رۋحاني ءىس-شارانى ۇيىمداستىرۋشى قازاقستان جازۋشىلار وداعىنىڭ استانا بولىمشەسى جانە اقىننىڭ تۋعان ولكەسى پاۆلودار وبلىسى اقسۋ اۋدانى اكىمدىگىنىڭ ماقساتى – قىرشىن كەتكەن قالامگەردىڭ ارتىندا قالعان مۇراسىن جاس بۋىنعا ناسيحاتتاۋمەن قاتار, شىعارماشىلىعى مەن تۇلعالىق قاسيەتى حاقىندا كوپشىلىكتى حاباردار ەتۋ.
دوڭگەلەك ۇستەلدىڭ تىزگىنىن ۇستاعان اقىن داۋلەتكەرەي كاپ ۇلى قازاقتىڭ ماڭدايىنا بىتكەن دارىندى تۇلعانىڭ ءبىرى ءسابيت دونەنتاەۆ ەكەنىن جەتكىزىپ, بيىل اقىننىڭ 130 جىلدىعىنا وراي «فوليانت» باسپاسى «الاش اماناتى» سەرياسىمەن جازۋشىنىڭ «كوركەمتاي» اتتى كىتابىن شىعارعانىن, بۇل ىسكە ءوزىنىڭ مۇرىندىق بولعانىن تىلگە تيەك ەتتى.
اقىن ءسابيت دونەنتاەۆتىڭ سان قىرلى ءومىرى ءبىر عانا وتىرىسپەن جەڭىل-جەلپى توقتالىپ وتە شىعاتىن دۇنيە ەمەس. ويتكەنى بۇل ادام ءوز عۇمىرىندا ەل ىشىندە بولىپ جاتقان ەلەۋلى وقيعالاردىڭ قايناعان ورتاسىندا ءجۇرىپ, ونى قالامىنا ارقاۋ ەتە ءبىلدى. وسى پايىمىمىزدى وتىرىستىڭ باس بايانداماسىن جاساعان ل.ن.گۋميلەۆ اتىنداعى ەۇۋ پروفەسسورى, ادەبيەتتانۋشى عالىم ساعىمباي جۇماعۇلدىڭ پىكىرى تولىقتىرا ءتۇستى.
«س.دونەنتاي ۇلى شىعارماشىلىعى سان قىرلى سيپاتقا يە. ول – اباي قۇنانباي ۇلى, احمەت بايتۇرسىن ۇلى ءداستۇرىن جالعاستىرۋشى مىسال جانرىنىڭ شەبەرى, ساتيريك اقىن. «كوز سال گازەت, جۋرنالعا, ءدىن دۇنيەڭە, قورمالعا, از شىعىندى قىزعانىپ, كوپ پايدادان قۇر قالما!» دەگەن دارىننىڭ «قازاق», «ايقاپ», «سارىارقا», «اباي», «قازاق ءتىلى» سىندى گازەت-جۋرنالداردا جاريالانعان ماقالا, وچەرك, فەلەتوندارى جۋرناليستىك قارىمىن تانىتادى. پاناسىز, قورعانسىز جەتىمدەر تاعدىرىن ارقاۋ ەتكەن «كوركەمتاي» اڭگىمەسى الەۋمەتتىك ومىردەگى قياناتقا جانى توزبەگەن گۋمانيست جازۋشى رەتىندە دارالايدى», دەدى ساعىمباي بوتپاي ۇلى.
سونداي-اق ءىس-شارا بارىسىندا اقىننىڭ الاششىل باعىتى مەن ادامشىل بولمىسى بيىك ەكەنى دە ءسوز بولدى. بۇعان دالەل – 1918 جىلى سەمەي قالاسىندا قىزىلدار قولىنان قازا تاپقان الاش ساربازى قازي نۇرمۇحامەد ۇلىنىڭ قازاسىنا ارناپ جازعان «تۇڭعىش قۇربان» ماقالاسى مەن «الاشتىڭ العاشقى قۇربانىنا» اتتى ولەڭى ەكەن.
جيىن بارىسىندا اقىن, مەملەكەتتىك سىيلىقتىڭ لاۋرەاتى عالىم جايلىباي: ء«سابيت دونەنتاەۆ تۋرالى ەڭ كوپ بىلەتىن ءبىزدىڭ بۋىن. بۇل كىسى اباي مەكتەبىنىڭ وكىلى رەتىندە ەرتە تانىلعان ءھام تالاي مىقتىلاردان ساباق العان ادام» دەسە, ادەبيەت سىنشىسى امانگەلدى كەڭشىلىك ۇلى سوڭعى جىلدارى مەكتەپ وقۋلىقتارىنان ءسابيت دونەنتاەۆتىڭ «كوركەمتاي» اڭگىمەسى الىنىپ تاستالعانىنا وكىنىش ءبىلدىرىپ, ادەبيەتتىڭ تالاپتارىنا تولىق جاۋاپ بەرەتىن مۇنداي كلاسسيكالىق تۋىندىلاردى جوعالتپاۋ كەرەك ەكەنىنە توقتالدى.
سونىمەن قاتار ءىس-شارادا اقسۋ قالاسى ءماسليحاتىنىڭ توراعاسى مادەنيەت ومارعاليەۆ, بەلگىلى قالامگەرلەر, حالىقارالىق «الاش» سىيلىعىنىڭ يەگەرى سۇراعان راحمەت ۇلى مەن سەرىك ەلىكباي, اقسۋ قالاسى مادەنيەت جانە تىلدەردى دامىتۋ ءبولىمىنىڭ باسشىسى مەدىعات ماناپوۆ, اقىننىڭ تىكەلەي ۇرپاعى بالقيا دونەنتاەۆا, مادەنيەت جانە اقپارات مينيسترلىگى باسپا ءىسى باسقارماسىنىڭ باسشىسى الماز مىرزاحمەت باستاعان شىعارماشىلىق وكىلدەرى اقىن س.دونەنتاەۆ تۋرالى وي-پايىمدارىن ءبىلدىردى.
