تاريحي جارمەڭكەگە وتاندىق باسپاگەرلەر مادەنيەت جانە اقپارات مينيسترلىگىنىڭ قولداۋىمەن العاش رەت قاتىستى. ناتيجەسىندە, ەۋروپالىق كورەرمەندەرگە ەلىمىزدىڭ باسپا ونىمدەرىن ناسيحاتتايتىن كورنەكى ستەند ۇيىمداستىرۋمەن قاتار, كورمە سورەسىنە ەلىمىزدىڭ 250-دەن اسا اۆتورىنىڭ شىعارماسى جايعاستى.
«بىزدەگى باسپالاردان: «مەكتەپ», «الماتىكىتاپ», «اتامۇرا», «Arman-PV», «Steppe & World Publishing», «Astana-kitap», «اmalBooks» سىندى مەكەمەلەر باسىپ شىعارعان ونىمدەردى كورە الاسىزدار. سونىمەن قاتار جوسپارلى مادەني شارا اياسىندا قازاقستاندىق «Steppe & World Publishing» باسپا ءۇيى اۋدارعان ميحاەل ەندەنىڭ «اياقتالماس حيكايا» جانە «مومو» كىتابى, «الماتىكىتاپ» باسپاسى «مەنىڭ قازاقستانىم» سەرياسىمەن جارىق كورگەن تۋىندىلارىن ۇسىنادى. فرانكفۋرت قالاسىنداعى ەلىمىزدىڭ باس كونسۋلدىعىندا «قازاقستان جازۋشىلارى مەن باسپاگەرلەرىنىڭ ۇلتتىق جانە الەم ادەبيەتىندەگى ءرولى» تاقىرىبىندا ادەبي-شىعارماشىلىق باسقوسۋ وتەدى. جارمەڭكە جەكسەنبى كۇنى امەريكالىق پولياك تاريحشىسى ەنن ەپپلباۋمعا نەمىس كىتاپ ساۋداسىنىڭ بەيبىتشىلىك سىيلىعىن تاپسىرۋمەن اياقتالادى دەپ كۇتىلۋدە», دەيدى ۇيىمداستىرۋشى ۆەدومستۆونىڭ ءباسپاسوز قىزمەتى.
فرانكفۋرت كىتاپ جارمەڭكەسىنىڭ باستى ماقساتى – كىتاپ ساۋداسى مەن نارىعىن حالىقارالىق ارەنادا جانداندىرىپ, جازۋشىلار مەن باسپاگەرلەرگە قولداۋ كورسەتۋ. جارمەڭكەنىڭ 550 جىلدان استام تاريحى بار. العاش رەت 1473 جىلى وتكىزىلسە, 1574 جىلدان باستاپ جۇيەلى تۇردە قولعا الىنعان. فرانكفۋرت كىتاپ جارمەڭكەسى ماينتستا (فرانكفۋرت ماڭىندا) يوگانن گۋتەنبەرگ نەگىزىن قالاعان كىتاپ باسپاسىمەن تىعىز بايلانىستى. سودان بەرى فرانكفۋرت – ەۋروپانىڭ كىتاپتار استاناسى اتانعان. ءداستۇرلى جارمەڭكەگە الەمدەگى ۇزدىك باسپاگەرلەر, كىتاپ ساتۋشىلار, كىتاپحاناشىلار, عالىمدار, اۋدارماشىلار, سۋرەتشىلەر, تاعى دا باسقا كىتاپ ىسىنە قاتىستى ءتۇرلى سالا وكىلدەرى قاتىسادى.
وسىنداي ماڭىزدى جارمەڭكە تورىنەن قازاقستاندىق ونىمدەردىڭ دە ورىن الۋى قۇپتارلىق دۇنيە. بۇل تۋرالى پىكىر بىلدىرگەن مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتىنىڭ توراعاسى رۋستام ءالي: «وتاندىق باسپاگەرلەردىڭ «Frankfurter Buchmesse-2024» كىتاپ جارمەڭكەسىنە قاتىسۋى – ءبىز ءۇشىن ماڭىزدى تاريحي وقيعا. دۇنيەجۇزىلىك الاڭدا ءوزىمىزدىڭ مادەني مۇرامىزدى تانىستىرىپ, وتاندىق اۆتورلار مەن باسپاگەرلەردى الەمدىك دەڭگەيدە كورسەتۋ مۇمكىندىگى تۋىپ وتىر. حالىقارالىق كىتاپ جارمەڭكەسى اياسىندا وتاندىق باسىلىمدار مەن شىعارمالاردى كورسەتىپ قانا قويماي, ماڭىزدى كەزدەسۋلەر مەن كەلىسسوزدەر وتكىزىپ, بولاشاققا ارنالعان ستراتەگيالىق بايلانىستار ورناتامىز دەپ جوسپارلاپ وتىرمىز», دەيدى.
راسىندا, بۇل باستاما وتاندىق كىتاپ نارىعىن دامىتۋ, ونى جاڭا دەڭگەيگە كوتەرۋ, اۆتورلاردىڭ شىعارمالارىن جاھانعا تاراتۋعا مۇمكىندىك بەرەرى ءسوزسىز. سونداي-اق كىتاپ جارمەڭكەسى اياسىندا قۇقىقتاردى باسقارۋ, سەرىكتەستىك, جاساندى ينتەللەكت پەن ماشينالىق وقىتۋدى قولدانۋ, دەرەكتەر نەگىزىندەگى ماركەتينگ جانە تسيفرلىق ترانسفورماتسيا تاقىرىپتارى بويىنشا پىكىر الماسۋ مەن تاجىريبە ءبولىسۋ جايى دا جوسپاردا بار كورىنەدى.
جاھانعا ايگىلى جارمەڭكەنىڭ ماڭىزى تۋرالى قازاقستان جازۋشىلار وداعىنىڭ توراعاسى مەرەكە قۇلكەنوۆ: «بۇل جارمەڭكە مەملەكەت باسشىسىنىڭ ۇلتتىق قۇرىلتايدا ايتقان كىتاپ وقۋ مادەنيەتىن قالىپتاستىرۋدىڭ قانشالىقتى ماڭىزدى ەكەنىن كورسەتەدى. بۇگىندە ءبىز كىتاپتىڭ, ءبىلىم الۋ قۇرالى عانا ەمەس, قوعامنىڭ مادەني دەڭگەيىن كوتەرۋدىڭ نەگىزگى تەتىگى ەكەنىن تەرەڭ ءتۇسىنۋىمىز كەرەك. قازاقستاننىڭ ادەبيەتى مەن مادەنيەتىن حالىقارالىق ارەناعا شىعارۋ – وداق ءۇشىن ۇلكەن جاۋاپكەرشىلىك ءارى تاريحي مىندەت. وسى جارمەڭكە ارقىلى ادەبي مۇرامىزدى جاڭا بيىكتەرگە كوتەرەمىز دەپ سەنەمىن. جازۋشىلار وداعى ارقاشان بۇل ۇدەرىستە قالامگەرلەرگە قولداۋ كورسەتىپ, ولاردىڭ شىعارمالارىن الەمگە تانىتۋعا بارىن سالادى», دەپ ءسوزىن تۇيىندەدى.
