فوتو: اشىق دەرەككوز
جالپىحالىقتىق رەيتينگتە قازاقستان ورتالىق ازيا مەملەكەتتەرى اراسىندا ەڭ ۇزدىك ناتيجە كورسەتىپ, 69-ورىنعا جايعاستى. ايتا كەتەيىك, بۇل جاھاندىق زەرتتەۋگە الەمنىڭ 197 مەملەكەتى ەنگەن.
رەيتينگ ادىستەمەسى 10 نەگىزگى باعىت پەن 50 جەكە ينديكاتوردى تەرەڭ تالداۋعا نەگىزدەلگەن. ولاردىڭ قاتارىندا مىناداي ماڭىزدى كورسەتكىشتەر بار:
- مەملەكەتتىڭ ەكونوميكالىق الەۋەتى;
- باسقارۋ جۇيەسىنىڭ تيىمدىلىگى;
- ىشكى جانە سىرتقى ساياسات;
- ينۆەستيتسيالىق تارتىمدىلىق;
- يننوۆاتسيالار مەن تەحنولوگيالاردىڭ دامۋ دەڭگەيى جانە باسقا دا ينديكاتورلار.
قورىتىندى باعا 0-دەن 100-گە دەيىنگى شكالا بويىنشا بىرىڭعاي كورسەتكىشكە بىرىكتىرىلىپ شىعارىلعان, مۇندا 100 بالل – ەڭ جوعارى ناتيجە بولىپ سانالادى.
قازاقستان الەمدەگى ەڭ باقىتتى ەلدەر رەيتينگىندە 33-ورىنعا كوتەرىلدى
تمد ەلدەرىنىڭ ىشىندە قازاقستان حالىقارالىق بەدەل دەڭگەيى بويىنشا ەكىنشى ورىندى يەلەندى. ەلدىڭ قورىتىندى كورسەتكىشى 66,62 بالدى قۇرادى.
رەيتينگتە قازاقستاننان كەيىن ورنالاسقان تمد-عا مۇشە مەملەكەتتەردىڭ كورسەتكىشتەرى تومەندەگىدەي:
- بەلارۋس – 89-ورىن (59,27 بالل);
- ارمەنيا – 93-ورىن (57,14 بالل);
- ازەربايجان – 101-ورىن (54,15 بالل);
- وزبەكستان – 134-ورىن (37,7 بالل);
- قىرعىزستان – 145-ورىن (34,87 بالل);
- تاجىكستان – 160-ورىن (27,92 بالل).
ايتا كەتەيىك, بيىلعى جاھاندىق رەيتينگتىڭ كوشباسشىسى – سينگاپۋر مەملەكەتى بولدى.
«ەلدىڭ بەدەلى ەندى ابستراكتىلى ۇعىم ەمەس. بۇل باسەكەگە قابىلەتتىلىككە, ىقپالعا جانە وركەندەۋگە تىكەلەي اسەر ەتەتىن ولشەنەتىن ءارى ستراتەگيالىق فاكتور», دەپ اتاپ ءوتتى CEOWORLD رەداكتسيالىق القاسى.
زەرتتەۋ اۆتورلارىنىڭ پىكىرىنشە, CEOWORLD-تىڭ 2026 جىلعى جاھاندىق بەدەل يندەكسى مەملەكەتتەردى جاي عانا رەيتينگكە قويىپ قويماي, حالىقارالىق ىقپال قاعيداتتارىنىڭ قالاي وزگەرىپ جاتقانىن دا ايقىن كورسەتەدى.
قازىرگى الەمدە سەنىم, باسقارۋ ساپاسى, يننوۆاتسيالىق دامۋ جانە ەلدىڭ سىرتقى سەرىكتەستەرمەن تۇراقتى قارىم-قاتىناس ورناتا الۋ قابىلەتى بارعان سايىن ماڭىزدى بولا تۇسۋدە. اۆتورلاردىڭ ايتۋىنشا, ەتيكا, يننوۆاتسيا جانە ادامعا باعدارلانعان ۇستانىمدى ءوز بويىندا ۇيلەستىرە العان مەملەكەتتەر عانا بولاشاقتى ايقىندايتىن بولادى.
ەسكە سالا كەتەيىك, بۇعان دەيىن قازاقستان اسكەرى الەمدىك اسكەري قۋات رەيتينگى – Global Firepower 2026 بويىنشا 145 ەلدىڭ ىشىندە 58-ورىنعا جايعاستى.
