وقۋشىلار اراسىنداعى بۋللينگ – قازىرگى زاماننىڭ ەڭ ۇلكەن الەۋمەتتىك ماسەلەلەردىڭ ءبىرى. ميلليونداعان بالا بۋللينگتىڭ قۇربانى بولىپ, زارداپ شەگىپ ءجۇر. ولاردىڭ كوبى ءوز جاعدايى تۋرالى ەشكىمگە اشىلىپ ايتا بەرمەيدى. وسى ماسەلەدە Aiden Bot كومەگى زور بولماق. ول مەكتەپتەگى اگرەسسيانىڭ العاشقى بەلگىلەرىن بىردەن بايقاپ, داۋىس ىرعاعىنان وقۋشىنىڭ ىشكى سەزىمدەرىن تانيدى. سودان كەيىن جاعدايدى مەكتەپ مۇعالىمدەرىنە نەمەسە پسيحولوگكە حابارلايدى.
حوسپيس روبوت
ادامنان كورمەگەن قامقورلىقتى ەندى روبوت جاسايدى.
حوسپيس قىزمەتى – بۇل اۋىر دەرتكە شالدىققان ناۋقاستارعا مەديتسينالىق جانە پسيحولوگيالىق كومەك كورسەتۋ. مۇنداي قىزمەت ءتۇرىن ەندى روبوتتار دا جاساي الادى. مىسالى, جاپونيادا قۇراستىرىلعان PARO اتتى روبوت-يتبالىق پاتسيەنتتەرگە ەموتسيونالدىق قولداۋ كورسەتكەن. ول ادامدارمەن بايلانىس ورناتىپ, وزدەرىن جالعىز سەزىنبەۋىنە جاعداي جاسايدى. وسىلايشا روبوت ناۋقاستىڭ كۇيزەلىسىن جەڭىلدەتەدى. سونىمەن قاتار قازىرگى كەزدە كۇتىم جاساۋعا كومەكتەسەتىن روبوتتار دا سىناقتان ءوتىپ جاتىر.
اپات سالدارىن جويۋعا كومەكتەسكەن
فۋكۋسيما-1 اتوم ەلەكتر ستانساسىنداعى جارىلىستان كەيىن اپات سالدارىن جويۋعا روبوتتار كومەكتەسكەن.
ادامدارعا قاۋىپتى رادياتسيا دەڭگەيىنە بايلانىستى اپات ايماعىندا جۇمىس ىستەۋ مۇمكىن بولمادى. سوندىقتان روبوتتار قۇتقارۋ جانە قالپىنا كەلتىرۋ جۇمىستارىندا نەگىزگى قۇرالعا اينالدى. باستاپقى كەزەڭدە ءارتۇرلى تەحنولوگيالار رادياتسيا دەڭگەيىن ولشەۋگە, جارىلعان رەاكتورلاردىڭ ءىشىن زەرتتەۋگە, بۇزىلعان ايماقتارعا كىرۋگە قولدانىلدى. ولار عيماراتتاردىڭ جاعدايىن باعالاپ, رادياتسيا تۋرالى دەرەكتەر جيناپ قاۋىپتى جەرلەردى زەرتتەدى. ماسەلەن, امەريكالىق Pack Bot پەن Warrior روبوتتارى رەاكتور اينالاسىنىڭ لاستانۋىن انىقتاۋ جانە اۋماقتىڭ جاعدايىن باقىلاۋعا قولدانىلدى. ال جاپوندار جاساعان Quince روبوتى كوپ قاباتتى رەاكتور عيماراتتارىنىڭ ىشىنە كىرىپ, جاعدايدى بايانداپ وتىرعان.
