2681 بالا وقيتىن, ارالاس تىلدە وقىتاتىن ورتا مەكتەپتە پاتريوت جاستاردى بىرىكتىرەتىن «جاس سارباز» قوزعالىسى, «وقۋعا قۇشتار مەكتەپ», «جاس سارباز» دەبات كلۋبى, «روبوتەحنيكا», «STEM» زەرتحاناسى, «مەنىڭ قالامنىڭ كوشەلەرى», «ۆەستنيك» راديو جاڭالىقتارى, «جاس سارباز», «مەكتەپ پارلامەنتى», «ادال ۇرپاق» ەرىكتىلەر كلۋبى, «جاس ءتىلشى», «باعدارلامالاۋ س++», سپورت سەكتسيالارى, اۆومودەلدەۋ, گيدروپونيكا, روبوتوتەحنيكا, تاعى باسقا ۇيىرمەلەر بەلسەندى جۇمىس ىستەيدى. ءتالىم بەرۋشى مۇعالىمدەردىڭ كوپشىلىگى تاجىريبەلى ماماندار, اتتەستاتتاۋدان وتكەن پەداگوگتار. بيىلعى تۇلەكتەردىڭ كوپشىلىگى جوعارى وقۋ ورىندارى مەن كوللەدجدەردىڭ ستۋدەنتتەرى, ەڭبەك ەتىپ جۇرگەن جاستار.
مەكتەپ ديرەكتورى ساۋلە ازيمحانوۆانىڭ ىسكەرلىگىنىڭ ارقاسىندا مەكتەپ تۇلەپ, جاڭارىپ, جاڭعىرۋ ۇستىندە.
مەكتەپ 1979 جىلى 31 تامىزدا اشىلدى. ءبىلىم ورداسىنىڭ اشىلۋىنا ۇلى تۇلعا دىنمۇحامەد قوناەۆ قاتىستى.
پەداگوگيكالىق ۇجىمنىڭ ءوتىنىشى بويىنشا استانا قالاسى اكىمدىگىنىڭ قاۋلىسىمەن 2001 جىلى №16 ورتا مەكتەپكە اقىن تولەگەن ايبەرگەنوۆتىڭ اتى بەرىلىپ, مەموريالدىق مۋزەيى اشىلدى.
اقىنعا ارنالعان مۋزەي 2007 جىلدان باستاپ جۇمىس ىستەيدى. مۋزەيدى اشۋعا مەكتەپتىڭ تاربيە ءىسى جونىندەگى ورىنباسارى اقبوتا ەساماتوۆا كوپ ەڭبەك ءسىڭىردى. سونداي-اق پوەزيا جاناشىرى, قوعامدىق ىستەرگە بەلسەنە قاتىسىپ جۇرگەن «قر مادەنيەت قايراتكەرى» وسپان سۇلەيمەن ۇلىنىڭ دا زور ۇلەسىن ايتپاي كەتۋگە بولمايدى.
«تولەگەن ايبەرگەنوۆ – ارتىنا وشپەس ءىز قالدىرعان قايتالانبايتىن تۇلعا. ول شىن مانىندە اقىن ەدى. شىعارماشىلىق بابىنا كەلگەن 30 جاسىندا مەزگىلسىز ومىردەن وزعان اقىننىڭ قازاق پوەزياسىنا اكەلگەن جاڭالىعى وراسان», دەيدى مۋزەيدىڭ جەتەكشىسى ءجۇسىپوۆا گاۋحار جەتەبايقىزى.
2018 جىلى نۇر-سۇلتان قالاسىندا وتكەن مەكتەپ مۋزەيلەرى اراسىنداعى بايقاۋدا ت.ايبەرگەنوۆكە ارنالعان مەكتەپ مۋزەيى باس جۇلدەنى جەڭىپ العان بولاتىن. «ۇزدىك مەكتەپ مۇراجايى – 2011» بايقاۋىنىڭ جەڭىمپازى, ديپلوم يەگەرى. «ۇزدىك مەكتەپ مۇراجايى - 2017» قالالىق بايقاۋدا 3-ورىن جەڭىمپازى اتانىپ, ديپلوم الدى. سونداي-اق ۇلتتىق مۋزەيدەگى قۇندى جادىگەرلەردىڭ كورمەسىنە قاتىستى.
«اقىننىڭ شىعارماشىلىعىن ناسيحاتتاۋ بارىسىندا كوپتەگەن ءىس-شارالاردى وتكىزىپ جاتىرمىز. اقىننىڭ مەرەيتويى جىلدارى ارنايى كونفەرەنتسيا وتكىزىپ, ول جايىندا جازىلعان ەسسەلەر بايقاۋىنىڭ جيناعىن شىعارىپ, جارىسسوزدەر, جىر كەشتەرىن, تاربيە ساباقتارىن تۇراقتى تۇردە وتكىزىپ كەلەمىز. اقىننىڭ ولەڭدەرىن جاتقا وقيتىن بالالار اراسىندا بايقاۋ جاريالاپ, مۋزەيگە تەك قانا اقىن ولەڭدەرىن جاتقا ايتاتىن وقۋشىلار عانا كىرەدى دەگەن تالاپ قويعانبىز», دەيدى گاۋحار جەتەبايقىزى مۋزەي ەكسپوناتتارىمەن تانىستىرا وتىرىپ.
اقىن اتىنداعى مەكتەپتە ونىڭ وتباسى بەرگەن قۇندى جادىگەرلەر – قول ساعاتى مەن قولدانعان ىدىس-اياقتارى جانە قىرىناتىن قۇرالدارى بار.
مۋزەي ەكسپوناتتارى وتە تالعاممەن جاساقتالعان. ءبىرىنشى قاتاردا ءوزى ومىردە ايرىقشا قۇرمەتتەگەن, ەرەكشە تاعدىر يەسى جىبەك انا مەن اقتوبەگە ارنالعان ستەندت ورنالاسقان. ودان كەيىن تۋىپ-وسكەن جەرى قاراقالپاق ەلىنىڭ قوڭىرات اۋدانى مەن اپالارىنىڭ فوتولارى جانە «اپالارىم» ولەڭى تۇر.
تولەگەننىڭ پوەزياسى تۋرالى جازۋشى ءابىش كەكىلباەۆ: «تولەگەن ايبەرگەنوۆ تۆورچەستۆوسى – ءولىمدى جەڭىپ شىققان ءومىر شاتتىعىنىڭ جىرى», دەيدى. جيىرمادان ەندى عانا اسقان شاعىندا قازاق پوەزياسىنىڭ تورىندە جارق ەتە قالعان اقىندى ادەبي ورتا بىردەن مويىندادى. ءابدىلدا تاجىباەۆ اقىننىڭ ولەڭدەرىنە العاش العى ءسوز جازىپ, ءباسپاسوز بەتىنە جاريالادى. سوعان قاراماستان اقىن كوزى تىرىسىندە جازۋشىلار وداعىنىڭ مۇشەلىگىنە ءوتىپ ۇلگەرمەيدى. قازىر تولەگەن ايبەرگەنوۆ اتىنداعى ادەبي سىيلىق بار. تولەگەن ايبەرگەنوۆتىڭ «ساعىنباي بارساڭ تاۋلار دا سەنىڭ, الدىڭنان شىقپاس اسقاقتاپ» دەگەن ولەڭ جولدارى ونەردى سۇيگەن, ءومىردى سۇيگەن اقىننىڭ وپتيميستىك جىرلارى ادامدى ومىرگە وزگەشە قىرىنان قاراۋعا ۇيرەتەدى.
تولەگەن ايبەرگەنوۆتىڭ اقىن ءىنىسى مۇحتار شاحانوۆقا ارناپ جازعان «ساعىنىش» اتتى ولەڭى ادەبي, مادەني ورتادا كەڭىنەن تانىمال بولسا, قاراپايىم حالىق ونىڭ ء«بىر تويىم بار» دەگەن ولەڭىن جاتقا وقيدى. استاناداعى تولەگەن ايبەرگەنوۆ اتىنداعى مەكتەپتىڭ وقۋشىلارى اقىننىڭ ولەڭدەرىن جاتقا ايتىپ, قالاداعى ءتۇرلى مادەني ءىس-شارالارعا قاتىسىپ ءجۇر.
شىن تالانتتار الىستاعان سايىن بيىكتەي بەرەدى. ساعىنىشتىڭ اقىنى, جىردىڭ جارىق جۇلدىزى تولەگەن ايبەرگەنوۆ شىعارماشىلىعى, جاستاردىڭ ولەڭدەرىن ناسيحاتتاۋى بۇعان كوزىمىزدى جەتكىزگەندەي.
سالتاناتتى ءىس-شارا كەزىندە قاتىسۋشىلار, كەش قوناقتارى تولەگەن ايبەرگەنوۆتىڭ مەموريالدىق مۋزەيىنە ساياحات جاساپ, مەكتەپ دالىزىندە قويىلعان «STEM – بارلىعى ءۇشىن» يننوۆاتسيالىق جوبالار كورمەسىمەن تانىستى. شىعارماشىل بالالاردىڭ جەل ديىرمەنى, سۋ قويماسىنا ارنالعان جوبالارى وتە قىزعىلىقتى, اسەرلى بولدى. بولاشاقتا عىلىمعا جاڭالىق اكەلەتىن عالىمدار شىعارىنا شىن كوڭىلىمىزبەن سەندىك, سەندىك تە وقۋشىلاردىڭ قىزىقتى جوبالارىمەن ەتەنە تانىستىق. «جاسىل ايماق» الاڭىنىڭ جۇمىسىمەن تانىسقان قۇرمەتتى قوناقتار الاڭدا الدىن الا دايىندالىپ قويعان ءتۇرلى-ءتۇرلى گۇلدەردى تىڭايتقىشتارىمەن بىرگە وتىرعىزىپ, گۇلگە ورانعان مەكتەپتىڭ دالىزىنە تاعى تاڭعاجايىپ ادەمى گۇلدەردى ەگىپ, وزىنە دە, وزگەگە دە كەرەمەت كوڭىل-كۇي سىيلادى.
قاتىسۋشىلار قىزدارعا ارنالعان زاماناۋي جابدىقتالعان تەحنولوگيا كابينەتىنىڭ اشىلۋ راسىمىندە بولىپ, مەكتەپتەگى ءانشى, مەگاجۇلدىز ديماش قۇدايبەرگەننىڭ ەسىمى بەرىلگەن مۋزىكا كابينەتىنىڭ اشىلۋ سالتاناتىنا قاتىستى.
ديماشتىڭ اجەسى ميۋا نيزامۋتدينوۆا, اناسى سۆەتلانا ايتباەۆا, استاناداعى مۋزىكالىق جاس كورەرمەندەر تەاترىنىڭ ديرەكتورى اسحات ماەميروۆ, تاعى باسقا ونەر مايتالماندارى قاتىسىپ, ۇلكەندەر شاشۋ شاشىپ, ونەر قايراتكەرلەرى ىزگى تىلەكتەرىن ءبىلدىردى. اقىننىڭ قىزدارى ماحاببات پەن اينار ايبەرگەنوۆالار تولعانا تىلەك ايتىپ, اينار تولەگەنقىزى اقىننىڭ ولەڭىن تەبىرەنە وقىپ بەردى. ەلوردالىق مۋزىكالىق جاس كورەرمەن تەاترىنىڭ اكتەرلارى اقىننىڭ ولەڭدەرىن مانەرلەپ وقىپ, ءانىن شىرقادى.
ەلوردا اسپانىن اقىننىڭ وتتى جىرلارىنا, اۋەزدى اۋەنگە بولەگەن كەش ۇيىمشىل مەكتەپ ۇجىمىنىڭ «مەكتەبىم – شامشىراعىم» اتتى مەرەكەلىك كونتسەرتى مەكتەپتىڭ گيمنىنە اينالعان اقىننىڭ «اتامەكەن» ولەڭىنە جازىلعان روزا القوجانىڭ عاجايىپ انىمەن تۇيىندەلدى. كەلگەندەر ۇستازدار مەن وقۋشىلاردان قۇرالعان اپپاق كيىنگەن كەلىستى حوردىڭ پاتريوتتىق رۋحپەن شىرقاعان انىنە ورىندارىنان تۇرىپ دۋ قول شاپالاقتاپ قوسىلىپ تۇردى.
و, ادامدار, بىرگەمىن مەن سەندەرمەن,
ىقىلاسىڭا ەش نارسەنى تەڭگەرمەن.
سەندەر مەنىڭ باقىتىمنىڭ بۇلاعى,
سەندەر مەنىڭ دارىنىما جەل بەرگەن.
وزدەرىڭمەن ءومىر شىڭىن بىرگە استىم,
جارتى قۇرتتى ءبولىپ جەدىم, سىرلاستىم.
دۇنيەگە كەلگەنىم جوق شەت ءجۇرىپ,
راقاتىن ويلاۋ ءۇشىن ءبىر باستىڭ.
گۇلستانعا اينالدىرعان تاقىردى,
بولات قولدار, العىر ميلار اقىلدى,
سۇيەمىن مەن, سۇيەمىن مەن سەندەردى
الار دەمىم قالعانىنشا اقىرعى.
مەنىڭ ءۇشىن بىردەي ءتىلىڭ, جىنىسىڭ, دەپ جىرلاعان, وتىزىندا باقيعا وزعان ايبەرگەنوۆتىڭ ساعىنىش تۇنعان جىرلارى جۇرەكتەرمەن سىرلاسىپ, جاساپ كەلە جاتىر. جاساي دا بەرمەك. ادام مەن ءومىردى ايبەرگەنوۆشە ءسۇيۋ, جىرلاۋ, كوز الدىڭدا جايناعان دۇنيەنى ايبەرگەنوۆتەي ساعىنۋ – بارشا ادامزاتقا بۇيىرسا, وندا جەر بەتى الدەقاشان جۇماق بولار ەدى. جاقسىنىڭ, جاقسى جىردىڭ شاراپاتى جاستارمەن, كەلەشەك ۇرپاقپەن ماڭگىلىك جاساي بەرمەك.
گۇلشات ساپارقىزى
