سۋرەتتەردى تۇسىرگەن – جانگەلدى ابدىعالىم
پرەزيدەنتتىڭ «اۋەجايلارىمىزدىڭ جۇك تاسىمالداۋ مۇمكىندىگىن ارتتىرۋ ءۇشىن بارلىق جاعدايدى جاساۋ كەرەك» دەگەن تاپسىرماسىن قاراعاندى اۋەجايى كوپكە سوزبادى. بيىل «سارىارقا» اۋەجايى بازاسىندا «CargoHubKaraganda» مۋلتيمودالدى اۋە حابى قۇرىلادى. بۇدان كەلەر يگىلىك – جۇك تاسىمالى ەداۋىر ۇلعايىپ, حالىقارالىق لوگيستيكا مۇمكىندىگى ارتادى.
قاراعاندى اۋەجايىنىڭ جۇك اۋە حابى رەتىندە الەۋەتى اجەپتاۋىر. ەلىمىزدەگى اۋەجايلار ىشىندە جۇك تاسىمالداۋ بويىنشا الماتىدان كەيىنگى ورىن وسى «سارىارقاعا» تيەسىلى.
ء«بىز جۇك ۇشاقتارىنىڭ تەحنيكالىق قونۋىنا جاعداي جاساپ وتىرمىز. سول ارقىلى وپەراتورلار تارتامىز. ۇشاقتار وسىندا قونىپ, جانارماي قۇيادى, ەكيپاجدارىن اۋىستىرادى, شاعىن تەحنيكالىق قىزمەت كورسەتىلەدى. جۇك تاسىمالداۋ سالاسىندا 10 جىلدان اسا جۇمىس ىستەپ كەلەمىز», دەيدى «سارىارقا» اۋەجايىنىڭ باسقارما توراعاسى رۋسلان عابباسوۆ.
«سارىارقا» اۋەجايىنىڭ جۇك تاسىمالىنا اۋەلى ورنالاسقان ورنى ءتيىمدى. وڭتۇستىك-شىعىس ازيا ەلدەرىنەن ەۋروپاعا اپاراتىن ەڭ قىسقا جول ءدال وسى قاراعاندى ۇستىمەن وتەدى. جۇك وڭدەۋ جىلدامدىعى, باعا ارزاندىعى مەن قىزمەت ساپاسىنىڭ جوعارىلىعىمەن دە ەرەكشەلەنەدى. اۋەجاي بۇگىنگى كۇنى ەكۆادور, نيدەرلاند, بەلگيا, وڭتۇستىك-شىعىس ازيادان ەلەكترونيكا, اۆتوكولىك پەن ازىق-ت ۇلىك, باسقا دا ءتۇرلى تاۋار تاسيتىن رەيستەرگە قىزمەت كورسەتەدى. مۇنىمەن قوسا, اۋەجايعا ەكۆادوردان گۇل تيەلگەن 3 رەيس, امستەردامنان 1 رەيس, بەلگيادان 1 رەيس كەلەدى. حالىق تۇتىناتىن تاۋار جەتكىزۋشى گونكونگتەن دە رەيس بار. اپتا سايىن ەۋروپا مەن يزرايلدەن جەتكىزىلگەن 5 توننا ءونىم وڭدەلەدى. اسىرەسە كوكونىس پەن جيدەكتىڭ ءتۇر-ءتۇرى بار.
اۋەجاي الەۋەتى ارتىپ, جوعارىدا اتاپ وتكەن جوبا جەمىستى جۇزەگە اسسا, باسقا سالالارعا دا وڭ سەرپىن بەرەر ەدى. اتاپ ايتساق, جۇك كولىگىمەن تاسىمالداۋ جولعا قويىلادى. ەكيپاج مۇشەلەرى اۋىسىم كەزدە ايالدايتىن قوناقۇي سالىنادى. سايكەسىنشە, اۋەجاي قىزمەتكەرلەرىنىڭ جالاقىسى وسەدى.
بۇرىنىراقتا قاراعاندىدا گۇل ساتاتىن 200 نۇكتە بار ەدى. قازىر ولاردىڭ سانى 700-گە جەتتى. بۇعان بىردەن ءبىر سەبەپ – اۋەجايدىڭ 2015 جىلدان بەرى گۇل قابىلداي باستاۋى. جوعارىدا اتاپ وتكەنىمىزدەي, گۇل تاسيتىن رەيس كوپ. باستىسى, جىلدام جەتكىزەدى, باعاسى دا ءتيىمدى. اۋەجاي اۋماعىندا ورنالاسقان «كaragandy technical center» جشس قويماعا اپتا سايىن 5 بورتپەن 400 تونناعا دەيىن گۇل قابىلدايدى. قويما مەڭگەرۋشىسى ارمان نۇرماعامبەتوۆتىڭ ايتۋىنشا, گۇل اپتا سايىن جانە ايىنا ەكى رەت گونكونگتەن ءتۇرلى جابدىق كەلەدى.
«قويمالارداعى تەمپەراتۋرا رەجىمى – جۇكتىڭ ساقتالۋ رەجىمىنە قاراي –2 گرادۋستان +20 گرادۋسقا دەيىن. قويماعا كەلىپ تۇسەتىن گۇلدەر سۇرىپتالادى, كەدەندىك تازالاۋدان ءوتىپ, ءبىر كۇننىڭ ىشىندە ەلىمىزدەگى باسقا قالالارعا, تمد ەلدەرىنە جونەلتىلەدى. جەرگىلىكتى كاسىپكەرلەر دە گۇلدى وسى جەردەن الادى», دەيدى ارمان جاركەن ۇلى.
اۋەجايدىڭ دامۋى ءوڭىر ەكونوميكاسىنا دا وڭ اسەرىن بەرەدى. قازىر ينفراقۇرىلىمدى ارتتىرۋدىڭ قامىنا كىرىسكەن.
«كەيىنگى جىلدارى ينفراقۇرىلىمدى بەلسەندى تۇردە جەتىلدىرىپ جاتىرمىز. ۇشۋ-قونۋ جولاعى مەن جولاۋشى ۇشاقتارىنا ارنالعان تۇراق ورىندارىن جوندەدىك, زاماناۋي جابدىقتار ساتىپ الىپ, جۇكتەردى وڭدەۋ جىلدامدىعىن ارتتىرۋ ماقساتىندا بىلىكتى كادرلاردى تارتتىق. بۇل باعىتتاعى جۇمىستار ءالى دە جالعاسادى», دەيدى باسقارما توراعاسى.
جوعارىدا اتاپ وتكەن جوبا ءساتتى جۇزەگە اسسا, جىلىنا وڭدەلەتىن جۇكتىڭ كولەمى 15 مىڭ توننادان 200 مىڭ تونناعا دەيىن وسەدى. بەس-التى جىلدىڭ ىشىندە 2 000-عا جۋىق جاڭا جۇمىس ورنى اشىلادى. سايكەسىنشە, ەكۆادوردان تىكەلەي جۇك رەيستەرىن اشۋ ارقىلى حالىقارالىق ساۋدا داميدى. اپتاسىنا جۇك ۇشاقتارى 100 رەيسكە دەيىن كوبەيەدى. ۇشۋ-قونۋ جولاعىن جوندەپ, جولاۋشىلار تەرمينالىن قايتا جاڭارتۋ, جۇك تەرمينالىن سالىپ, مارشرۋتتىق جەلىنى كەڭەيتۋ اۋەجاي مۇمكىندىگىن ەسەلەي تۇسپەك.
جالپى, «سارىارقا» اۋەجايى جىلىنا 320 مىڭعا جۋىق جولاۋشىعا قىزمەت كورسەتەدى.
قاراعاندى وبلىسى
