ۆيدەودان الىنعان كادر
تالداۋ ناتيجەسىندە سۋ سىنامالارىندا سۋلفاتتاردىڭ مولشەرى جوعارى ەكەنى انىقتالعان. ساراپشىلاردىڭ پىكىرىنشە, ءدال وسى فاكتور بالىقتاردىڭ قىرىلۋىنا سەبەپ بولعان. الدىن الا مالىمەت بويىنشا, لاستانۋ ونەركاسىپتىك قالدىقتارمەن بايلانىستى.
قىشقىل ەرىتىندى كارىز قۇبىرىنا توگىلگەن, سودان كەيىن قۇبىر جارىلعان. سۋدىڭ اگرەسسيۆتى حيميالىق قۇرامىنا بايلانىستى توگىندىنى بىردەن توقتاتۋ مۇمكىن بولماعان. بىرنەشە ساعات بويى لاستانعان اعىن سۋ وزەنگە قۇيىلىپ وتىرعان.
«شىمكەنت قالاسى اۋماعىندا ورنالاسقان بادام وزەنىندە بالىقتىڭ قىرىلۋ فاكتىلەرى بويىنشا ارال − سىرداريا وبلىسارالىق باسسەيندىك بالىق شارۋاشىلىعى ينسپەكتسياسىمەن بىرگە قۇزىرلى ورگاندار ءتيىستى زەردەلەۋ جۇمىستارىن جۇرگىزدى. «ەلامان» شاعىن اۋدانى باعىتىنا قاراي تارتىلعان كاناليزاتسيا قۇبىرىنىڭ جارىلۋىنا بايلانىستى بالىق قىرىلۋ فاكتىسى انىقتالدى», دەلىنگەن اشم بالىق شارۋاشىلىعى كوميتەتىنىڭ مالىمدەمەسىندە.
بالىق سىنامالارى شىمكەنت قالاسى بويىنشا اۋماقتىق ۆەتەريناريا ينسپەكتسياسى مەن سانيتارلىق-ەپيدەميولوگيلىق باقىلاۋ دەپارتامەنتىنە جولداندى. سونىمەن بىرگە, شىمكەنت قالاسى بويىنشا ەكولوگيا دەپارتامەنتىنىڭ قىزمەتكەرلەرى سۋ سىنامالارىن الىپ, ءتيىستى ەكسپەرتيزاعا جىبەردى. 2-5 جاستاعى قارابالىقتاردىڭ شوعىرلارى, تورتا, تيبەت تالما بالىعى مەن وزەن اببوتينالارى تىركەلگەن.
«قازىر تابيعاتقا كەلتىرىلگەن زالالدى انىقتاۋ ماقساتىندا ولگەن بالىق شاباقتارىن جيناۋ جۇمىستارى جۇرگىزىلىپ جاتىر. سونىڭ ناتيجەسىندە قۇقىق بۇزۋشىعا ءتيىستى شارالار قابىلدانادى», دەلىنگەن حابارلامادا.
ەكولوگتار تۇرعىنداردى قورشاعان ورتاعا ۇقىپتى قاراۋعا جانە قانداي دا ءبىر زاڭبۇزۋشىلىقتار انىقتالعان جاعدايدا ءتيىستى ورىندارعا دەرەۋ حابارلاۋعا شاقىردى.
