ءوڭىر جاڭالىقتارى

ۇشقوڭىردىڭ  سامالىن الا كەلدى قاراسايلىقتار مادەني كۇندەر اياسىندا ۇلتتىق سالت-ءداستۇر مەن ۇلى دوستىقتىڭ مايەگىن تالدىقورعاندىقتار نازارىنا ۇسىندى تالدىقورعاندا ءار جەتى سايىن اۋ­دان مەن قالالاردىڭ مادەني كۇندەرىن وتكىزۋ جالعاسىپ كەلەدى. جاقىندا بۇل شارانى رايىمبەك اۋدانىنىڭ جۇرتشىلىعى باستاسا, قاراسايلىقتار ءداستۇرلى مەرەكەنىڭ قايماعىن بۇزباي, وزگەشە رەڭمەن جالعاستىرىپ اكەتتى. ءاردايىم ايماق حالقى قازاقستان رەسپۋبليكاسىنىڭ پرەزيدەنتى نۇر­سۇلتان نازارباەۆتىڭ كىشى وتانى, كىندىك قانى تامعان كيەلى مەكەنى ەكەندىگىن نازاردا ۇستاپ, وسى بيىكتە بو­لۋعا بار مۇمكىندىكتەرىن جۇمىل­دى­رىپ, بەلەستەردى باعىندىرۋىمەن كوزگە ءتۇسىپ كەلەدى. ءداستۇرلى مادەني شاراعا جان-جاقتى دايىندالعانى كورەر كوزگە انىق اڭعارىلىپ, الاڭعا حالىق ادەتتەگىدەن دە كوپ جينالدى. ءىلياس جانسۇگىروۆ اتىنداعى ءما­دەنيەت سارايىنىڭ الدىنا اۋدانداعى شارۋا قوجالىقتارى مەن كاسىپكەر­لەر, ۇلتتىق مادەني ورتالىق مۇشە­لە­رى بارىن جايىپ سالىپ, قالالىق­تار­دىڭ بيىك سۇرانىسىن قاناعاتتان­دىرۋعا بەيىل ەكەندىگى اڭعارىلدى. ۇلتتىق قۇندىلىقتاردى ۇلىقتاعان شاراعا اۋدانداعى 32 ۇلتتىڭ وكىلى ءبىر جاعادان باس, ءبىر جەڭنەن قول شىعارا اتسالى­سىپتى. چەشەن, تۇرىك, ۇيعىر, ورىس, ۋكراين, تاعى باسقا مادەني ورتالىق­تار ۇلتتىق ناقىشتاعى ونەر­لەرى مەن سالت-داستۇرلەرىن كورسەتۋدەگى ۇتىمدى ىستەرىمەن كورەرمەن نازارىن اۋداردى. بىرلىك پەن تىرلىكتىڭ, دوستىق پەن تاتۋلىقتىڭ دانەكەرى ۇلتتاردىڭ باي داستارحانىنان ءدام تاتقاندار ءبىر-بىرىمەن جاقىنداسسا, قوناقجاي قا­سيەت ورنىقتى. سونىمەن قاتار اق­شاڭ­قان ۇيلەردەگى ونەر تۋىندىلارى كورگەن جاندى بەيجاي قالدىرمادى. قىلقالام شەبەرلەرىنىڭ قولىنان شىققان تابيعات تاماشالارى دا كورەرمەندى قىزىقتىردى. الىستان كەلگەن ارداگەرلەر مەن ءماس­ليحات دەپۋتاتتارىن, مەكەمە, كا­سىپورىن باسشىلارىن وبلىس اكىمىنىڭ ءبىرىنشى ورىنباسارى اماندىق باتا­لوۆ قابىلداپ, قالا مەن اۋىل حال­قى­نىڭ بايلانىسىن جاقىنداتقان شا­راعا ەرەكشە دايىندىقپەن كەلگەن­دىك­تەرىن اتاپ ءوتىپ, قىزۋ قۇتتىقتادى. جينالعانداردى ءوڭىردىڭ الەۋمەتتىك-ەكونوميكالىق, مادەني دامۋىنان حاباردار ەتىپ, مەملەكەت باسشىسى­نىڭ جولداۋىنداعى تاپسىرمالارعا بايلانىستى الدا تۇرعان مىندەتتەردى دە ورتاعا سالدى. كەزدەسۋدە اۋدان اكىمى ءلاززات تۇر­لاشەۆ الماتى قالاسىنا جاقىن ور­نالاسقان قاراساي اۋدانى جىل وتكەن سايىن ەكونوميكاسى دامىپ, حالىق­تىڭ ءال-اۋقاتى جاقسارىپ, ەڭبەك ءون­ىم­دىلىگىنىڭ وسكەنىمەن ەرەكشەلە­نە­تىنىن ايتتى. وتكەن مەرزىمدە مۇندا 32 ملرد. 264 ملن. تەڭگەنىڭ ءونىمى ءون­دىرىلىپتى. “بيزنەستىڭ جول كارتاسى – 2020” باعدارلاماسى اياسىندا شاعىن جانە ورتا كاسىپكەرلەرگە قولداۋ كور­سەتىلىپ, اعىمداعى جىلى جۇزدەگەن جۇمىس ورىندارى اشىلعان. قاسكەلەڭ قالاسىنىڭ بەت-بەينەسى اجارلانىپ, تۇرعىن ءۇي قۇرىلىسىنا 31 ملرد. 520 ملن. تەڭگە ينۆەستيتسيا تارتىلعان. كوپ قاباتتى ۇيلەر, مادەني-تۇرمىس­تىق نىساندار قاتارى تولىعۋدا. بيىل اۋدانعا “جول كارتاسىمەن” 1,3 ملرد. تەڭگە قارجى قاراستىرىلسا, جۇمىس­سىزدىقتى بولدىرماۋ ماقساتىنداعى يگىلىكتى ىستەر اۋقىمى دا ەداۋىر. وسى­لايشا الەۋمەتتىك دامۋ باعىتىنداعى جۇمىستار ورتاعا سالىنىپ, اۋداندىق اقساقالدار كەڭەسىنىڭ مۇشەسى ساي­لاۋ­بەك قىدىراليەۆ, “ماۆيد” جاۋاپكەر­شىلىگى شەكتەۋلى سەرىكتەستىگىنىڭ ديرەك­تورى ۆلاديمير ماسلاتسوۆ, ۇلىبري­تانيادا وتكەن حالىقارالىق بايقاۋ جەڭىمپازى, اباي ورتا مەكتەبىنىڭ تۇلەگى ءداميرا راحيموۆا جانە باسقا­لار مادەني كۇندەر اياسىندا وتەتىن ۇلت­تىق مۇرامىزدى ۇلىقتاۋ مەن قالا مەن اۋىلدىڭ اراسىن جاقىنداتاتىن تاعىلىمدى ىستەر جايلى ۇتىمدى وي-پىكىر ءبىلدىردى. الاڭدا ءباھادۇر بابا قاراساي التىناي ۇلىنىڭ ەرلىگى بەينەلەنگەن تەاترلاندىرىلعان كورىنىس حالىقتىڭ ەلجاندىلىق قاسيەتىن وياتىپ, دۋالى اۋىزدان شىققان اتالى ءسوزدىڭ دۋان­دى ەلدى ۇيىتاتىنىن تاعى ءبىر ءدا­لەل­دەدى. تۋعان ەلىنىڭ كەشەگىسى مەن كەمەل كەلەشەگىن التىن ارناعا توعىستىرۋعا تالپىنعان ساحنا شەبەرلەرىنىڭ ونەرى تەڭىزدەي تەرەڭ, تاڭعى شىقتاي ءمولدىر وتكەن تاريحتىڭ كاۋسارىنان سۋسىن­دا­تىپ, وعان شىم-شىم بويلاپ, سىر سۇزگەنىنە كورەرمەن لايىقتى باعاسىن بەردى. اۋىزدىعىمەن الىسقان سايگۇ­لىك­پەن الاڭعا اتويلاتىپ شىققان باتىر تۇلعاسى شىنايى اسەرگە بولەدى. بۇدان سوڭ اۋدان كوركەمونەر­پاز­دا­رىنىڭ كونتسەرتى مەن بالكار, سلاۆ­يان, كۇرد مادەني ورتالىقتارى مۇشە­لەرىنىڭ ونەرلەرى دە كورەرمەندى ءتانتى ەتتى. تامىرى تەرەڭگە كەتىپ, ءومىرى ونەرگە اينالعان قاراسايلىقتاردىڭ بۇل كۇنگى تارتىمدى كەشى بىرلىكتىڭ بيىگىن, ۇلى دوستىقتىڭ كيەسىن اي­شىق­­تى ونەرلەرىمەن جالعاستىردى. الاتاۋعا يەك ارتقان ۇشقوڭىردىڭ سامالى ءان بولىپ قالىقتاپ, كۇي بولىپ شەرتىلدى. وسىلايشا ءار ءانشى, كۇيشى, ءبيشى, زەرگەر مەن شەبەر قاتارى جاڭا تولقىنمەن تولىسىپ, قانات جايعانى ايقىن اڭعارىلدى. تاماشا تابيعات, قاسيەتتى توپىراقتان نارلەنگەن ولاردىڭ بۇل كۇنگى ونەر­لەرى تابىسى ورلەگەن ايماق ەكەنىن تاعى ءبىر قىرىنان كورسەتتى. ءتۇن قاراڭعىلىعى قويۋلانعانى­مەن, تالدىقورعان قالاسىنىڭ اسپا­نىندا “ۇشقوڭىر” ءانى قالىقتاپ, ونىڭ سازدى سامالى ءار جۇرەككە جول تارتتى. كۇمىسجان بايجان, الماتى وبلىسى. الاش قوزعالىسىنىڭ ءجۇز جىلدىعىنا – ءجۇز كىتاپ شاكارىم اتىنداعى سەمەي مەملەكەتتىك ۋنيۆەرسيتەتى دالا دانىشپانى اتانعان اقىن­نىڭ 150 جىلدىق مەرەيتويىنا  داي­ىن­دىققا ەرتە باستان قامدانعان ەدى. سونىڭ ءناتي­جە­سىندە شاكارىمنىڭ تۇلعالىق ەن­تسي­كلوپەدياسى مەن “شاكارىمتانۋ ماسەلە­لە­رى” اتتى كوپتومدىق ەڭبەك ۋاقىتىندا جا­رىق كوردى. مۇنىڭ سوڭعىسى ءالى دە جالعاسىن تابۋدا. اتالعان وقۋ ورنى ەندى, مىنە, الاش قوزعالىسىنىڭ 100 جىلدىعىنا دايىندىققا دا ەرتە باستان كىرىسىپ كەتتى. سول ماقساتپەن مۇندا الاشتانۋ عىلىمي-زەرتتەۋ ورتالىعىنىڭ اشىلعانىنا دا بىرەر جىل بولىپ قالدى. ورتالىق اتاۋلى كۇنگە دەيىن الاش زيالىلارىنىڭ ارتتارىندا قالعان باعالى مۇرالارىن 100 توم ەتىپ شىعارۋ ماقساتىمەن  باعدارلى جۇمىسقا كىرىسىپ كەتتى. مۇنىڭ سىرتىندا الاش قوزعالىسىنا قاتىستى بۇگىنگى تاريحشى عالىمداردىڭ ەڭبەكتەرى دە جارىق كورە باستادى. وسى ورايدا, ۋنيۆەرسيتەت رەكتورى, پروفەسسور ەرلان سىدىقوۆ ارىپتەستەرىنە ۇلگى-ونەگە كورسەتە بىلۋدە. ايتالىق, جۋىردا عانا ورتالىق تاراپىنان الاش تاقىرىبىنا ارنالعان ءتورت كىتاپ جارىققا شىقسا, ونىڭ ءبىرى – “الاش قالاسىنىڭ تاريحى” اتتى كىتاپتىڭ اۆتورى – رەكتوردىڭ  ءوزى. وندا الاشوردا ۇكىمەتى مەن الاش زيالىلارىنا قاتىستى تىڭ دەرەكتەر, الاشوردا ۇكىمەتى مەن سوتى, الاششىل “سارىارقا” گازەتى مەن “اباي” جۋرنالىنىڭ رەداكتسيالارى, باسپاحاناسى ورنالاسقان عيماراتتار تاريحى تۋرالى تاريحي قۇجاتتار مولىنان پايدالانىلعان. ال “سيبير ي كازاحستان” اتتى كىتاپتى ەرلان ءباتتاش ۇلى سىبىرلىك شاكىرتى م.مالىشەۆامەن بىرىگىپ جازعان. ودان كەيىنگى “گونيمىە گولودوم”, “گورود الاش” اتتى ەكى كىتاپتا الاش تاقىرىبىنا قاتىستى قۇجاتتار جيناقتالىپ, دەرەكتەر سويلەيدى. ول ەكى كىتاپتى قۇراستىرۋشى دا اتالعان اۆتور. سول ءتورت كىتاپتىڭ تۇساۋى جۋىردا ۋنيۆەرسيتەتتە “كەشەگى الاش يدەياسى – بۇگىنگى تاۋەلسىز قازاقستان” دەگەن اتپەن وتكىزىلگەن دوڭگەلەك ۇستەل بارىسىندا كەسىلدى. دوڭگەلەك ۇستەل تۇرىندە وتكەن بۇل ەمەن-جارقىن سۇحباتقا عالي ءازىمباي, ەسەنعازى قۋاندىق, قايىربولات نۇرباەۆ, تۇرسىن حازىرەتالى سىندى تاريحشى عىلىم دوكتورلارى ارنايى كەلىپ قاتىستى. سىندارلى اڭگىمە بارىسىندا ەگەمەن ەلىمىزدىڭ قاتپارلى تاريحىن ەش بوياماسىز شىندىق تۇرعىسىندا قالىپتاستىرۋ تۋرالى كەڭىنەن ءسوز قوزعالدى. داۋلەت سەيسەن ۇلى, سەمەي. قازاقستان – قارقىندى دامۋ ۇستىندەگى ەل مەرەكەدە جاستاردىڭ ەلجاندىلىق قاسيەتى ايقىندالىپ, تاعى ءبىر قىرىنان تانىلدى جەتىسۋ جەرىندە ءوڭىر ەكونوميكاسىن وركەن­دەتۋ مەن الەمدەگى الدىڭعى قاتارلى ەلۋ ەلگە جە­تۋدى كوزدەگەن مەملەكەت باسشىسىنىڭ “ينتەل­لەك­تۋالدى ۇلت-2020” ۇلتتىق جوباسىن جۇزەگە اسىرۋ ماقساتىندا جاستارعا جان-جاقتى ءبىلىم, تاربيە بەرۋ ارقىلى باسەكەگە قابىلەتتى ادام كاپيتالىن قالىپتاستىرۋداعى جۇ­مىستار جۇيەلەنگەن. ناتيجەسىندە جىل باسىنان بەرى وبلىستا جاستار فەستيۆالىنىڭ جالاۋى كوتە­رى­لىپ, مەرەكەلىك شارا اۋدان مەن قالالاردا جا­راسىم تابۋدا. وسىنداي جاستار جيىنى بالقاش اۋدانىنىڭ باقاناس اۋىلىندا ءوتىپ, ول جۇرەگى ەلىم دەپ سوققان جاستار بەلسەندىلىگىمەن ءوربىدى. شارادا مەملەكەتىمىزدىڭ مىزعىماس بىرلىگى مەن حالقىمىز تاتۋلىعىنا, وتان­سۇيگىشتىگىنە ارنالعان كورنەكىلىكتەر انادايدان كوز تارتىپ, قوعامدىق ۇيىم مەن مەملەكەتتىك مەكەمە وكىلدەرى ىقىلاسپەن اتسالىسقانىن ايت­قان ءلازىم. جاستار ەلباسىنىڭ “جاس وتاننىڭ” العاشقى قۇرىلتايىندا سويلەگەن سوزىندەگى “مەن قازاقستاندىق جاستاردىڭ دانىشپان اباي اتامىزدىڭ “جاستىقتىڭ اتى ارىنداپ, تاس قياعا ورلەدىم” دەگەنىندەي, بولاشاقتى قۇرۋعا تاس-ءتۇيىن دايىن ەكەندىگىن كورىپ قۋانىپ تۇرمىن. كەڭ-بايتاق قازاقستاننىڭ ۇكىلەگەن ءۇمىتى سەن­دەرسىڭدەر, مەنىڭ جاس دوستارىم!” دەسە, بالقاش­تىق جاستار كوگىلدىر تۋ مەن ەلتاڭبانى بيىككە كوتە­رىپ, ءانۇراندى اۋەلەتە شىرقاپ, وسى شاقى­رۋ­عا جاۋاپ بەردى. وسىلايشا ەلىمىزدىڭ ايبىنىن اسىرۋداعى ەڭسەسى بيىك, ەرتەڭى جارقىن جەتكىن­شەكتەردىڭ قاتارى مول ەكەنىن تانىتىپ, شات-شادىمان مەرەكەلىك كوڭىل-كۇيدى اسپانداتتى. جاستار الدىندا سويلەگەن بالقاش اۋدانى­نىڭ اكىمى ەرعازى قوشانبەكوۆ جاستار حالىقتىڭ رۋحىن, ۇلتتىق سەزىمىن, قاھارماندىعىن, دارا­لى­عىن ايشىقتايتىن تاۋەلسىز ەل ۇلاندارى رەتىندە قالىپتاسقانىنا توقتالدى. باستاماشىلدىققا قۇمارلىق, ومىرگە ىڭكارلىك – ولارعا ءتان قاسيەت. جاستاردىڭ وقۋى مەن ەڭبەك ەتۋىنە جول اشىلىپ, مەملەكەت بولاشاعىنىڭ تىزگىنىن ۇستايتىن ازا­ماتتار رەتىندە قالىپتاسۋلارى قاجەت. جاستار تاربيەسىنە لايىقتى نازار اۋدارىلىپ, ولاردى ەڭبەككە دايارلاۋداعى جۇمىستار شەشىمىن تاپسا, وتكەن مەرزىمدە 40-تان استام جاس كاسىبي مامان­دىق الۋ ءۇشىن قايتا وقىتىلعان. وسىنشاماسىن قوعامدىق جۇمىسقا جىبەرۋ ارقىلى ماسەلە وڭ شەشىمىن تاپسا, وبلىس اكىمىنىڭ ارنايى گرانتى­مەن جوعارى وقۋ ورنىندا بەس بالا ءبىلىم الۋدا. جاس­تارعا جاڭا ۇيلەردەن پاتەر بەرىلىپ, الماتى­داعى جوعارى وقۋ ورىندارىنداعى 50 ستۋدەنتتىڭ بارىپ كەلۋى تەگىن ۇيىمداستىرىلىپ وتىر. مەملەكەت باسشىسىنىڭ “ديپلوممەن – اۋىلعا” شاقىرۋىنا وراي جاس ماماندارعا كوتەر­مە اقى, باسپانا الۋ ءۇشىن 890 مىڭ تەڭگەدەن 15 جىلعا پايىسسىز نەسيە بەرىلگەنىن دە اۋدان اكىمى ءوز سوزىندە ناقتىلادى. جاستار سالاماتتى ءومىر سالتىن مۇرات ەتۋمەن قاتار, ەلدى مەكەندەردى كوگالداندىرۋ, قۇرىلىس جۇمىس­تارىندا دا ءوز قولتاڭبالارىن قالدىرعانىن ايتۋعا بولادى. بۇدان سوڭ “نۇر وتان” حالىقتىق-دەموكرا­تيا­لىق پارتياسى وبلىستىق فيليالى توراعا­سى­نىڭ ورىنباسارى س.ابدىقادىروۆ, وبلىستىق ىشكى ساياسات باسقارماسىنىڭ باستىعى گ.سۇلەيمەنوۆا, تاعى باسقالار ىنتىماق پەن بىرلىك بار جەردە قايتارىمدى ەڭبەك ەتۋ مەن ءومىر ءسۇرۋ باقىتىنا قاجەتتى مۇراتتارعا كەدەرگى جوقتىعىن, ورتاق شاڭىراقتىڭ يگىلىگىنە ەڭبەك ەتۋ جاستاردىڭ پارىزى ەكەندىگىن اتاپ كورسەتە سويلەدى. “قازاقستان – دامۋشى, گۇلدەنگەن ەل” مەرە­كە­سىنە جيىرمادان اسا ەلدى مەكەن جاستارى قاتى­سىپ, جاستىق جالىنى مەن ەلجاندىلىق سەزىم­دە­رىن اسقاقتاتىپ, جازدىڭ اپتاپ ىستىعىنا قارا­ماستان, ۇلتتار اراسىنداعى دوستىق پەن بەيبىت ءومىردىڭ سالتاناتىنا باعىتتالعان باعدارلامانى كورسەتۋ ارقىلى ەرتەڭىمىزدىڭ نۇرلى, كەلەشە­گىمىزدىڭ كەمەل ەكەنىن ايقىندادى. بۇگىنگى بەيبىت ومىردە ەڭبەك ەتىپ, باقىتتى عۇمىر كەشۋگە قاجەتتىلىكتىڭ بار ەكەندىگى ايقىن كورىنىس تاۋىپ, ۇلكەن مەن كىشى بىرلىگىنىڭ بەرىكتىگى تاعى ءبىر قىرىنان كورىندى. كۇمىسجان بايجان, الماتى وبلىسى. بالالار وزدەرىن باقىتتى سەزىنگەن كۇن “بىرلىگىمىز جاراسقان!” اكتسياسى شەڭبەرىندە قوستاناي قالاسىندا مۇگەدەك بالالار ءۇشىن جات­تىعۋ ويىندارى وتكىزىلدى. قايتكەندە دە بالانىڭ اتى – بالا. ول ويىنمەن وسەدى, ويىنمەن داميدى. ۇيدە ارباعا تاڭىلىپ وتىرىپ قالعان بالالاردى جازدىڭ ماي توڭعىسىز كۇنىندە ويىن الاڭىنا الىپ شىعۋ ولارعا كەرەمەت قۋانىش سىيلادى. ويىن-جاتتىعۋلار مۇگەدەك بالالار دەنە قۇرىلىمىنىڭ ءوسۋىن قامتاماسىز ەتەدى, سونىمەن قاتار ولار تۇستەردى ايىرىپ ۇيرەنەدى. مۇنداي شارا قوستانايدا ءبىرىنشى رەت ءوتىپ وتىرعان جوق. 2000 جىلدان بەرى ناتاليا كو­لوس­­كوۆا باسقاراتىن “رادۋگا” قوعامدىق ۇيىمى مۇگەدەك بالالارىن كۇتىپ وتىرعان انالار ءۇشىن ءوز ۇيىندەي بولىپ كەتكەن. ولار وسى ۇيىم ارقىلى باس قوسىپ, بالالاردىڭ ەمى, ءدارى-دارمەگى تۋرالى كەڭەسەدى, ولارعا جاتتىعۋلار جاساتادى. “رادۋگانىڭ” الدىنا قويعان ماقساتى دا انا­لارعا پسيحولوگيالىق, مەديتسينالىق-الەۋمەتتىك جاعىنان قولداۋ-كومەك كورسەتۋ بولاتىن. سو­نىمەن قاتار, بۇل قوعامدىق ۇيىم مۇگەدەك بالا­لاردىڭ اناسىنا عانا ەمەس, تاعدىرى تالايلى جاستاردىڭ دا الەۋمەتتىك بەيىمدەلۋىنە, ولاردىڭ قوعامنان بەيتاراپ قالماۋىنا جاعداي جاسايدى. – ءبىزدىڭ ۇيىم قازىر وقشاۋلىقتى سەزىنبەيدى, مەملەكەتتىك قۇرىلىممەن جانە باسقا دا قوعامدىق بىرلەستىكتەرمەن ارىپتەس رەتىندە تىعىز بايلانىس ورناتىپ, بالالارىمىزدىڭ پروبلە­ما­لارىن شەشۋ جولدارىن قاراستىرامىز, – دەيدى “رادۋگا” قوعامدىق ۇيىمىنىڭ ءتورايىمى نا­تاليا كولوسكوۆا. – پرەزيدەنتىمىزدىڭ الەۋمەتتىك ساياساتىنىڭ بارلىق اسپەكتىلەرى شىنايى ومىرلىك ەكەنىنە ءبىزدىڭ كوزىمىز انىق جەتىپ وتىر. مۇگەدەك بالالاردىڭ جاتتىعۋ-ويىنىنا وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باستىعى شولپان جاكەتوۆا باستاعان الەۋمەتتىك قىزمەتكەرلەر كەلدى. – ۇستىمىزدەگى جىلى ءبىز الەۋمەتتىك-مەملەكەتتىك سۇرانىستى ەداۋىر ۇلعايتتىق, سونى ورىنداۋشىنىڭ ءبىرى “رادۋگا” قوعامدىق ۇيىمى, – دەيدى شولپان ساپارعاليقىزى. ال بالالارعا مەملەكەتتىك ارحيتەكتۋرا-قۇرىلىس باقىلاۋ باسقارماسى دەمەۋشىلىك كورسەتتى. مىنە, ىنتىماقتىڭ ارقاسىندا مۇگەدەك بالالار قامقورلىقتان شەت قالمايدى. جاتتىعۋ-ويىن ۇستىندە مۇگەدەك بالالار دا, ولاردىڭ انالارى دا وزدەرىن ءبىر ءسات باقىتتى سەزىندى. ادامداردىڭ قولداۋىمەن, قورشاۋىمەن بىرگە بولعان ساتتەردىڭ قۋانىشى كوپكە دەيىن كىشكەنتاي جۇرەكتەردى تەربەپ تۇردى. ءنازيرا جارىمبەتوۆا, قوستاناي.