قاراعاندى وبلىسى-نىڭ مادەنيەت, ارحيۆتەر جانە قۇجاتتاما باسقارماسىنىڭ قولداۋىمەن قارىمدى قالامگەردىڭ مەرەيلى جىلىنا توقايلاستىرىپ, كىتاپحانا ۇجىمى ناۋرىز ايىنان باستاپ قازان ايىنا دەيىن «شابىت شۋاعى» اتتى وبلىستىق ساحنالىق قويىلىم بايقاۋىن جاريالاعان ەدى. قورىتىندىسى ساكەن سەيفۋللين اتىنداعى قاراعاندى وبلىستىق اكادەميالىق قازاق دراما تەاترىندا ءوتىپ, دراماتۋرگتىڭ ء«الىمنىڭ الەگى», «شىت كويلەك», «ەكى وقۋشى», «اعالىق اقىل» اتتى پەسالارىن ساحنالادى.
بۇل يگىلىكتى ءىس-شاراعا الماتىدان ارنايى كەلگەن قازاق راديوسىنىڭ ارداگەرى ايگۇل بۇركىتقىزى جاس ورەندەردىڭ قازىلىعىنا توراعالىق ەتتى.
– اكەم – سوڭىنان ءىز قالدىرعان, ءسوز قالدىرعان تۇلعا. ونىڭ جازبالارى, ولەڭدەرى اتىن وشىرگەن جوق. وبلىستىق دەڭگەيدە العاش رەت ناسيحاتتالىپ جاتىر. سوعان الاتاۋدان كوڭىلىم الىپ-ۇشىپ ارنايى كەلدىم. پەسالارىن قاراشاڭىراق ساكەن تەاترىندا جاس ونەرپازدار وتە جوعارى دەڭگەيدە ساحنالاپ شىقتى. ءار پەساسى ونەگەگە تولى ەكەن, – دەيدى اقىننىڭ قىزى.
ورەندەردىڭ ونەرىنە ە.بوكەتوۆ اتىنداعى قاراعاندى زەرتتەۋ ۋنيۆەرسيتەتىنىڭ دوكتورانتى ادىلەت جاعىپار, قاراعاندى مەملەكەتتىك مەديتسينا ۋنيۆەرسيتەتىنىڭ ۇستازى, فيلولوگيا عىلىمدارىنىڭ كانديداتى, پروفەسسور بايان يبراەۆا, مادەنيەت قايراتكەرى, س.سەيفۋللين اتىنداعى قاراعاندى وبلىستىق اكادەميالىق قازاق دراما تەاترىنىڭ اكتەرى, رەجيسسەر بەكمۇحامەت كيەكباەۆ باعا بەردى.
سونىمەن «شابىت شۋاعى» وبلىستىق ساحنالىق قويىلىم بايقاۋىندا I ورىندى نۇرا اۋدانى, يزەندى اۋىلىنىڭ تالانتتى وقۋشىلارى يەلەندى. ءىى ورىنعا قاراعاندى قالاسىنداعى ج.اقباەۆ اتىنداعى جالپى ءبىلىم بەرەتىن مەكتەپ وقۋشىلارى لايىق دەپ تانىلدى. ءىىى ورىندى وساكاروۆ اۋدانى مولودەجنىي كەنتىنىڭ مەكتەبى مەن قاراعاندىداعى №36 جوعارى مەكتەپ وقۋشىلارى يەلەندى.
مۇنىمەن قوسا, جان-جاقتان پەسانى ساحنالاپ اكەلگەن بالدىرعاندارعا ارنايى اتالىم بويىنشا دا ماراپات تابىستالدى. «ۇزدىك قويىلىم» اتالىمى م.مامىراەۆ اتىنداعى №68 مەكتەپ-ينتەرناتىنا بۇيىرسا, «ۇزدىك دەكوراتسيا» اتالىمىنا پريوزەرسك قالاسى №2 مەكتەپ لايىق دەپ تانىلدى. №53 مەكتەپ-ليتسەيىنىڭ وقۋشىسى سابىر شىڭعىس «ۇزدىك اكتەر», اقتوعاي اۋدانىنداعى ك.بايسەيىتوۆا اتىنداعى مەكتەپتىڭ وقۋشىسى ءدىلناز ساعىندىق «ۇزدىك اكتريسا» اتاندى. «ۇزدىك وبراز» اتالىمىن قاراعاندىداعى ع.مۇستافين اتىنداعى مەكتەپ وقۋشىسى رينات عالىمجان جەڭىپ الدى.
ايگۇل بۇركىتقىزى شالعاي اۋىلداردان كەلگەن تالاپتى بالالارعا ءوز اتىنان قارجىلاي سىيلىق تارتۋ ەتتى. جەڭىمپازدار مەن جۇلدەگەرلەرگە وبلىستىق مادەنيەت, ارحيۆتەر جانە قۇجاتتاما باسقارماسىنىڭ ارنايى ديپلومى مەن قارجىلاي سىيلىعى ۇلەستىرىلدى.
ايدىڭ اياعىندا اقىننىڭ تۋعان جەرى نۇرا اۋدانىندا «بۇركىت ىسقاق ۇلى: تۇلعا تاعىلىمى مەن تاريحي زامانى» اتتى رەسپۋبليكالىق عىلىمي–پراكتيكالىق كونفەرەنتسيا وتەتىنى بەلگىلى بولدى.
اكادەميك مۇحامەدجان قاراتاەۆ: «بۇركىت ىسقاقوۆتىڭ «تاس ەدەننىڭ ىزعارى» اتتى ولەڭدەر توپتاماسىنىڭ قازاق پوەزياسىنان الاتىن ورنى ەرەكشە. ونىڭ بۇل ولەڭدەرىنەن ساكەننىڭ سىرى, بەيىمبەتتىڭ مۇڭى, ءىلياستىڭ ءۇنى ەستىلگەندەي بولادى», دەپ باعا بەرگەن.
كۇرەسكەر تۇلعانىڭ ەسىمى كومەسكىلەنبەي, اتى رەسپۋبليكا كولەمىندە ارداقتالۋى كەرەك دەپ ويلايمىز.
قاراعاندى وبلىسى
