فوتو: Facebook / ەلدوس سمەتوۆ
پاريج وليمپياداسىنىڭ جەڭىمپازى ەلدوس سمەتوۆتىڭ جاتتىقتىرۋشىسى عالىمجان جىلگەلديەۆتىڭ جالاقىسى قىركۇيەك ايىنان باستاپ 4 ميلليون تەڭگەگە ءوستى. بۇل سپورت جانە دەنە شىنىقتىرۋ ىستەرى اگەنتتىگى توراعاسىنىڭ 2014 جىلعى 28 شىلدەدەگى بۇيرىعىنا سايكەس ورىندالعا. عالىمجان جىلگەلديەۆ قىركۇيەك ايىنا دەيىن اي سايىن 1 ميلليون تەڭگە جالاقى الاتىن.
جامبىل وبلىسى اكىمدىگىنىڭ ەكونوميكا جانە بيۋدجەتتىك جوسپارلاۋ باسقارماسىنىڭ ماماندارى بۇل جالاقىنىڭ كوتەرىلۋى سپورتشىلاردىڭ الەمدىك جارىستاردا جۇلدە الۋىنا بايلانىستى اۆتوماتتى قوسىمشا تولەم ەكەنىن حابارلادى.
ال ەلدوس سمەتوۆ وبلىس اكىمىنىڭ شەشىمىمەن ەڭ جوعارى جالاقى, ياعني 2 684 000 تەڭگە الادى. قازىر جامبىل وبلىسىنىڭ سپورت باسقارماسى چەمپيوننىڭ جالاقىسىن كوتەرۋ تۋرالى شەشىمگە وزگەرتۋلەر ەنگىزىپ جاتىر.
ەسكە سالا كەتەيىك, دزيۋدوشى ەلدوس سمەتوۆ پاريجدە وتكەن ءحححىىى جازعى وليمپيادا ويىندارىندا جەڭىسكە جەتىپ, چەمپيون اتانعان ەدى.
