«Qyzyljar» ارنايى ەكونوميكالىق اۋماعىندا اشىلعان كاسىپورىن تولىق قۋاتىندا جۇمىس ىستەگەندە 300-دەي ادامعا جەتكىلىكتى جۇمىس ورنى قۇرىلادى. ارنايى ەكونوميكالىق ايماقتا ورنالاسۋدىڭ ەرەسەن ارتىقشىلىعى – جەر تولەمىنەن, باسقا دا سالىقتاردان بوساتىلادى. ءارى كومپانيا «دامۋ» قورىنان ەكىنشى دەڭگەيلى بانك ارقىلى 8%-دىق جەڭىلدەتىلگەن مولشەرلەمەمەن نەسيە العان. قوردىڭ سولتۇستىك قازاقستان وبلىستىق فيليالىنىڭ ديرەكتورى گۇلبارشىن داۋلەتباەۆانىڭ ايتۋىنا قاراعاندا, بيىل 309 جوبا قارجىلاندىرىلعان.
«سونىڭ ءبىرى – اشىلىپ وتىرعان وسى زاۋىت. ەندى بۇل كاسىپورىن قالاداعى جۇمىسى جاقسى جۇرەتىن ءوندىرىس وشاعىنىڭ بىرىنە اينالاتىن شىعار دەگەن ءۇمىت بار», دەيدى ول.
زاۋىت ءونىم وندىرۋگە قازىردىڭ وزىندە كىرىسىپ كەتتى. ەندى ءبىر جارىم ايدان سوڭ تاۋارلارىن شەتەلگە ەكسپورتتاي باستايدى.
پەتروپاۆلدا اعاشتى وڭدەپ, فانەر شىعاراتىن ءبىر زاۋىت 2020 جىلى اشىلعان. ول «سولتۇستىك فانەر زاۋىتى» دەپ اتالادى. ونىڭ قۇنى 5 ملرد تەڭگە بولعان ەدى. ەندى سول قاتارعا مىنا زاۋىت تا قوسىلىپ وتىر. ول اعاشتى تەرەڭدەپ وڭدەپ, جىلى پەللەت ماتەريالدارىن دا شىعارادى. وسىنداي ماتەريالداردى بۇرىن قۇرىلىس كومپانيالارى سىرتتان يمپورتتايتىن. ەندى سول يمپورتتىڭ 13%-ىن وسى زاۋىت ونىمدەرى جابادى.
ء«بىز اعاش وڭدەۋدە بۇل زاۋىتپەن شەكتەلمەيمىز. 2027 جىلعا دەيىن بىزدە «SFK Furniture» فيرماسى ءتۇرلى جيھاز شىعاراتىن, قۇنى 2,5 ملرد تەڭگەلىك جاڭا زاۋىت تۇرعىزادى. 2026 جىلى اعاش جاڭقالارىنان پليتكالار جاسايتىن زاۋىت تا ىسكە قوسىلادى. 2025 جىلى اعاش ماتەريالدارىن قۇراستىرۋعا قاجەتتى جەلىم, شايىر سياقتى حيميالىق كومپونەنتتەردى شىعاراتىن زاۋىت تا پايدالانۋعا بەرىلەدى. ونىڭ قۇرىلىسى قازىر اياقتالۋعا جاقىن», دەيدى وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باستىعى دارحان ءامرين.
ءسويتىپ, اعاش وڭدەۋ كلاستەرى قاتارىنا ءوڭىرىمىزدىڭ 30-دان ارتىق زاڭدى تۇلعاسى, 90 جەكە كاسىپكەرى قاتىساتىن كورىنەدى. بۇل جەرگىلىكتى, ارزان اعاش ماتەريالدارىن وڭدەۋدىڭ وزىق جولى بولماق.
الايدا كەسىلگەن ءاربىر اعاشتىڭ ورنىنا جاڭا كوشەت ەگىپ وتىرۋ جۇمىسى ۇمىت قالماسا بولدى. جىل سايىن تەرىسكەي ورماندارىندا جارتى ميلليون تەكشە مەتردەن ارتىق اعاش كەسىلەدى ەكەن. ءبىر بايتەرەكتى بەس مينۋتتا جوق قىلۋعا بولادى, ال ءوسىرۋ ءۇشىن ونداعان جىل كەرەك. سوندىقتان ونى ساقتاۋ مەن قالپىنا كەلتىرۋ جۇمىستارى قالاي ءجۇرىپ جاتقانىن وبلىستىق تابيعات رەسۋرستارى باسقارماسىنىڭ باستىعى بەيبىت ەسمانوۆتان سۇراعانىمىزدا, ول جىل سايىن 23 ميلليونداي اعاش, قاراعاي كوشەتى وتىرعىزىلاتىنىن ايتتى.
وبلىستا ورماندى قالپىنا كەلتىرۋگە ارنالعان 2025 جىلعا دەيىنگى ارناۋلى جوسپار دا بار. «وسى جوسپارعا سايكەس وبلىس اۋماعىنداعى 20 مىڭ گەكتار ورماندى القاپقا 100 ميلليون كوشەت وتىرعىزۋىمىز كەرەك. قازىر وبلىستاعى 12 ورمان شارۋاشىلىعى كاسىپورىندارىندا بۇل جۇمىس قىزۋ جۇرگىزىلىپ جاتىر», دەدى ول.
سولتۇستىك قازاقستان وبلىسى
