مەرەكە اياسىندا اشىلعان نىساندار ءوڭىر تۇرعىندارىنىڭ ءومىر ساپاسىن ارتتىرۋعا باعىتتالعان. اتاپ ايتار بولساق, ۇلتتىق مەرەكەگە وراي ەڭبەكشىقازاق اۋدانى اششىساي اۋىلىندا 150 ادامعا ارنالعان جاڭا سپورت كەشەنى ىسكە قوسىلدى.
سونداي-اق رايىمبەك اۋدانى جامبىل اۋىلىندا 180 ورىندىق جاڭارتىلعان مادەنيەت ءۇيى جۇمىسىن باستادى, بۇل تۇرعىندارعا مادەني ءىس-شارالار ۇيىمداستىرىپ, تالانتتارىن دامىتۋعا مۇمكىندىك بەرمەك.
ءوڭىردىڭ اقدالا مەن كومىرشى ەلدى مەكەندەرىندە فەلدشەرلىك-اكۋشەرلىك جانە مەديتسينالىق پۋنكتتەر اشىلىپ, مەديتسينالىق قىزمەتتەردىڭ قولجەتىمدىلىگىن جاقسارتۋعا قادام جاسالدى.
حالىق تىعىز شوعىرلانعان قاراساي اۋدانىندا 60 وتباسى «قارلىعاش» تۇرعىن ءۇي كەشەنىنەن جاڭا پاتەرلەردىڭ كىلتىن الىپ, ۇلان-اسىر قۋانىشقا كەنەلدى. پاتەر يەلەرى مەرەكەدە قونىستوي جاساپ, شات-شادىمان بولدى.
ال مەگاپوليسپەن ىرگەلەس ىلە, تالعار اۋداندارىندا جانە الاتاۋ قالاسىندا بلوكتى-مودۋلدىك قازاندىقتار ىسكە قوسىلىپ, كوپقاباتتى تۇرعىن ءۇي يەلەرىنىڭ كوپتەن كۇتكەن قۋانىشىن ەسەلەدى.
مەرەيلى مەرەكە قارساڭىندا قوناەۆ قالاسىندا سالتاناتتى جيىن ءوتىپ, وعان ەلدىڭ دامۋىنا ەلەۋلى ۇلەس قوسقان ارداگەرلەر مەن قۇرمەتتى ازاماتتار قاتىستى.
«بۇل جىل ءبىز ءۇشىن ايرىقشا ماڭىزدى بولدى. 2024 جىلدىڭ العاشقى توعىز ايىندا وبلىسقا 615 ميلليارد تەڭگە ينۆەستيتسيا تارتىلىپ, بۇل وتكەن جىلمەن سالىستىرعاندا 32,8%-عا ءوستى. ونەركاسىپ ءوندىرىسىنىڭ كولەمى 1,4 تريلليون تەڭگەگە جەتسە, اۋىل شارۋاشىلىعى ونىمدەرى 480,6 ميلليارد تەڭگەگە جەتىپ, 1,9%-عا ءوستى. سونىمەن قاتار 777,1 مىڭ شارشى مەتر جاڭا تۇرعىن ءۇي پايدالانۋعا بەرىلدى, قۇرىلىس جۇمىستارىنىڭ جالپى كولەمى 243,8 ميلليارد تەڭگەگە تەڭ بولدى. جىل باسىنان بەرى 45 مىڭنان استام جاڭا جۇمىس ورنى اشىلدى, بۇل تۇرعىنداردىڭ ءال-اۋقاتىن ارتتىرۋدىڭ ماڭىزدى كورسەتكىشى. ءبىز دۇرىس باعىتتا كەلە جاتىرمىز, جانە بىرلەسە وتىرىپ, بۇدان دا ۇلكەن جەتىستىكتەرگە قول جەتكىزەمىز», دەدى الماتى وبلىسىنىڭ اكىمى مارات سۇلتانعازيەۆ.
سالتاناتتى شارادا وبلىستىڭ دامۋىنا ۇلەس قوسقان 30-دان استام ازامات مەملەكەتتىك ناگرادالارمەن ماراپاتتالدى. ولاردىڭ قاتارىندا ءتۇرلى سالا وكىلدەرى بار.
