فوتو: مۋزىكالىق جاس كورەرمەن تەاترىنىڭ ءباسپاسوز قىزمەتى
ءداستۇرلى ونەر مەرەكەسى بيىل اباي اتىنداعى مەملەكەتتىك سىيلىقتىڭ يەگەرى, جازۋشى-دراماتۋرگ روزا مۇقانوۆانىڭ «ماڭگىلىك بالا بەينە», «فاريزا», «بوپاي حانىم», «ساررا» شىعارمالارىن ارقاۋ ەتتى. بۇگىندە روزا مۇقانوۆاداي تەاتر ءۇشىن ءوندىرتىپ جازعان قالامگەرلەر نەكەن-ساياق. ول تەاتر قورجىنىن نەبىر تاعىلىمدى تۋىندىلارىمەن بايىتقان قۋاتتى قالام يەسى.
«جازۋدا جالعان بولمايدى. جازۋدا اقيقات بولادى. جاننىڭ تازالىعى بولادى. مەن تىم جاس كەزىمدە, وتىزعا تولماعان شاعىمدا «ماڭگىلىك بالا بەينە» دەگەن پەسامدى قارا شاڭىراق مۇحتار اۋەزوۆ اتىنداعى قازاق دراما تەاترى, رەفورماتور, رەجيسسەر مارقۇم بولات اتاباەۆ مەنىڭ جاستىعىما قاراماي ساحناعا شىعاردى. ول كەزدە اۋەزوۆ تەاترىندا تەك قانا كلاسسيكتەردىڭ شىعارمالارى قويىلاتىن. وسىناۋ حالىقارالىق فەستيۆالگە كەزىندە مۇحتار اۋەزوۆتىڭ «قارالى سۇلۋىنىڭ» ينستسەنيروۆكاسىن جاساعان بولاتىنمىن. قىرعىز تەاترى سول شىعارما جەلىسىندەگى قويىلىمىن, ازەربايجان تەاترى «شاتىر استىنداعى مەن» تراگيكومەدياسىن الىپ كەلدى. بۇل ءبىزدىڭ كورەرمەندەردىڭ قولى جەتە بەرمەگەن شىعارمالار. سوندىقتان دا تەاترلارىمىزدىڭ ەسىگى ايقارا اشىق, سپەكتالدى كورۋگە كەلىڭىزدەر!», دەيدى جازۋشى-دراماتۋرگ, قازاقستاننىڭ ەڭبەك سىڭىرگەن قايراتكەرى روزا مۇقانوۆا.
فەستيۆالدىڭ اشىلۋ سالتاناتى كەزىندە ارتىستەر مەن قاتىسۋشىلار قىزىل كىلەممەن ءجۇرىپ ءوتتى. ايتۋلى فەستيۆال مۇحتار اۋەزوۆ اتىنداعى قازاق ۇلتتىق دراما تەاترى ازىرلەگەن «ماڭگىلىك بالا بەينە» سپەكتاكلىمەن اشىلدى.
«بۇگىن ءبىز ءبىر اپتا بويى استانا قالاسىنىڭ اكىمدىگى, مادەنيەت باسقارماسى, مادەنيەت جانە اقپارات مينيسترلىگىنىڭ قولداۋىمەن ۇلكەن تەاتر مەرەكەسىن سالتاناتتى تۇردە اشىپ جاتىرمىز. بۇل فەستيۆالدىڭ مازمۇنى, كوتەرگەن جۇگى, اتقارار قىزمەتى بارشامىزعا بەلگىلى. ەلدىڭ ىقىلاسىنا بولەنگەن جازۋشى-دراماتۋرگ روزا مۇقانوۆانىڭ شىعارماشىلىعىنا ارنالدى.
تۇركى دۇنيەسى, تۇركى مادەني كەڭىستىگىندە دە روزا مۇقانوۆا تۋىندىلارىنىڭ شوقتىعى بيىك. «ماڭگىلىك بالا بەينە», «سارا», «بوپاي حانىم» وسى قويىلىمداردىڭ بارلىعى دا رۋحاني قۇندىلىعىمىزدى دارىپتەيتىن ومىرشەڭ تۋىندىلارعا اينالدى. فەستيۆالدىڭ ماقساتى دا سول, روزا مۇقانوۆانىڭ دراماتۋرگياسىن دارىپتەۋ. وسى جولى جاڭا ەسىمدەردى اشقىمىز كەلەدى», دەدى مۋزىكالىق جاس كورەرمەن تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى اسحات ماەميروۆ.
ەلىمىزدىڭ تۇكپىر-تۇكپىرىنەن جينالعان بەلدى ۇجىمدار مەن قىرعىزستان, ازەربايجاننان كەلگەن ارتىستەر ءبىر اپتا بويىنا باس قالاداعى ساحنالاردا ونەر كورسەتەدى. حالىقارالىق تەاتر فەستيۆالى 3 قاراشاعا دەيىن جالعاسادى.
ال ولاردىڭ قارىم-قابىلەتىن كوزىقاراقتى كورەرمەنمەن بىرگە, ءاليا بوپەجانوۆا, امانگەلدى مۇقان, انار ەركەباي سىندى بەلگىلى مادەنيەت مايتالماندارى باعالايتىن بولادى.
گۇلشات ساپارقىزى.
