ءسىبىر جاراسى اۋىلدىقتاردى الەككە سالۋدا

مالداردىڭ وسى اۋرۋعا قارسى ەگىلمەگەنىن بىلە تۇرا, ولاردىڭ جاپپاي قىرىلا باستاعانىنان سەكەم الىپ, اۋىل اكىمدەرى دارىگەرلەرگە دەر كەزىندە حابارلاۋى كەرەك ەدى. جالپى, اۋىلدىق اۋماقتار بويىنشا تۇرعىندارعا بۇل جايىندا حابارلاپ, ساقتاندىرۋ شارالارى اتقارىلماعان. اقسۋ قالاسى اۋماعىنا قاراستى اۋىلداردا ورىن العان ادام ولىمىنە اكەلگەن توتەنشە وقيعا مال ۇستاپ وتىرعان وبلىستىڭ باسقا اۋداندارىنىڭ اۋىل اكىمدەرىنىڭ جۇمىستارىنا ساباق بولار دەگەن ويدامىز. ادام ولىمىنە الىپ كەلگەن مۇن­­داي اۋىر ىندەت اقسۋ قالاسى جول­قۇدىق اۋىلدىق اۋماعىنا قاراستى رەۆروۆكا جانە قاراكول اۋىلدا­رىندا ورىن الدى.وكىنىشكە قاراي, جەكە اۋلاسىندا ءوزى سويعان مالدىڭ ءسىبىر جاراسى اۋرۋىن جۇقتىر­عا­نىنان مۇلدە حابارسىز اۋىل تۇر­عىنى وسى ىندەتتىڭ كەسىرىنەن اۋرۋ­حانادا كوز جۇمدى. ودان كەيىن دە وسى اۋىلدىڭ تاعى دا ءتورت تۇرعىنى وزدەرىن جايسىز سەزىنىپ, اۋىرا باس­تاعان, قازىر ولار دا اۋرۋحانادا جاتىر. دارىگەرلەر ولاردى باقى­لاۋدا ۇستاپ وتىر. اۋىرعان مالدى لاقتىرۋعا قيماي, اۋىل ادامدارىنا تاراتىپ بەرگەن سالاقتىق پەن جاۋاپسىزدىقتىڭ اياعى, مىنە, وسىنداي قايعىلى جاعدايلارعا الىپ كەلدى. سونىڭ كەسىرىنەن تاعى 80-گە جۋىق ادام دارىگەرلەردىڭ باقىلاۋىنا الىندى. تاعى ءبىر ادام اۋىر حالدە جاتىر. جالپى, وسى اۋىلدىق اۋماقتا ماۋسىم ايىنان بەرى 5 مال ولگەن كو­رىنەدى. الايدا, مالداردىڭ ولگە­نىن جاپپاي ۋلانۋ دەپ قاراپ, مال دارىگەرلەرىنە حابار بەرمەستەن ەتى ءبىر ەمەس, ەكى بىردەي اۋىل ادام­دا­رىنا تاراتىلىپ بەرىلگەن. مەم­لە­كەتتىك سانيتارلىق-ەپيدەميو­لو­گيالىق قاداعالاۋ كوميتەتىنىڭ باستىعى قانات ساكيەۆ جۋرناليس­تەر­مەن وتكىزگەن ءباسپاسوز ءماسلي­حاتىندا “مالداردىڭ قانداي ءىن­دەتكە ۇشىراعانىن مال دارىگەر­لەرىنىڭ وزدەرى بىلمەي وتىرسا, قا­راپايىم اۋىل تۇرعىندارىنا نە اي­تۋعا بولادى. پوليتسەيلەر ولگەن مال­داردى تاۋىپ الدى. قازىر ولار­دى كومىپ, ورتەۋ جۇمىستارى ءجۇر­گىزىلۋدە”, – دەدى. اۋىلداعى مالدار­دىڭ ءسىبىر جاراسى اۋرۋىنا قارسى ەگىلمەگەنى, ەگۋ جۇمىستارىنا قاجەت­تى ءدارى-دارمەكتەردىڭ دەر كەزىندە جەتكىزىل­مەگەنى دە انىقتالىپ وتىر. بۇل اۋىلداردا مالدار اراسىنداعى ءسىبىر جاراسى ىندەتى سوناۋ 1967 جىلى تىركەلىپتى, مال ماماندارى بۇل قوزدىرعىش ىندەت توپىراقتا 60 جىل ءومىر سۇرەدى جانە ساقتالادى دەيدى. فاريدا بىقاي, پاۆلودار.