەسەپتەۋ ورتالىعى» اق كۇشىمەن جۇزەگە اسىرىلدى.
قر ونەركاسىپ جانە قۇرىلىس ۆيتسە-ءمينيسترى ءجاننات ءدۇبىروۆا قازىر ينۆەستوردىڭ بارلاۋعا/وندىرۋگە ءوتىنىم بەرۋىنەن باستاپ ونىڭ اۋكتسيونىنا جانە ليتسەنزيا بەرۋىنە دەيىن ۇزدىكسىز تسيفرلاندىرىلعان پروتسەسس قامتاماسىز ەتىلگەنىن اتاپ ءوتتى.
جەر قويناۋىن پايدالانۋ دەپارتامەنتىنىڭ, گەولوگيا كوميتەتىنىڭ جانە «ۇلتتىق گەولوگيالىق قىزمەت» اكتسيونەرلىك قوعامىنىڭ وكىلدەرى جەر قويناۋىن پايدالانۋشىلاردى تولعاندىراتىن سۇراقتارعا جاۋاپ بەردى.
ايتا كەتەيىك, جەر قويناۋىن پايدالانۋدىڭ «minerals.e-qazyna.kz» بىرىڭعاي پلاتفورماسى 2024 جىلعى 1 قاراشادا ىسكە قوسىلادى.
