سۋرەتتى تۇسىرگەن – ەرلان ومار, «ەQ»
سالتاناتتى ءىس-شاراعا قورعانىس ءمينيسترى رۋسلان جاقسىلىقوۆ, اقمولا وبلىسىنىڭ اكىمى مارات احمەتجانوۆ, راقىمجان قوشقارباەۆتىڭ قىزى ءاليا راقىمجانقىزى, حالىق قاھارمانى, وتستاۆكاداعى ارميا گەنەرالى مۇحتار التىنباەۆ, حالىق قاھارمانى, وتستاۆكاداعى گەنەرال-لەيتەنانت باقىتجان ەرتاەۆ, «Qazaqstan ardagerleri» قاۋىمداستىعىنىڭ توراعاسى, اۋعان سوعىسىنىڭ ارداگەرى باقىتبەك سماعۇل, ت.ب. قوناقتار قاتىسىپ, ءسوز سويلەدى.
ولار پرەزيدەنت قاسىم-جومارت توقاەۆتىڭ ۇيىتقى بولۋىمەن بيىل تۋعانىنا 100 جىل تولىپ وتىرعان داڭقتى باتىرلارىمىز ر.قوشقارباەۆ پەن س.نۇرماعامبەتوۆتىڭ مەرەيتويى كەڭ كولەمدە تويلانىپ جاتقانىن, سونداي-اق «ايبىن» وردەنىنىڭ ءۇش دارەجەسىنە ب.مومىش ۇلى, س.نۇرماعامبەتوۆ جانە ر.قوشقارباەۆتىڭ ەسىمدەرى بەرىلگەنىن اتاپ ءوتتى.
«بۇل – كوپتەن كۇتكەن مەرەيلى ءسات. راقىمجان قوشقارباەۆ اتىنداعى ساياباق تايتوبەلىكتەر مەن اۋىل قوناقتارىنىڭ سۇيىكتى دەمالىس ورنىنا اينالادى دەپ سەنەمىز. مۇنداي قوعامدىق ورىندار جاس جەتكىنشەكتەرىمىزگە تاريحتان ءتالىم بەرىپ قانا قويماي, ولاردى ەل قورعايتىن باتىر قىلىپ تاربيەلەۋگە ءوز ۇلەسىن قوسپاق», دەدى وبلىس اكىمى م.احمەتجانوۆ.
ءا.راقىمجانقىزى اكەسىنىڭ مەرەيتويىن وتكىزۋگە مەملەكەت تاراپىنان ايرىقشا كوڭىل ءبولىنىپ جاتقانىنا پرەزيدەنتكە, وبلىس جانە قورعانىس مينيسترلىگى باسشىلارىنا العىسىن جەتكىزدى.
«اكەمنىڭ بالالىق شاعى وسى اۋىلدا ءوتتى. بۇل جەر – ءبىز ءۇشىن ىستىق مەكەن. بۇگىنگى ساياباقتىڭ دا تايتوبەنىڭ تورىنەن اشىلۋى – زاڭدىلىق. وسى يگىلىكتى ءىستىڭ باسى-قاسىندا بولىپ, جۇزەگە اسۋىنا اتسالىسقان بارلىق جانعا راحمەت ايتقىم كەلەدى», دەپ ول جۇرەكجاردى لەبىزىن جەتكىزدى.
قوسشى قالالىق اكىمدىگى بەرگەن مالىمەتكە قاراعاندا, 1 200 شارشى مەتر اۋداندى الىپ جاتقان ساياباق پەن بيۋست جۇمىسىنا 70 ملن تەڭگە قاراجات جۇمسالعان. ىشىندە 8 ورىندىق ورناتىلىپ, بۇكىل اۋماعىنا تاس توسەنىش توسەلگەن. اينالاسىنا قاراعاي اعاشتارى ورناتىلىپ, قورشالعان. ساياباق اۋماعى تولىقتاي جارىقتاندىرىلعان. بۇل اۋىل تۇرعىندارى مەن قوناقتارىنا تەك كۇندىز ەمەس, قاراڭعى ۋاقىتتا دا ساياباقتا سەرۋەندەۋىنە مۇمكىندىك بەرەدى.
سالتاناتتى ءىس-شارا كەزىندە ساياباق جانىندا قارۋ-جاراق پەن اسكەري تەحنيكالار كورمەسى ۇيىمداستىرىلىپ, كەلۋشىلەرگە سارباز بوتقاسى ۇسىنىلدى.
سونىمەن قاتار باتىردىڭ 100 جىلدىعىنا وراي ەلورداداعى ۇلتتىق قورعانىس ۋنيۆەرسيتەتىندە «رەيحستاگقا تۋ تىككەن راقىمجان قوشقارباەۆ» اتتى ۆەدومستۆوارالىق عىلىمي-تاجىريبەلىك كونفەرەنتسيا ءوتتى. وعان قارۋلى كۇشتەردىڭ, باسقا دا اسكەري قۇرىلىمداردىڭ وكىلدەرى, پروفەسسور-وقىتۋشىلار قۇرامى, جوعارى وقۋ ورنىنىڭ ماگيسترانتتارى مەن دوكتورانتتارى, تاريحشىلار, ارداگەرلەر جانە راقىمجان قوشقارباەۆتىڭ تۋىستارى قاتىستى.
ايتا كەتسەك, 1945 جىلى باتىر جەرلەسىمىز نەبارى 20 جاستا ەدى. ونىڭ ءومىر جولى مەن جاساعان ەرلىگى – بۇگىنگى ۇرپاققا ۇلگى-ونەگە. جيىندا وتستاۆكاداعى گەنەرال-لەيتەنانت اباي تاسبولاتوۆ راقىمجان قوشقارباەۆتى «فەنومەن» دەپ اتادى. ول ءوزىنىڭ ومىرلىك ۇستانىمى – قاراپايىمدىلىعىمەن, ەڭبەكقورلىعىمەن, سەنىپ تاپسىرىلعان ىسكە جاۋاپكەرشىلىگىمەن ۇلگى بولا ءبىلدى. ۋاقىت بارىنە سىنشى, قاھارمان دا تاريحتان ءوز ورنىن الدى.
باتىردىڭ مەرەيتويىنا ارنالعان تاعى ءبىر ءىس-شارا ەلورداداعى ر.قوشقارباەۆ اتىنداعى №44 مەكتەپتە ءوتتى. وعان قورعانىس مينيسترلىگى تاربيە جانە يدەولوگيالىق جۇمىس دەپارتامەنتى باسقارماسىنىڭ باستىعى, پولكوۆنيك سەرعالي الىمقۇلوۆ, «Amanat» پارتياسىنىڭ وكىلدەرى, اۋعان سوعىسىنىڭ ارداگەرلەرى, مۇعالىمدەر مەن وقۋشىلار قاتىستى.
«بيىل مامىر ايىندا قورعانىس ءمينيسترىنىڭ ۇسىنىسىمەن بۇل مەكتەپكە راقىمجان قوشقارباەۆتىڭ ەسىمى بەرىلدى. اتاۋلى كۇنگە وراي مينيسترلىك ءىس-شارالار كەشەنىن ۇيىمداستىرىپ, بارلىق وقۋ ورنىندا ەرلىك ساباقتارى ءوتىپ جاتىر. بولاشاق وتان قورعاۋشىلارعا ءومىر جولى ۇلگى بولاتىن ر.قوشقارباەۆتىڭ ەرلىگى تۋرالى ايتىلدى», دەپ اتاپ ءوتتى پولكوۆنيك س.الىمقۇلوۆ.
