ماعان بەرىلگەن جوعارى اتاقتى 26 جىل ەڭبەك ەتىپ, ماتەماتيكا پانىنەن ساباق بەرگەن №4 ارنايى مەكتەپ-ينتەرناتى ۇجىمىنا كورسەتىلگەن قۇرمەت رەتىندە قابىلدادىم. مەملەكەت باسشىسى ءبىلىم سالاسىن وركەندەتۋگە ءاردايىم ءمان بەرىپ, وسكەلەڭ ۇرپاقتىڭ جان-جاقتى دامۋىن قامتاماسىز ەتۋ ماقساتىندا زامان تالابىنا ساي ءبىلىم وشاقتارىن سالۋعا پارمەن بەرگەنى بەلگىلى. پەداگوگتەردىڭ مارتەبەسى ارتىپ, الەۋمەتتىك جاعدايىنا تۇراقتى كوڭىل ءبولىنىپ كەلەدى. قازىرگى كەزدە ىسكە اسىپ جاتقان «جايلى مەكتەپ» جوباسى بولاشاقتا جوعارى ناتيجەسىن بەرىپ, بالالار جاڭا زامان يگىلىگىن كورەتىن كۇندەر دە الىس ەمەس.
پرەزيدەنت جاستاردى ادال ازامات ەتىپ تاربيەلەۋ, ولاردىڭ بويىنا ىزگى قۇندىلىقتاردى ءسىڭىرۋ اسا ماڭىزدى مىندەت ەكەنىنە نازار اۋدارىپ وتىر. وسى ورايدا 80 جىلدىق تاريحى بار مەكتەبىمىزدە ماماندار بىلىكتىلىگىن ارتتىرۋ, زاماناۋي ادىستەمەلەرمەن قامتاماسىز ەتۋدەگى جۇيەلى جۇمىس جالعاسىن تاۋىپ كەلەدى. ءبىلىم بەرۋ سالاسىندا ەڭبەك ەتكەن 40 جىلدان استام تاجىريبەم ساپالى ءبىلىمنىڭ نەگىزى ۇستازدىڭ بىلىكتىلىگىمەن قاتىستى ەكەنىن كورسەتتى. جاھاندانۋ كەزەڭىندە بالالارعا ءبىلىم بەرۋمەن قاتار ەڭبەككە باۋلۋ, ءوز ەلىن ارداقتايتىن تۇلعا ەتىپ تاربيەلەۋ دە مۇعالىمنىڭ كاسىبيلىگىمەن تىعىز بايلانىستى. قازىرگى كەزدە تۇلەكتەرىمىز ءبىلىمنىڭ بيىگىنە شىعىپ, مەكتەبىمىزدىڭ مەرەيىن ۇستەم ەتىپ ءجۇر. وسى ورايدا مۇعالىم بولىپ ەڭبەك ەتىپ جۇرگەن بارشا ارىپتەستەرىمنىڭ ماڭداي تەر, ەسەلى ەڭبەگى ءاردايىم ەلەنە بەرسە ەكەن دەيمىن. ويتكەنى ۇستازدىققا ادالدىق ارقاشان جەمىسىن بەرەتىنى انىق.
گۇلجانار نۇرپەيىسوۆا,
قازاقستاننىڭ ەڭبەك ەرى,
№4 ارنايى مەكتەپ-ينتەرناتتىڭ ماتەماتيكا ءپانىنىڭ مۇعالىمى
الماتى
