فوتو: سەنات
دەپۋتات ءماسليحات تۋرالى زاڭنامانىڭ جەتىلمەگەندىگى جانە ونىڭ ءماسليحات دەپۋتاتتارىنىڭ وكىلەتتىگىن شەكتەيتىنى, اسىرەسە بيۋدجەت جانە رەسۋرستاردى ءبولۋ ماسەلەسىندە نەگىزگى كەدەرگى بولاتىنى تۋرالى ايتتى. ءماسليحاتتاردى قارجىلاندىرۋ دا ۇدايى جەتكىلىكسىز بولىپ كەلەدى, بۇل ولاردىڭ جۇمىسىنا جانە الەۋمەتتىك ماڭىزى بار جوبالاردى ىسكە اسىرۋ مۇمكىندىگىنە اسەر ەتەدى.
ء«ماسليحات دەپۋتاتتارىنىڭ الدىنا حالىق مۇددەسىنىڭ ءبىلدىرۋ جۇكتەلگەن, بىراق سونىمەن بىرگە ولاردىڭ زاڭنامالىق جانە اكىمشىلىك دەڭگەيدە مۇمكىندىكتەرى ايتارلىقتاي شەكتەلگەن. ءماسليحاتتاردىڭ شەشىم قابىلداۋ وكىلەتتىگى, اسىرەسە قارجى جانە بيۋدجەت باعىتىندا ءجيى شەكتەلەدى. بۇل ولاردىڭ جەرگىلىكتى قاجەتتىلىك پەن قوعامدىق سۇرانىستارعا ءتيىمدى جاۋاپ بەرۋ قابىلەتىنە كەرى اسەر ەتەدى. جەرگىلىكتى ءوزىن ءوزى باسقارۋ دەربەس دەسەك تە ءماسليحاتتار اتقارۋشى بيلىككە اسا تاۋەلدى. تۇرعىندار جەرگىلىكتى باسقارۋ تەتىكتەرىنىڭ جوقتىعىنان ءماسليحاتتاردىڭ تيىمدىلىگى مەن پارمەندىلىگى تومەندىگىن ايتادى. ءماسليحات اپپاراتىنىڭ قارجىلاندىرۋى تولىققاندى شەشىلمەگەندىكتەن ونىڭ فۋنكتسيالارى تالاپقا ساي ورىندالماي وتىر», دەلىنگەن بيبىگۇل جەكسەنبايدىڭ دەپۋتاتتىق ساۋالىندا.
دەپۋتات سونىمەن قاتار شالعاي اۋدانداردى ماماندارمەن قامتاماسىز ەتۋ ماسەلەسىن قوزعادى. ونىڭ پايىمىنشا, ازاماتتار كوبىنەسە ءماسليحاتتىڭ قىزمەتى تۋرالى بىلە بەرمەيدى جانە شەشىم قابىلداۋدان سىرت قالادى, ال بۇل جۇمىستىڭ تيىمدىلىگىن تومەندەتەدى. مۇنىڭ ءبارى جالپى ءماسليحات جۇيەسىن, ولاردىڭ ءرولى مەن جەرگىلىكتى قوعامداستىقتىڭ دامۋىنا ىقپالىن ارتتىرۋ ءۇشىن رەفورمالاۋ قاجەتتىگىن كورسەتەدى.
ء«ماسليحاتتاردىڭ جەرگىلىكتى ىستەردى باسقارۋعا بەلسەندى قاتىسۋعا مۇمكىندىك بەرەتىن قوسىمشا وكىلەتتىكتەر قاراستىرۋ كەرەك. اتقارۋشى جانە وكىلدى بيلىك تارماقتارى اراسىنداعى فۋنكتسيالاردىڭ قايتالانۋىن بولدىرماۋ ءۇشىن ءماسليحاتتاردىڭ, اكىمدىكتەردىڭ جانە قوعامدىق كەڭەستەردىڭ مىندەتتەرىن ناقتى ايقىنداۋ كەرەك. دەپۋتاتتاردىڭ حالىق الدىنداعى ەسەپ بەرۋىن دەپۋتاتتىڭ سايلاۋ الدى باعدارلاماسىمەن بايلانىستىرا وتىرىپ ءبىر جۇيەگە كەلتىرۋ كەرەك», دەدى بيبىگۇل جەكسەنباي.
