ال دايىندىعى جەتكىلىكسىز, تاجىريبەسى از ادامعا بۇل سايىس وڭايعا سوقپايدى. ەجەلگى زاماننان كەلە جاتقان بۇل ويىن جاۋگەرشىلىك كەزىندە نايزا ۇستاپ, قىلىش شاباتىن جاۋىنگەرگە قاجەتتى قاسيەتتەردى قالىپتاستىرعان. اۋدارىسپاق قازىرگى ۇلكەن جيىن-تويلاردا, مەرەكەلەردە سپورت ويىنىنىڭ ءبىر ءتۇرى رەتىندە كورسەتىلىپ ءجۇر.
سايىسقا قاتىسۋشىلار ءۇش سالماقتىق ساناتقا بولىنەدى. اۋدارىسپاققا سالماق ساناتقا ەنگىزۋدىڭ ماقساتى – قاتىسۋشىلارعا نەعۇرلىم تەڭ جاعداي تۋعىزۋ. ونى سپورتتىڭ ءبىر تۇرىنە اينالدىرۋ ءۇشىن ءبىر-بىرىنە تەڭ كەلەتىن سالماقتىق ساناتتى كوبەيتكەن دۇرىس. بۇل ساناتقا ءبولۋ كەيىنگى كەزدە قالىپتاستى. ەرتەدە كەز كەلگەن تىلەك ءبىلدىرۋشى ءوز ەركىمەن قاتىسا بەرەتىن بولعان. سپورتتىڭ بۇل ءتۇرىنىڭ دامۋىمەن بىرگە, ءسوز جوق, ونىڭ سالماقتىق ساناتى دا كوبەيە, كەڭەيە بەرەتىنى كۇمانسىز.
ويىندا اتى بەلدى, جارامدى, ءوزى مىقتى, اتقا وتىرىسى مىعىم, بىلەكتى جىگىتتەر جەڭىپ شىعادى. سايىپ كەلگەندە, اۋدارىسپاقتا نەگىزگى ءرولدى ات پەن ويىنشى جىگىتتەر اتقارادى. اتتار ۇستىندەگى ادامنىڭ ىڭعايىنا بەيىمدەلگىش, ارنايى ۇيرەتىلگەن بولۋى شارت. وسپادارلىق, جۇلا قاشۋ, سالىپ قالۋ, قول قايىرۋ سياقتى ايلا-امالداردى قولدانۋعا بولمايدى. اۋدارىسۋ ات پەن جىگىتتىڭ ۇيلەسىمدى قيمىل-بىرلەستىگىنە سۇيەنە وتىرىپ, كۇش-جىگەردىڭ باسىمدىعىن كورسەتەتىن قالىپتى, بايسالدى شەبەرلىككە ۇلاسىپ جاتۋى شارت.
