قمدب توراعاسى, باس ءمۇفتي ناۋرىزباي قاجى تاعان ۇلىنىڭ ايتۋىنشا, قازىر ءدىني مالىمەت ىزدەگەن ادامعا ينتەرنەتتە اقپارات جەتەرلىك. ادامدار كوبىنە كەرەگىن ۋيكيپەديا بازاسىنان ىزدەيدى. الايدا عالامتورداعى مالىمەتتىڭ ءبارى شىنايى, اقيقات دەۋگە كەلمەيدى. سونىڭ ىشىندە يسلام دىنىنە قاتىستى دەرەكتەر از, بار دەرەكتىڭ ءوزى كۇماندى. سوندىقتان قازاق تىلىندە جارىق كورە باستاعان بۇل يسلام ەنتسيكلوپەدياسى وسى ولقىلىقتىڭ ورنىن تولتىرۋعا باعىتتالعان. بۇيىرسا, الداعى ۋاقىتتا ەنتسيكلودەپيانىڭ جالپى سانى بەس تومىن شىعارۋ كوزدەلىپ وتىر.
كىتاپتىڭ تانىستىرىلىمىندا ءسوز سويلەگەن ن.تاعان ۇلى ەلىمىزگە بەلگىلى 50-گە جۋىق عالىمنىڭ باسىن بىرىكتىرگەن جۇمىس توبى قۇرىلعانىن, يسلام تاريحى مەن وركەنيەتى, مادەنيەتى مەن ادەبيەتى, سونىمەن قاتار كۇللى مۇسىلمان حالقىنا ورتاق ۇعىمدار مەن اتاۋلار قامتىلعانىن اتاپ ءوتتى. ۇلى دالا توسىندەگى يسلام تاريحىنان باستاپ (قاراحان مەملەكەتى, التىن وردا, قازاق حاندىعى, الاشوردا ۇكىمەتى, كەڭەس زامانى جانە تاۋەلسىز قازاقستان), قازاق توپىراعىنان شىققان تاريحي تۇلعالار, ءدىن قايراتكەرلەرى, قاسيەتتى جەرلەر مەن كيەلى مەكەندەر تۋرالى ماعلۇماتتار دا ەنگىزىلگەن. قازاقتىڭ ءدىني-اعارتۋشىلىق سالاسىندا ءوز ءىزىن قالدىرعان احۋندار, يشاندار, قازيلار, مۇفتيلەر, يمامدار دا قامتىلدى. باس ءمۇفتي ەنتسيكلوپەديادا نەگىزىنەن قازاق حالقىنا قاتىسى بار يسلامي مالىمەتتەر توپتاستىرىلعانىن اتاپ ءوتتى.
«بۇل ەڭبەكتە قامتىلعان جانە الداعى ۋاقىتتا قامتىلاتىن بارلىق ماتەريال كەلىسىمشارت نەگىزىندە حالىقارالىق ۋيكيپەديا بازاسىنا ۇسىنىلادى. جاس زەرتتەۋشىلەردىڭ كومەكشى قۇرالى رەتىندە وسى سالاداعى ىرگەلى زەرتتەۋلەرگە نەگىز بولادى. سونداي-اق قازاق تاريحى مەن مادەنيەتىندەگى يسلامنىڭ ورنى شىنايى دايەكتەر مەن ناقتى دەرەكتەر نەگىزىندە تولىق جۇيەلەنىپ, ءبىر ىزگە تۇسەدى», دەدى باس ءمۇفتي.
ەڭبەكتىڭ تانىتىمىنا ارنالعان ءىس-شارادا پرەزيدەنت كەڭەسشىسى, اكادەميك باۋىرجان وماروۆ, اكادەميك عاريفوللا ەسىم, مەملەكەت قايراتكەرى ورالباي ابدىكارىم ۇلى, قوعام قايراتكەرى, جازۋشى جابال ەرعاليەۆ, «قازاق گازەتتەرى» سەرىكتەستىگىنىڭ باس ديرەكتورى, اكادەميك ديحان قامزابەك ۇلى, ءدىن ىستەرى كوميتەتىنىڭ توراعاسى ەرجان نۇكەجانوۆ, فيلولوگيا عىلىمدارىنىڭ دوكتورى ايگۇل ىسماقوۆا, وزگە دە ەسىمى ەلگە بەلگىلى قوناقتار ءسوز الىپ, جاڭا ەڭبەككە قاتىستى ويلارى مەن ۇسىنىستارىن ورتاعا سالدى.
