تاۋ كۋرورتى – تابىس كوزى

تۇمسا تابيعاتىمەن تاڭداي قاق­تىرار وتاندىق تاۋ كۋرورتتارى تۋريزم سالاسىنىڭ ءبىر تىرەگى رەتىندە تەز دامىپ, شالعايداعى شەكارالى ايماقتاردىڭ زاماناۋي وركەندەۋىنە سەپتىگىن تيگىزىپ جاتىر. جاز شىعا قالانىڭ قاپىرىعىنان قاشىپ, ساف اۋا, سالقىن سامال ەسكەن تاۋعا بارىپ دەمالاتىندار مەن ەم الاتىنداردىڭ قاتارى جىلدان-جىلعا كوبەيىپ كەلە­دى. مۇنى رەسمي دەرەككوزدەرى دە دايەك­تەپ وتىر. تەك جازدا عانا ەمەس, قىس مەز­گىلىندەگى ساياحاتتىڭ ءسانى دەپ التاي تاۋلارى مەن الاتاۋ شىڭدارىن اتاۋعا بولادى. جازۋشى تولەن ابدىك اعامىز ايتىپ ەدى: «باياعىدا بىرەۋ: «بيىل دا پاريجگە بارعىم كەلەدى» دەيدى. «بىلتىر بارعانسىڭ با؟» دەپ سۇراسا, «بىلتىر دا بارعىم كەلگەن» دەپ جاۋاپ بەرەدى ەكەن». سول ايتقانداي, الاتاۋ مەن التايدىڭ قارلى شىڭدارىنا شىعىپ, دەمالىپ قايتۋدى ارمانداپ جۇرگەندەر كوپ ارامىزدا.

تاۋ ءتۋريزمىن تاسقىنداتار رەسۋرس­تار جەتەرلىك. ماسەلەن, ەلىمىزدىڭ بيىك شىڭدارى – حان ءتاڭىرى (6995 م), مەريديان جوتاسى (6276 م), تالعار شىڭى (4973 م), شوقتال تاۋى (كۇنگەي الاتاۋ, 4770 م), بەسا­قان تاۋى (4622 م), ىلە الاتاۋى (4600 م), مۇزتاۋ شىڭى (التاي تاۋى, 4506 م), ماناس شىڭى (تالاس (4482 م), سا­ۋىر تاۋى (3818 م). ونىڭ ىشىندە تۋريستەر مەن تاۋشىلار كوپ باراتىن تاۋ­لار ءبىز جوعارىدا اتاپ وتكەن الاتاۋ شاتقالدارى مەن التاي تاۋلارى ەكەن. قازىر الاتاۋدا «وزىڭمەن كۇرەس» دەگەن اتاۋمەن اۋەسقوي تاۋشىلاردىڭ سە­­رۋەنى ءجۇرىپ جاتىر. ولار تازا اۋامەن تىنىعىپ, تاۋعا شىعىپ, شىنىعىپ جۇرگەندەرىن ايتادى. ەلىمىزدەگى تاۋ كۋ­رورتتارىنىڭ احۋالى تۋرالى تۋريزم يندۋسترياسى كوميتەتىنەن سۇراستىرعان ەدىك, ماقتانىشپەن ايتارلىقتاي جاڭالىقتار بار ەكەن.

جاقىندا عانا كورشىلەس رەسەيدىڭ «مينەرالنىە ۆودى» كۋرورتتىق قالا­شىعىندا وتكەن حالىقارالىق تۋريستىك ايماقتار فورۋمى اياسىندا ەلىمىزدىڭ Oi-Qaragai مەن «شىمبۇلاق» تاۋ كۋرورتى «Ski Business Awards» نۇسقاسىندا تمد ەلدەرىنىڭ 150 تاۋ كۋرورتى اراسىندا ەڭ كوپ ماراپاتقا يە بولىپتى. دالىرەك ايتقاندا, «شىمبۇلاق» تاۋ كۋرورتى «تمد ەلدەرى اراسىنداعى ەڭ ۇزدىك تاۋ-شاڭ­عى كۋرورتى», «تاۋلى ايماقتاعى ەڭ ۇزدىك گلەمپينگ/كەمپينگ» ماراپاتىن جەڭىپ السا, Oi-Qaragai تاۋ كۋرورتى «ەڭ ۇزدىك IT شەشىم», «ەڭ ۇزدىك بالالار لاگە­رىنىڭ باعدارلاماسى» ماراپاتتارىن يەلەندى.

«شىمبۇلاق – جىل سايىن 1,5 ميلليوننان استام قوناق قارسى الاتىن, ءىرى سپورتتىق ءىس-شارالار وتكىزۋ تاجىريبەسىن بولىسە الاتىن, كۋرورتتىق اۋماقتىڭ بار­لىق الەمدىك ستاندارتتارىنا ساي, ين­فراقۇرىلىمى دامىعان, ەلىمىزدىڭ باستى كورىكتى ورىندارىنىڭ ءبىرى. 2023 جىلى ناۋ­رىزدا شىمبۇلاق تاۋ كۋرورتى الەمدەگى ەڭ بيىك تاۋ-شاڭ­عى بەتكەيى بولىپ, رەكورد ورناتتى. بەتكەيدىڭ بيىكتىگى – 3 200 مەتر. ال Oi-Qaragai – تيان-شان بەتكەيلەرىندەگى كوركەم جەردە ورنالاسقان ەڭ تانىمال وتاندىق تاۋ كۋرورتتارىنىڭ ءبىرى. كۋرورت شاڭعىشىلار مەن سنوۋبورد­شىلارعا ءتۇرلى سىرعاناۋ جولدارىن, زاماناۋي كوتەرگىشتەر مەن دامىعان ينفرا­قۇرىلىمىن ۇسىنادى», دەيدى Oi-Qaragai قىزمەتكەرى ماكسيم كوزلوۆ.

ساراپشىلاردىڭ ايتۋىنشا, Oi-Qaragai وتباسى دەمالىسىنا اي­رىقشا كوڭىل بولەدى, بالالار مەن جاس­وسپىرىمدەرگە ەرەكشە قولايلى. كۋ­رورت جاڭا تەحنولوگيالاردى, ونىڭ ىشىن­دە ءىت شەشىمدەردى كوپتەپ ەنگىزگەن.

«وتاندىق تاۋ كۋرورتتارىنىڭ حالىق­ارالىق دەڭگەيدە ۇزدىكتەردىڭ قاتارىنان كورىنىپ, ماراپاتقا يە بولعانى – ەلىمىزدىڭ تۋريستىك يندۋسترياسىنىڭ دامۋى مەن قىزمەت ساپاسىنىڭ جوعارى دەڭگەيدە ەكەنىن كورسەتەدى. «شىمبۇلاق» پەن Oi-Qaragai كۋرورتتارىنىڭ جەتىس­تىكتەرى وتاندىق ءتۋريزمنىڭ الەۋەتىن ارتتىرۋعا, الەمدىك نارىقتا باسەكەگە قابىلەتتىلىگىن نىعايتۋعا مۇمكىندىك بەرەدى. بۇل – ەلىمىزدەگى تۋريستىك ينفرا­قۇرىلىمدى دامىتۋعا باعىتتالعان جۇ­مىستاردىڭ ناتيجەسى. ءبىز الدا دا وسىنداي جەتىستىكتەرگە جەتۋ جولىندا بار كۇش-جىگەرىمىزدى جۇمسايمىز», دەيدى تۋ­ريزم جانە سپورت ۆيتسە-ءمينيسترى ەرجان ەركىنباەۆ.

ۆيتسە-ءمينيستردىڭ ايتۋىنشا, اتالعان جۇلدە 2023-2024 جىلعى ماۋ­سىم­نىڭ قورىتىندىسىنا ساي بەرىلدى. جەڭىمپازدار تاۋ كۋرورتى يندۋس­تريا­سىنداعى بەدەلدى ما­مانداردىڭ كوميسسياسى الدىندا جو­با قورعاۋ, تاۋ-شاڭعى دەمالىسىن ۇنا­تا­تىندار اراسىندا داۋىس بەرۋ ارقىلى تاڭدالعان.

«كوماندامىزدى وسى ايتۋلى جەتىس­­تىگىمەن قۇتتىقتايمىن. ءۇش جىل قاتا­رىنان ەڭ مارتەبەلى نوميناتسيا ەلى­مىزدىڭ ەنشىسىنە بۇيىردى. بۇل – جاقسى ناتيجە ءارى ءبىزدىڭ جۇمىسىمىزدىڭ ساپاسىن كور­سەتەدى. وسى جەتىستىككە جەتۋگە اتسالىس­قانداردىڭ بارىنە العىس ايتامىز», دەدى شىمبۇلاق تاۋ كۋرورتىنىڭ باس ديرەكتورى رينات ءابدراحمانوۆ.

ارينە, بۇل سالانىڭ تەز تانىلىپ, تابىس تابا باستاعانى قۋانتارلىق جايت. ايتكەنمەن «اتتەگەن-ايلار» دا از ەمەس. تاۋ ءتۋريزمى ەكى نەگىزگى باعىتقا جىكتەلەدى – الپينيزم, سپەلەوتۋريزم. ەكى باعىتقا دا قىزىعۋشى كوپ. تاۋشىلاردىڭ ايتۋىنا قاراعاندا, تاۋعا ءبىر شىعىپ, ء«تات­تىنىڭ» ءدامىن تاتقان ادامنىڭ قايتا-قاي­تا تاۋعا دەگەن اڭسارى اۋىپ تۇرادى. بىراق تاۋ تۋريزمىندەگى نەگىزگى تۇيتكىل – كەدەرگىلەر مەن قاۋىپ-قاتەر. بۇل قاتار­دا ءتۋريزمنىڭ ەڭ كۇردەلى تۇرلە­رىنىڭ ءبىرى – شاڭعى ءتۋريزمى. تاۋداعى تەمپە­راتۋرانىڭ تومەندىگى مەن بوران-شاشىندى قوسپاعاندا, ساياحاتتاۋشىلاردىڭ قاۋىپسىزدىگىن ساقتاۋ نەمەسە ولارعا جەدەل كومەك كورسەتۋ, قۇتقارۋ سەكىلدى سەرۆيستىك قىزمەتىنىڭ ساپاسى سىن كوتەرمەيدى. ءتىپتى بۇل رەتتە بالالاردىڭ دا جازىم بولعان وقيعالارى ەل ەسىندە بولۋى كەرەك. دەگەنمەن تاۋ ءتۋريزمى مۇنداي كەيىستى كەيستەرگە قاراماستان, قارقىندى دامىپ جاتقانىن جوعارىدا ايتتىق. ەندى بۇعان قوسا قىزمەت كورسەتۋ ساپاسىن جاقسارتىپ, ينفراقۇرىلىمىن دامىتسا – تاۋ ءتۋريزمى تابىس كوزىنە اينالارى ءسوزسىز.