پرەزيدەنت استانا قالاسىنىڭ اكىمى جەڭىس قاسىمبەكتى قابىلدادى

جەڭىس قاسىمبەك قالانىڭ بارلىق ەكونوميكالىق كورسەتكىشى بويىنشا وڭ ديناميكا بايقالاتىنىن ايتتى. بيىلعى 9 ايدا تارتىلعان ينۆەستيتسيا كولەمى 1 تريلليون 140 ميلليارد تەڭگەنى قۇرادى. بۇل – 2023 جىلدىڭ وسى كەزەڭىمەن سالىستىرعاندا 16 پايىزعا جوعارى.

مەملەكەت باسشىسىنا جىلىتۋ ماۋسىمى جونىندە باياندالدى. بىلتىر «وڭتۇستىك-شىعىس» گاز جىلۋ ستانتسياسىن, «تۇران» گاز جىلۋ ستانتسياسى مەن ءۇشىنشى جىلۋ ەلەكتر ورتالىعىنىڭ ءبىرىنشى كەزەڭدەرىن پايدالانۋعا بەرۋ ناتيجەسىندە قالادا جىلۋ قۋاتى العاش رەت ارتىعىمەن وندىرىلە باستادى. اتالعان نىساندار استانانى 1100 گكال/cاعاتتان استام جىلۋ قۋاتىمەن قامتاماسىز ەتتى.

جىل سوڭىنا دەيىن «تۇران» گاز جىلۋ ستانتسياسىنىڭ ەكىنشى كەزەڭىن اياقتاۋ جوسپارلانىپ وتىر. سول كەزدە شاھارعا قوسىمشا 250 گكال/ساعات جىلۋ بەرىلەدى.

بۇدان بولەك جەڭىس قاسىمبەك قازىر جالپى قۋاتى 970 گكال/ساعات بولاتىن «تەلمان» گاز جىلۋ ستانتسياسىن سالۋ جانە «وڭتۇستىك-باتىس» گاز جىلۋ ستانتسياسىن جوبالاۋ جۇمىستارى جۇرگىزىلىپ جاتقانىن جەتكىزدى.

پرەزيدەنتكە الەۋمەتتىك نىساندار (مەكتەپ, قولجەتىمدى باسپانا, مەديتسينالىق مەكەمەلەر) سالۋ, قۇرىلىسى ۇزاققا سوزىلعان تۇرعىن ۇيلەردى اياقتاۋ, توزىعى جەتكەن اپاتتى ۇيلەردى بۇزۋ جونىندە ايتىلدى.

مىسالى, استانادا جاڭا وقۋ جىلىنا جوسپارلانعان 24 مەكتەپتىڭ 15-ءى پايدالانۋعا بەرىلدى. ونىڭ ىشىندە 9 ءبىلىم وشاعى «جايلى مەكتەپ» ۇلتتىق جوباسى اياسىندا بوي كوتەردى. جاڭا جىلعا دەيىن 4,5 مىڭعا جۋىق ورىندى قامتاماسىز ەتەتىن 6 ستۋدەنتتىك جاتاقحانا سالۋ جوسپارلانعان بولاتىن. بۇگىندە ونىڭ تورتەۋىنە ستۋدەنتتەر ورنالاسقان.

قالا اكىمىنىڭ ايتۋىنشا, ەلوردادا 170-كە تارتا اۋلا مەن قوعامدىق كەڭىستىك اباتتاندىرىلىپ, 70-تەن استام كوشە جوندەۋدەن وتكەن. سونداي-اق ميلليون ءتۇپ اعاش پەن جاسىل جەلەك ەگۋ جوسپارلانىپ وتىر.

كەزدەسۋ سوڭىندا پرەزيدەنت ەلوردانى ودان ءارى دامىتۋ, كولىك ينفراقۇرىلىمىن نىعايتۋ جانە كورىكتەندىرۋ بويىنشا بىرقاتار تاپسىرما بەردى.